Sport

Është vetëm 16 vjeç, impresionon me lojën e bukur

E shtunë, 16 Prill 2016 - 12:01 ARIF EJUPI

KEYSTONE/Laurent Gillieron

Futbollistëve me prirje të dukshme dhe që kanë krijuar emër në Zvicër, u është bashkangjitur edhe 16 vjeçari Andi Zeqiri.

Megjithë moshën tepër të re ai gjatë këtij sezoni është aktivizuar në dhjetë ndeshje me FC. Lausanne-Sport, kryesuese e tabelës në të ashtuquajturën Challenge League të Zvicrës ,dhe favorite gati e sigurt për rikthim në shoqërinë e skuadrave më të mira të këtij vendi.

Debutimin në fanellën bardhë e kaltër të voduasve Zeqiri e ka nisur ndaj FC Neuchatel Xamax,ku paraqitja e tij është pëlqyer nga të gjithë.

Trajneri Celectini para aktivizimit në lojë i jep disa këshilla Zeqirit të talentuar dhe perspektivë

Ai me angazhimin e tij maksimal në ushtrime e lojë po e fiton edhe me tepër besimin e trajnerit Fabio Celestini.

Trajneri Celestini i njohur nga të gjithë si mjaft parimor dhe i paanshëm me tepër vëmendje e përpikëri po e vrojton punën e Zeqirit të talentuar.

Zeqiri në përpjekje për të rimarrë topin e humbur nga skuadra e tij

Ai parashikon një të ardhme të ndritshme dhe premtuese të Zeqirit,të cilin e konsideron edhe si frymëzues të brezave në vijim.

Andi Zeqiri, del triumfues në duel me portierin Yvon Mvogo të SBC Young Boys, dhe reprezentues i grupmoshave U-21 të Zvicrës. — Andi Zeqiri, del triumfues në duel me portierin Yvon Mvogo të SBC Young Boys

Zeqiri me pasionin e tij të njohur për futbollin ka qenë njëri nga kadetët më të dalluar edhe në Akademinë parapërgatitore të profesionisteve të futbollit në qytezën Payerne të Zvicrës.

Nën mbikëqyrjen e trajnerëve të autoritetshëm të kësaj shkolle Zeqiri i shkathët me mjaft sukses i ka kaluar të gjitha provat teorike dhe praktike.

Zeqiri duke shmangur me mjeshtëri mbrojtjen kundërshtare shënon gol tejet të bukur

Me përvojën e fituar në këtë çerdhe talentesh dhe me përvetësim të shumë elementeve të tjera në skuadrën FC Lausanne –Sport,atij shumë shpejt i është krijuar vend në njëmbëdhjetëshin më të mirë të grupmoshave U-17-të Zvicrës.

Në këtë grupim Zeqiri është treguar mjaft i suksesshëm . Ai në trembëdhjetë paraqitje ka shkëlqyer duke shënuar edhe katër gola që rrallëherë shihen në terrenet sportive.

Jashtëzakonisht i kënaqur me lojën e tij është ndarë edhe përzgjedhësi Stefan Marini, i cili formimin e shpejt të Zeqirit e konsideron si një arritje të madhe.

Andi Zeqiri në rreshtin e dytë nga e djathta me grupmoshat U-17të të Zvicrës.

Ky djalosh me origjinë nga Talinoci i Muhaxhirëve të Ferizajt, aktualisht luan në seleksionin e grupmoshave U-19 të të Zvicrës.

Zeqiri falë lojës së tij të shkëlqyer kohëve të fundit ka zgjuar edhe vëmendjen e Medieve të shkruara dhe të atyre vizive në tërë Zvicrën. — Zeqiri në vëmendjen e medieve të shkruara dhe të atyre vizive në tërë Zvicrën.

Përzgjedhësi i kësaj kategorie Claude Ryf, si njëri nga ekspertët më të mirë dhe si analistë i dalluar i zhvillimeve të futbollit në Zvicër, e çmon lartë angazhimin e Zeqirit,të cilin në një të ardhme jo të largët e sheh edhe si vlerë të pazëvendësueshme të futbollit zviceran.

Ky shkrim është ilustruar me fotografitë e marra nga faqja zyrtare e FC. Lausanne-Sport, të cilat janë realizuar nga fotografi i mirënjohur Pascal Muller.

ARIF EJUPI