Ezgjan Aliosku në provë te FC Lugano

Mbrojtësi i djathtë i FC Schaffhausen, Ezgjan Alioski, njëherit edhe lojtar i reprezentacionit të Maqedonisë, ka rënë dakord që këtë gjashtë mujor ta kalojë në radhët e FC. Lugano, anëtare e Super Ligës zvicerane

Ezgjan Alioski , edhe pse mbanë shtetësi zvicerane me prejardhje është shqiptar nga  Prilepi  i Pellagonisë.

Dikur në këtë qytet të Maqedonisë, kanë jetuar edhe shumë shqiptarë.

Mirëpo elaboratet  e hartuara nga sllavo – maqedonasit dhe format e ndryshme të trysnisë dhe të shtypjes së vazhdueshme kanë bërë që sot në Prilep, të ketë  shumë pak familje shqiptare.

Shpërngulja  nënpresion   në Turqi, e në  vende të tjera dhe asimilimi i pandërprerë e ka reduktuar jashtë mase  ekzistencën e  familjeve shqiptare në këtë regjion.

Fatkeqësisht edhe sot maqedonasit e  Prilepit  dallohen për urrejtje të tepruar ndaj shqiptarëve .

Megjithatë familja Alioski asnjëherë nuk ka mohuar përkatësinë e saj shqiptare.

Ezgjani edhe pse i lindur në Zvicër, hapur e  me mburrje  deklaron origjinën e tij shqiptare.

Ai është i vetëdijshëm se mbiemri  i familjes së tij nga Aliu ,për qëllime të njohura  është shformuar në Alioski.

Meqenëse  është rritur dhe edukuar në një vend demokratik siç është Zvicra, këto padrejtësi  ndaj kombit të tij ia lë të  kaluarës.  I pa  paragjykime dhe  mjaft i  sjellshëm krijon lehtë miqësi me të gjithë.  Në arritjen e synimeve është këmbëngulës. Ushtrimeve u qaset me tepër seriozitet.

Këshillat e trajnerëve dhe të bashkëlojtarëve i pranon me dashamirësi. E , admiron lojën kolektive dhe nuk është aspak egoist.

Me  krosimet e tij të gjata e të bukura shpeshherë u krijon mundësi shënimi lojtarëve të repartit sulmues.  Nganjëherë di të jetë edhe vet i rrezikshëm për portierët e palës kundërshtare.

Detyrimet e parapara  i  ndjenë si obligim dhe i kryen me mjaft përgjegjësi.

Çdo ofertë të përzgjedhësve të reprezentacionit të Maqedonisë në futboll e ka mirëpritur me respekt e  dëshirë. Ai për seleksionin  e këtij vendi, deri me tani ka luajtur gjashtë ndeshje.

Forma e shkëlqyer në skuadrën e Maqedonisë, dhe paraqitjet e rregullta në ekipin e FC Schaffhausen i kanë shtyrë udhëheqësit e FC. Lugano,  që në këto momente të vështira për ekipin e tyre ta kërkojnë ndihmën e Alioskit.

FC Lugano e  plasuar në vendin e tetë në tabelë me vetëm katër pikë më tepër se i fundit  FC Vaduz, sezonin pranveror e nisë nën ethe dhe synim të vetëm  do ta ketë qëndrimin në Super Ligë.

Ezgjan Alioski në këtë gjysmë Kampionati  të Super Ligës zvicerane që nisë më 6 shkurt 2016 do të  shpalos tërë potencialin e tij, me kusht që t’ia rrisë vlerën vetvetes, dhe ta arsyetojë ardhjen në FC. Lugano.

Prezantimet e mira  në fanellën e FC Lugano , natyrisht që do të jenë fitimprurëse dhe me dobi të shumëfishtë.  Këtë mbrojtës mjaft ofensivë vetëm forma e duhur dhe loja e mirë e mbajnë në toplistën e lojtarëve më të dalluar të reprezentacionit të Maqedonisë.

Veçkësaj  pas përfundimit të marrëveshjes midis  të dyja Klubeve, hapen udhë edhe për kalim në ndonjë skuadër   të madhe të Evropës.

Ambiciet për të qenë në përbërjen e ekipeve me të ardhme të ndritshme  janë lehtë  të realizueshme, sepse Ezgjani përveç plotësimit të konditave për lojën  ka  përparësi edhe moshën . Ai më 12 shkurt të muajit të ardhshëm mbush 23 vjet,çfarë do të thotë se ka kohë të mjaftueshme për t’i shfaqur të gjitha njohurit  e tij në këtë sport.

ARIF EJUPI

 

 

 

 

 

 

 

 

---