Numërimi i votave me kusht dhe votave të personave me nevoja të veçanta pritet të përfundojë sot.

Këto janë votat e fundit që po numërohen.

Kështu ka thënë zëdhënësi i KQZ’së, Valmir Elezi.

“Në QNR po vazhdon numrin e fletëvotimeve nga votimi me kusht dhe votimi i personave me nevoja të veçanta. Po planfikojmë që ky proces të përfundojë sot, në mbrëmje”, tha Elezi.

Shtyhet seanca ndaj të akuzuarve për spiunazh

Gjykata Themelore në Prishtinë ka vendosur ta shtyjë seancën fillestare për të akuzuarit për spiunazh, Bedri Shabani e Muharrem Qerimi.

Ky vendim u mor pasi avokatët e të akuzuarve kërkuan, e seanca e shqyrtimit do të mbahet më 17 mars.

Avokati i Shabanit, Besnik Berisha, tha se klientit të tij i duhet më shumë kohë për t’u njohur me aktakuzën, në mënyrë të ai të vihet në dijeni në detaje mbi fajësinë apo pafajësinë e tij.

Më 5 qershor të 2024-s, Agjencia Kosovare për Inteligjencë (AKI) dhe Policia i kishin arrestuar të pandehurit në Ferizaj.

Çka thotë aktakuza:

1.            I pandehuri Bedri Shabani;

I.             Nga data e pacaktuar e në vazhdimësi, e deri në momentin e arrestimit të tij më dt. 05.06.2024, i pandehuri Bedri Shabani, e ka ndihmuar Agjencinë e Inteligjencës dhe Sigurisë së Republikës së Serbisë (që njihet si “BIA”) në formën e mbledhjes dhe dërgimit të informacioneve, dokumenteve dhe materialeve që ndërlidhen me Ushtrinë Çlirimtare të Kosovës (“UÇK”), përfshirë eprorët e saj, si dhe me ngjarje dhe objekte specifike, të tilla si Spitali Ushtarak i UÇK-së në fshatin Mollopolc të Shtimes, dhe masakrën e Reçakut, në atë mënyrë që i pandehuri, të dhënat dhe informacionet në fjalë, ja u kishte transmetuar zyrtarit të lartë të BIA-s, Srgjan ROSIÇ, përgjegjës për Regjionin e Pançevës, si dhe kolonel, Bogoljub Janiçeviç, ish-Komandant i Policisë së Serbisë për Regjionin e Ferizajt gjatë kohës së Luftës në Kosovë dhe udhëheqës i operacionit policor-ushtarak në masakrën e Reçakut, përmes komunikimeve telefonike , postës elektronike dhe takimeve fizike, të zhvilluara në territorin e Serbisë, çka me këto veprime, i pandehuri ka rrezikuar dhe dëmtuar rëndë rendin juridik kushtetues dhe sigurinë e Republikës së Kosovës, duke e ndihmuar po ashtu BIA-në në krijimin e një narrative të pavërtetë, me qëllim që të ndërlidhë Spitalin Ushtarak të UÇK-së të Mollopolcit të Shtimes, me të ashtuquajturën “Shtëpia e Verdhë” në Burrel të Shqipërisë, kinse janë bërë trafikim organesh, si dhe të vë në dyshim të vërtetën e masakrës së Reçakut duke kërkuar nga zyrtari i BIA-s dhe Bogoljub Janiçeviç, që të ndërmarrin veprimeve operacionale të cilat do të shkaktonin një konflikti të gjerë ndëretnik në territorin e Republikës së Kosovës.      

–              Me këtë i pandehuri Bedri Shabani, e ka kryer veprën penale “Spiunazhi’’ nga neni 124 paragrafi 3 të KPRK –së.

