Frika nga robotët për vendin e punës

Mendohet se përgjatë dekadës së ardhshme, dixhitalizimi do të rrezikojë 7.5 milionë vende pune në tregtinë me pakicë në Shtetet e Bashkuara

Autorët e një studimi amerikan të vitit 2013, Frey dhe Osborne pretendonin se kompjuterizimi i avancuar rrezikon deri në 47 për qind të të gjitha vendeve të punës në SHBA, e zhvillimi i inteligjencës artificiale e shton drojën edhe më shumë.

Faqja e internetit “Will Robots Take My Job?” është e hapur për të gjithë dhe i tregon kujtdo nëse puna që bën do të ekzistojë apo jo në të ardhmen, me tërmetin që po shkakton dixhitalizimi, përcjell albinfo.ch.

Daktilografistët, sipas saj do të zëvendësohen 81 për qind nga makinat, ndërsa guidat turistike 91 për qind. Mendohet se përgjatë dekadës së ardhshme, dixhitalizimi do të rrezikojë 7.5 milionë vende pune në tregtinë me pakicë në Shtetet e Bashkuara.

Disa prej kompanive më të mëdha të botës janë duke investuar shuma të mëdha për ndërtimin e robotëve, të cilët të zëvendësojnë punonjësit njerëz, e këtë do ta ndiejnë sidomos shoferët e kamionëve, arkëtarët apo punëtorët e “Fast Food”-eve.

Më pak të rrezikuar janë profesionet ku kërkohet një nivel më i lartë analize njerëzore. Puna e automatizuar nuk kërcënon mjekët dhe infermierët, trajnerët sportivë, e në përgjithësi punët që përfshijnë drejtimin dhe frymëzimin e të tjerëve.

Arsye për t’u frikësuar nuk kanë as stilistët, parukierët dhe punonjësit socialë. E thënë ndryshe, sa më individuale të jenë proceset, aq më mirë për ekzistencën e tyre.