Franca mbyll kufijtë për vendet jashtë BE-së

Sipas autoriteteve franceze, Franca do të mbyllë kufijtë me vendet jashtë Bashkimit Europian, në përpjekje për të frenuar përhapjen e epidemisë së koronavirusit, sipas njoftimit nga kryeministri, Jean Castex. Kryeministri, i cili theksoi se kishte ende një mundësi për të shmangur kufizimin, njoftoi gjithashtu mbylljen e qendrave të mëdha tregtare dhe riforcimin e kontrolleve për respektimin e shtetrrethimit në fuqi, në deklaratat e bëra nga Elyse në përfundim të Këshillit të Mbrojtjes, përcjell albinfo.ch.

“Çdo hyrje në Francë dhe çdo dalje nga territori ynë me destinacione ose me mbërritje nga një vend jashtë Bashkimit Europian do të jetë i ndaluar, përveç motiveve të forta, duke nisur nga e diela, në orën 00:00″, theksoi ai.

Po ashtu, kryeministri theksoi gjithashtu se një test PCR negativ do të kërkohet për çdo hyrje në Francë nga një vend i Bashkimit Europian, me përjashtim të punonjësve transkufitarë. Këto masa, tashmë në fuqi që prej të dielës së kaluar për transportin detar dhe ajror, do të shtrihen dhe në transportin tokësor.

“Qendrat tregtare joushqimore me një sipërfaqe më shumë se 20 000 metra katrorë do të mbyllen në Francë që prej kësaj të diele”, njoftoi kryeministri Jean Castex. /Albinfo.ch