2.            I pandehuri Muharrem Qerimi,

II.            Nga viti 2012, e në vazhdimësi e deri në momentin e arrestimit të tij, me dt.05.06.2024, i pandehuri Muharrem Qerimi, e ka ndihmuar Agjencinë e Inteligjencës dhe Sigurisë së Republikës së Serbisë (që njihet si “BIA”) në formën e mbledhjes dhe dërgimit të informacioneve, dokumenteve dhe materialeve të ndryshëm që kanë të bëjnë me luftën dhe pjesëtarët e UÇK-së, emrat e eprorëve të Policisë së Kosovës, AKI-së, IPK-së, pastaj emrat e dëshmitarëve tashmë të njohur të Dhomave të Specializuara të Kosovës në Hagë, në lidhje me veprat penale të krimit të organizuar, korrupsionin, e të cilat informacione ja ka transmetuar zyrtarit të lartë të BIA-s, Srgjan ROSIÇ, përgjegjës për Regjionin e Pançevës, përmes komunikimeve telefonike dhe takimeve fizike që ka zhvilluar në territorin e Republikës së Serbisë, çka me këto veprime, i pandehuri e ka rrezikuar dhe dëmtuar rëndë rendin juridik kushtetues dhe sigurinë e Republikës së Kosovës dhe të qytetarëve të saj.

–              Me këtë i pandehuri Muharrem Qerimi, e ka kryer veprën penale “Spiunazhi’’ nga neni 124 paragrafi 3 lidhur me nenin të KPRK –së.

III.           Po ashtu, nga data e pacaktuar e deri me dt. 05.06.2024 në Ferizaj, të pandehurit gjatë zbatimit të Urdhëresës së Gjykatës për urdhër kontroll, i është gjetur në posedim pa autorizim një revole e tipit Ekol Tuna me calibër 8mm, një karikator me gjashtë fishek në të, 20 fishek të tjerë me mbishkrimin 11/53, si dhe katër karikator tjerë me shenjën e gjysmë hënës dhe një rrumbullakë, të cilat i janë sekuestruar nga Policia e Kosovës.

–              Me këtë i pandehuri Muharrem Qerimi, e ka kryer veprën penale “Mbajtja në pronësi, kontroll ose posedim i paautorizuar i armëve” nga neni 366 par. 1 të KPRK-së.

Në ceremoninë e rreshtimit të kuadrateve të FSK-së, presidentja Vjosa Osmani ka deklaruar se familja Jashari e Prekazit është themeli i ngritjes së lirisë, përcjell slbinfo.ch.

Osmani ka thënë të mërkurën se sot kujtohet me krenari komandanti Adem Jashari dhe familja e tij heroike.

“Familja Jashari ishte shembulli më i mirë si duhet vendi e si duhet liria. Hamzë e Adem Jashari qëndruan të palëkundur në luftë, duke dëshmuar se s’ka sakrificë më të madhe se flijimi për atdheun e lirinë. Nga 5 marsi ndodhi ndër betejat më heroike të kombit shqiptar”, ka thënë presidentja Osmani.

Ajo ka shtuar para të pranishmëve se Prekazi nuk ishte vetëm një fshat, por edhe një kështjellë e lirisë “dhe fortifikatë e pamposhtur e kombit tonë”.

Në shënimin e 27-vjetorit të Epopesë së UÇK-së, Kurti tha se rreshtimi i kuadrateve ka traditën nga 6 marsi i vitit 1999.

“Që nga çlirimi i atdheut tonë në qershor 1999 dhe deri më sot e tutje një nga detyrat kyçe për ruajtjen e lirisë së fituar me gjakun e dëshmorëve dhe martireve të popullit tonë ka qenë dhe vazhdon të mbetet fuqizimi i ushtrisë së Kosovë, sot me ngazëllim mund të konstatoj se qysh nga viti 1989 kur Adem Jashari me shok filluan të flasin e të punojnë për në ushtri të Kosovës dhe deri sot kurrë nuk kemi pasur një ushtri më të fortë, më të armatosur, me ta pajisur dhe më të trajnuar se sa sot”, ka deklaruar Kurti.

Prokuroria Themelore në Mitrovicë ka urdhëruar që të rinumërohen të gjitha qendrat e vendvotimeve në komunën e Vushtrrisë.

Ky vendim i Prokurorisë vjen pasi kandidatja për deputete nga LDK, Rrezarta Krasniqi ka akuzuar se ka pasur keqpërdorimin e votave në disa qendra.

