Edhe Vuçiq përgëzon Majlinda Kelmendin

“Sa i përket zonjës apo zonjushës Kelmendi, kjo grua e re nuk ka bërë asnjë të keqe. Bravo, hallall i qoftë për këtë sukses, për taletin, aftësinë, shpirtin… Ia heq kapelën”, ka thënë kryeministri serb

Suksesit të Majlinda Kelmendit i përulen të gjithë. Kjo vlen edhe për kryeministrin e Serbisë, Aleksandar Vuçiq. Edhe pse në Serbi është komentuar në mënyrë të ndryshme suksesi i saj në Lojërat Olimpike, kryeministri serb ka qenë korrekt, duke e uruar atë, shkruan albinfo.ch.

Edhe pse shumë njerëz në këtë shtet nuk e kanë pëlqyer suksesin xhudistes kosovare, por kjo nuk ka ndodhur me kryeministrin serb, Vuçiq.

“Sa i përket zonjës apo zonjushës Kelmendi, kjo grua e re nuk ka bërë asnjë të keqe. Bravo, hallall i qoftë për këtë sukses, për taletin, aftësinë, shpirtin… Ia heq kapelën. Kosova është në Lojërat Olimpike edhe pse anëtare mund të jetë vetëm shteti i cili është pranuar nga Kombet e Bashkuara. Nuk dua të komentoj zërat të cilët thonë se në Bruksel është nënshkruar që Kosova të jetë anëtare e Komitetit Olimpik”, tha ai.

Disa serbë kanë thënë se asaj duhet t’i bëhet një pritje zyrtare, pasi është sportiste nga Serbia, kurse kishte edhe të atillë që sportin nuk e përziejnë me politikë dhe e kanë përgëzuar për medaljen e artë.