Formohet komisioni për jetësimin e iniciativës për dëbim

Komisioni përcakton formën e shndërrimit në ligje të normave kushtetuese të krijuara me iniciativën e votuar nga populli

Ministrja zvicerane e drejtësisë, Simonetta Sommaruga, mbështetur në autorizimin që ia jep ligji, ka formuar komisionin i cili do të jetësojë inicativën për dëbimnin e të huajve me dosje krimi, që ishte pranuar me referendumin e 28 nëntorit nga populli i Zvicrës.

Këtë komision do ta kryesojë profesori i të drejtës publike në Universitetin e Bazelit, prof. Heinrich Koller, shkruan gazeta Tages Anzeiger në numrin e saj të sotëm. Në të do të bëjnë pjesë dy përfaqësues të partisë bartëse të iniciativës (SVP), dy përfaqësues të kantoneve, një përfaqësues i Entit Fedeeral për Drejtësi dhe një tjetër i Entit Federal për Migracion.

Komisioni ka autorizimin që deri më 15 qershor 2011 të përcaktojë formën se si do të do të shndërrohen në ligje normat e reja kushtetuese të krijuara me iniciativën e votuar nga populli. Ai do të bëjë një raport që do të përmbajë disa variante zbatimi. Qeveria federale pastaj do të vendosë për variantin e mundshëm dhe, në procedurë normale do të procedojë ligjin përkatës.