Dioguardi kërkon themelimin e degës së lobit shqiptaro-amerikan në Zvicër

Joseph Dioguardi ka folur për nevojën e një organizimi në Zvicër dhe në Evropë, të ngjashëm me atë të AACL në SHBA

Një lobi shqiptaro-zviceran sipas modelit të Lidhjes Qytetare Shqiptaro-amerikane duhet të themelohet për të shtyrë përpara punët e shqiptarëve në Ballkan. Kjo ishte pakashumë ideja për të cilën në Amriswil të Kantonit Thurgau ishin tubuar rreth dyqind shqiptarë dhe për të cilën kishte ardhur nga SHBA vetë Joseph Dioguardi, themeluesi dhe drejtuesi i AACL, shkruan albinfo.ch.

Politikani amerikan po shënon 30-vjetorin e themelimit të organizatës së tij, e cila ka pasur jo pak ndikim në përhapjen e të vërtetës për shqiptarët dhe për Kosovën në SHBA.

Bashkë me Diogardin në Zvicër kishte ardhur edhe bashkëshortja dhe bashkëpunëtorja e tij, Shirley Cloyes.

Gjatë prezantimit nga ana e tyre të aktiviteteve të AACL të zhvilluara përgjatë 30 vjetëve të ekzistimit, ata janë ndërprerë shumë herë nga ovacionet e të pranishmëve.

Dioguardi, ish- kongresmen amerikan, ka folur për nevojën e një organizimi në Zvicër dhe në Evropë, të ngjashëm me atë të AACL në SHBA. Ai, gjatë fjalimit të tij disa herë ka theksuar mungesën e mbështetjes dhe madje refuzimin që i bëhet organizatës së tij nga institucionet në Kosovë dhe në Shqipëri.

Në Zvicër këtë organizim e ka bartur dega për Zvicër e Fondacionit “Albana” dhe një grup inicues i përbërë nga aktivistë dhe afaristë të të gjitha trojeve shqiptare me qëndrim në Zvicër.

Albinfo.ch vjen nesër me një artikull më të zgjeruar në lidhje me aktivitetin e mbajtur sonte në Amriswil.

---