Ditët e kulinarisë shqiptare arrijnë në Bruksel

Aktiviteti “Ditët e kulinarisë shqiptare” është zhvilluar në kuadrin e festave të nëntorit përgjatë datave 26 dhe 27 nëntor në Bruksel

Kulinaria shqiptare ka trokitur në portat e institucioneve evropiane përmes një aventure këmbëngulëse.

Një autobus jo si të tjerët e ka sjellë atë nga Tirana në Bruksel. “Autobusi i shijes” ka qëndruar para Parlamentit Evropian, në një nga sheshet më të spikatura dhe të frekuentuara për kulinarinë evropiane në Bruksel.

Aventurë që nuk ka kaluar pa rënë në sy të eurodeputetëve dhe funksionarëve të institucioneve evropiane, raporton “ABCNEWS”.

Ata kanë mundur të shijojnë gatimet tradicionale shqiptare në kryeqytetin e Evropës. Por “autobusi i shijes” përçon mbi të gjitha një mesazh për shqiptarët e diasporës, përcjell albinfo.ch.

“Është falë ndihmës së kompanisë ‘Neranxi’ dhe kokëfortësisë së pronarit. Duhet ta pranoj. Duhej një kokëfortë nga Himara që ta bënte këtë. Ky autobus ka udhëtuar nga Tirana përmes Brukselit përballë Parlamentit Evropian, që t’ua kujtojë shqiptarëve të diasporës që atdheu i tyre, megjithëse me pak vonesë, nuk i harron”, është shprehur  Pandeli Majko, ministër i Shtetit për Diasporën.

Për ministrin Majko është e rëndësishme që të mbushet vakuumi i krijuar midis shtetit shqiptar dhe komuniteteve shqiptare jashtë vendit.

“Do të kemi të tilla edhe në kryeqytetet e tjera të Evropës dhe kështu të mbushet ai vakuum dhe ajo vonesë që shteti shqiptar ka në marrëdhënie me komunitetet e tij jashtë Shqipërisë, pasi ato janë vërtet një pasuri e madhe dhe pjesë e pandashme e familjes shqiptare”.

Aktiviteti “Ditët e kulinarisë shqiptare” është zhvilluar në kuadrin e festave të nëntorit përgjatë datave 26 dhe 27 nëntor në Bruksel.

---