Futbollisti shqiptar shpallet “Lojtari i muajit” në Zvicër

‘Blick’ kishte përzgjedhur pesë alternativa për votimin e tifozëve, ndërsa në vendin e parë me 39% të votave, fitues është shpallur sulmuesi Ezgjan Alioski

(KEYSTONE/Walter Bieri)

Si zakonisht e përditshmja zvicerane ‘Blick’, ka zgjedhur lojtarët e muajit, e kësaj radhe ka zgjedhur atë të muajit shtator, shkruan albinfo.ch.

Ajo kishte përzgjedhur pesë alternativa për votimin e tifozëve, ndërsa në vendin e parë me 39% të votave, fitues është shpallur sulmuesi Ezgjan Alioski. Futbollisti shqiptar që vesh fanellën e përfaqësueses maqedonase, me të cilën i shënoi edhe Shqipërisë në Shkodër, ka shkëlqyer me fanellën e Luganos gjatë këtij muaji, ndaj ka marrë numrin më të lartë të preferencave.

I dytë është një protagonist i kombëtares kuqezi, mesfushori Taulant Xhaka, i cili ka shkëlqyer me fanellën e Baselit, ndërsa ka mbledhur 28% të votave të tifozëve në këtë sondazh të të përditshmes zvicerane.

Pas tyre, në renditje janë Dumbia i Bazelit me 13% të votave, Pa Madu i Sionit me 11% dhe Kustodio i Lozanës me 9%.