Sipas vendimit të Prokurorisë, e që është siguruar nga Telegrafi, thuhet se ekziston dyshimi se ka pasur manipulim të vota për ta ndihmuar kandidatin tjetër të LDK-së, Xhafer Tahiri.

Mes tjerash, Krasniqi ka deklaruar se edhe komisionerët kanë qenë familjarët të Xhafer Tahirit.

“Të bëhet rinumërimi i votave që kanë rezultuar nga të gjitha qendrat e vendvotimeve në komunën e Vushtrrisë, si dhe rinumërimi për kandidatët e Kuvendit të Republikës së Kosovës në zgjedhjet parlamentare të Kosovës, të organizuara më 9 shkurt”, thuhet në vendimin e prokurorisë..

Zgjedhjet parlamentare janë mbajtur më 9 shkurt.

Kryeministri i Kosovës, Albin Kurti ka thënë se Epopeja e UÇK-së është një prej ngjarjeve më të lavdishme, derisa po shënohet 27 vjetori i saj, përcjell albinfo.ch.

“Ato tri ditë të marsit i kemi quajtur si Epopeja e UÇK-së. Ngjarja që përmblidhet nën fjalën epope, krejt sikurse emri që i është vënë na e ka ritmuar historinë tonë bashkëkohore të më shumë se një çerek shekulli. Emrat Shaban, Adem dhe Hamzë janë kthyer në absolutët tanë, gratë e familjes Jashari janë bërë simboli i marrdhënies mes gruas së popullit autokton dhe mëkimit të ndjenjës së atdhedashurisë. Fëmijët e familjes Jashari janë tashmë simboli më i madh i masës historike të flijimit të popullit tonë”, ka deklaruar Kurti gjatë mbledhjes solemne të Qeverisë së Kosovës.

Kurti theksoi se në atë lëndinë të Prekazit emrat Jashari dhe të tjerët që prehen me ta janë emrat absolut të lirisë.

“E në atë datë kur lindi edhe Ademi i madh në datën më historike të shqiptarëve 28 nëntorin, shpallet publikisht edhe UÇK-ja. Na takon neve si popull e shoqëri, në qeverisje e zhvillim ta ruajmë atë ritëm të bërjes së historisë”, tha Kurti.

Kryeministri nuk citoi edhe disa nga fjalët e Rifat Jasharit, për të cilat tha se janë rikujtim i ritmit të lirisë së plotë.

“Çfarë themi kur themi se Epopeja na ka përcaktuar një ritëm, ç’është ky ritëm e gjejmë në fjalët e bacës Rifatë në 25 vjetorin e Epopesë ku tha “mbi luftën e gjakun të gjejmë një gjuhë të përbashkët”. Në Kuvend e artikuloi edhe më tej “të jemi të një gjuhe për tu ndarë njëherë e mirë prej Serbie, e pastaj kemi kohë për tu marrë me të gjitha të tjerat”. Baca Rifat na kujtoi edhe njëherë ritmin e lirisë së plotë”, tha Kurti.

Ai shtoi se në mandatin e tij qeverisës, përcaktimin më të lartë e kanë pasur në zhvillimin e kësaj linje në mbajtjen e këtij ritmi.

“Shtet si sovranitet, për liri të popullit në territor me integritet. Epopeja e UÇK-së ka vetëm një adresë, liri nga pushtuesi serb dhe vetëm një horizont, bashkimin tonë. Që nga ajo ditë çdo politikë e jona është në parim e përcaktuar. Emri Epope për një ngjarje të tillë nuk është vetëm për ato tri ditë por për tërë kohën liridashëse e shtetformuese”, tha Kurti.

Kurti e cilësoi Prekazin si një monument i vullnetit për liri duke theksuar se ai përbënë një nga realizimet tona më të rëndësishme.

“Ky monument prezanton gurthemelin e çlirimit të vendit tonë dhe shembullin botëror të flijimit për liri. Çdo kompromis me Epopenë dhe përcaktimin e saj, është kompromis dhe pazar me qenien me lirinë tonë, i cili sjell më pak liri, pa sjell robëri. Sovraniteti është një emancipim, çdo lëshim në kufi apo në veri ishte vetëm një korruptim i sovranitetit në të kaluarën”, tha Kurti.

