Diaspora shqiptare kërkon hapjen e Katedrës së gjuhës shqipe në Kroaci

Qendra Kulturore, mësimi plotësues në shqip dhe hapja e Katedrës së gjuhën shqipe ishin disa nga temat e diskutuara në këtë takim

Në vazhdën e takimeve me zyrtarë të lartë shtetërorë në Kroaci, zëvendëskryeministri i Kosovës, Dardan Gashi njëherësh ministër i Diasporës, ka takuar deputeten shqiptare në Parlamentin kroat, Ermina Lekaj-Perlaska.

Qendra Kulturore, mësimi plotësues në shqip dhe hapja e Katedrës së gjuhën shqipe ishin disa nga temat e diskutuara në këtë takim, përcjell albinfo.ch.

“Diaspora shqiptare në Kroaci është e inkuadruar mirë në shoqërinë kroate, marrë parasysh dhe kontributin e shqiptarëve në luftën shtetndërtuese. Kosova, bashkë me Shqipërinë, do ju mbështesim gjithashtu”, ka thënë me këtë rast, zv. kryeministri, njëherësh ministri i Diasporës, Dardan Gashi.

Deputetja shqiptare me origjinë nga Prizreni në të ardhmen e afërt pret më shumë të rinj shqiptarë të punësuar në institucionet kroate.

“Përforcimi i raporteve tona ndërshtetërore është me rëndësi. Komuniteti shqiptar në Kroaci numëron 19 mijë vetë dhe është i fortë. Po synojmë punësimin e të rinjve tanë në institucionet e vendit”, ka thënë deputetja Ermina Lekaj-Perlaska.

Nga ana tjetër, përfaqësuesit e Unionit të Shqiptarëve në Kroaci ngritën disa çështje të rëndësishme si ajo e certifikimit të mësuesve shqiptarë në kuadër të mësimit plotësues në gjuhën shqipe, për një marrëveshje ndërshtetërore për punë sezonale në Kroaci, për mungesën e informimit të studentëve në Kosovë rreth bursave që jep shteti kroat.

“Po interesohemi edhe për fatin e luftëtarëve të zhdukur shqiptarë të Vukovarit”, ka thënë kryetari i Unionit, Esad Qollaku, njëherësh veteran i Luftës në Kroaci.

Unioni i Shqiptarëve në Republikën e Kroacisë shprehën interesim edhe në fushën e Investimeve Strategjike duke ofruar dhe një projekt konkret.

Gjatë takimeve zyrtare në Republikën e Kroacisë, Dardan Gashi ka takuar ministren për Zhvillim Rajonal dhe fondeve të BE-së, Gabrijela Zelac.

Zëvendëskryeministri Gashi përgjatë të gjitha takimeve ka qenë i shoqëruar nga ambasadori i Kosovës në Zagreb, Gëzim Kasapolli.