Dekada e Re ka kuptim vetëm pa viza në Evropë

Kryetari i PDK-së dhe i Kuvendit të Kosovës, Kadri Veseli, ka komentuar Raportin e Progresit duke thënë se asgjë nuk është më e rëndësishme për Kosovën, sesa udhëtimi i qytetarëve pa viza.

Veseli ka shkruar se Bashkimi Evropian ka vlerësuar të arriturat e Kosovës sa i përket përmbushjes së kritereve për liberalizim, përcjell albinfo.ch.

“Në këtë fazë, nuk ka asgjë më të rëndësishme në agjendën evropiane për Kosovën sesa udhëtimi i qytetarëve tanë në Zonën Shengen, i cili do të krijojë mundësi më të mëdha për transformimin e politikës, të shoqërisë dhe ekonomisë. Dekada e Re ka kuptim vetëm pa viza në Evropë dhe zbatimi i MSA-së dhe ERA-së do të hyjnë në një dinamikë të re kur nuk do të ketë barriera të pakuptimta të lëvizjes së lirë”, ka shkruar ai.

Edhe Ministrja e Integrimit Evropian, Dhurata Hoxha, ka theksuar se mirëpret Raportin për vendin të Komisionit Evropian duke e konsideruar real dhe objektiv.

Ajo ka theksuar se “është shumë e rëndësishme që Komisioni Evropian vlerëson se Kosova ka bërë progres në shumë fusha”.