Kryeministri theksoi se zotimi i tyre si qeveri mbetet lufta ndaj korrupsionit dhe krimit të organizuar.

“Organizimi më i madh i krimit e ka burimin në vendet ku është bërë kompromis me lirinë e përcaktimit të një shteti dhe sovranitetin e tij. Sot jam krenar që, si kryeministër, të deklaroj se jemi në udhën e përcaktuar nga Epopeja dhe për katër vite qeverisje kemi ecur me ritmin e saj”, tha Kurti.

Mësohet se në të gjitha shkollat e Kosovës, ora e parë mësimore i është kushtuar Epopesë së lavdishme të Ushtrisë Çlirimtare të Kosovës, për të nderuar sakrificën dhe heroizmin e komandantit legjendar Adem Jashari, familjes së tij dhe të gjithë dëshmorëve të kombit, përcjell albinfo.ch.

Në shkollën fillore “Naim Frashëri” në Prishtinë, në orën e parë mësimore u zhvilluan aktivitete të ndryshme për nderë të Epopesë së Ushtrisë Çlirimtare të Kosovës. Drejtoresha e kësaj shkolle Merita Haxhiu Hasani tha se kjo shkollë ka filluar që nga sot me aktivitete të ndryshme dhe se këto aktivitete sipas saj do të vazhdojnë deri më 7 mars.

“Për nderë të Epopesë së UÇK-së, sikurse të gjitha institucionet edukative arsimore edhe shkolla jonë fillon me aktivitete të ndryshme që nga data e sotshme më 5 mars, pastaj vazhdon më 6 dhe 7 mars deri te përfundimi i natës së zjarreve. Nxënësit tonë janë të inkurajuar nga mësimdhënësit që të zhvillojnë aktivitete të ndryshme qoftë artistike, qoftë sportive, qoftë me ese të ndryshme, qoftë me dokumentar, qoftë me prezantime”, tha ajo.

Pajtim Hodolli mësimdhënës i Edukatës Qytetare në këtë shkollë tha se ora e parë po i kushtohet lavdisë së Epopesë së Ushtrisë Çlirimtare së Kosovës me aktivitete të ndryshme.

“Sot si në të gjithë Kosovën edhe shkolla jonë orën e parë po ja kushton mësimit të rreth lavidisë së Ushtrisë Çlirimtare të Kosovës, pra Epopesë së Ushtrisë Çlirimtare të datës 5, 6 dhe 7 mars, ku nxënësit së bashku me mësimdhënësit kanë bërë aktivitete të ndryshme, në mënyrë që ta përkujtojnë këtë datë historike për mbarë vendin”, tha ai.

Sot në të gjitha shkollat e Kosovës ora e parë e mësimit i është kushtuar Epopesë së lavdishme të UÇK-së ku janë zhvilluar diskutime dhe aktivitete të ndryshme për të shënuar një nga momentet më të rëndësishme të luftës për liri.

Është tërhequr nga agjenda e Komitetit për Politikë të Asamblesë Parlamentare të Këshillit të Evropës, aplikacioni i Kosovës për status të mysafirit special në Këshill të Evropës, ka thënë të mërkurën kryetarja e Parlamentit të Serbisë, Ana Bërnabiq, përcjell albinfo.ch.

Kërkesa e Kosovës ishte paraparë në agjendën e takimit të së mërkurës (5 mars), por u tërhoq në nisje të seancës.

Në Serbi e kanë cilësuar “lajm të jashtëzakonshëm”. Kryeparlamentarja Ana Bërnabiq ka thënë se tërheqja e kërkesës së Kosovës për këtë status “është fitore e rëndësishme”.

Mysafiri special ka kompetenca të kufizuara, sipas rregullores së Asamblesë Parlamentare. Mysafiri special mund të ulet në Asamblenë Parlamentare, por nuk ka të drejtë vote. Kanë të drejtë të mbajnë fjalim me leje të presidentit të Asamblesë.

Kosova i ishte afruar anëtarësimit në Këshill të Evropës vitin e shkuar, por aplikacioni u bllokua pas kërkesës për themelimin e Asociacionit të Komunave me Shumicë Serbe.

KOHA është duke provuar të kontaktojë me delegacionin e Kosovës që janë aktualisht në Paris. Posa të ketë përgjigje, artikulli do të përditësohet.

Komisioni Qendror i Zgjedhjeve (KQZ) është drejt përfundimit të numërimit të votave me kusht nga zgjedhjet parlamentare të 9 shkurtit në Kosovë.

Sipas përditësimit të fundit në ueb-faqen e KQZ-së të mërkurën në orët e hershme, janë numëruar 78.57 për qind e votave me kusht.

Lëvizja Vetëvendosje i ka fituar 40.21 për qind, apo 2.634 vota me kusht.

E dyta është Partia Demokratike e Kosovës me 18.11 për qind, apo 1.186 vota, pastaj vijnë Lidhja Demokratike e Kosovës me 13.54 për qind, apo 887 vota, Lista Serbe me 11.37 për qind, apo 745 vota, si dhe Aleanca për Ardhmeninë e Kosovës dhe Nisma me 6.21 për qind, apo 407 vota.

Numërimi i votave me kusht dhe i personave me aftësi të kufizuara nisi këtë të martë, në ditën kur përfundoi numërimi i votave me postë, dhe pritet të përfundojë sot, sipas zyrtarëve të KQZ-së.

Zyrtarë të KQZ-së kanë thënë se procesi i numërimit të votave pritet të përfundojë më 5 mars.

Me rezultatet e tanishme, që përfshijnë edhe votat në vendvotimet në Kosovë, ato në përfaqësitë diplomatike dhe me postë, asnjëra parti nuk ka siguruar numër të mjaftueshëm për të qeverisur e vetme.

Për të pasur shumicën, duhen së paku 61 deputetë në Kuvendin me 120 ulëse të Kosovës.

Si partia e parë, Vetëvendosje i ka aktualisht 48.

Udhëheqësi i saj, kryeministri Albin Kurti, është zotuar se do ta formojë qeverinë në mënyrë të pavarur.

Partitë aktualisht në opozitë, përveç Nismës, e kanë përjashtuar mundësinë e koalicionit me të.

Procesi i numërimit të votave është aktualisht në javën e katërt.

KQZ-ja pritet të bëjë certifikimin e rezultateve në mes të këtij muaji.

Analistët thonë se ka disa opsione të mundshme për formimin e qeverisë së re.

Sulmin e gjerë që e kishte ndërmarrë Serbia në Drenicë për të zhdukur Ushtrinë Çlirimtare të Kosovës e koncentroi në Prekaz, në zemrën dhe kokën e UÇK-së duke i bërë asaj një rrethim të hekurt.

Ajo që do të ndodhë në fillimet e marsit të vitit 1998 do të jetë një dëshmi e gjallë për botën e qytetëruar dhe përgjegjësit e saj politik e diplomatik. Në të vërtetë kjo ngjarje kaq e drejtpërdrejtë dhe kaq e fuqishme për nga përmasat e saj të flijimit unikat, të qëndresës e të masakrimit do ta ngrejë çështjen e Kosovës në krye të agjendës botërore. Kështu, në natën e 4 e 5 marsit të vitit 1998, Prekazi rrethohet nga forcat e shumta ushtarake dhe policore. Kjo lë të kuptohet se atje do të ketë rrethim të hekurt.

Pikërisht më 5 mars bëhen 27 vjet të rënies së komandantit legjendar, Adem Jasharit, familjes së tij dhe Jasharëve të tjerë. Mirëpo, çdo përvjetor Adem Jasharin e bënë më të lavdishëm në historinë e kombit tonë.

Me aktin e rënies së komandantit legjendar Adem Jasharit, familjes së tij dhe Jasharëve të tjerë, Kosova mundi frikën me çka i hapi shtigjet e lirisë dhe të ardhmërisë. Dhe jo rastësisht, në Prekaz, në Lagjen e Jasharëve është ngritur monumenti më i madh i luftës për liri, për pavarësi e demokraci, që këto ditë dhe data, e pikërisht 5,6,7 mars për çdo vit vëmendja e të gjithë kombit shqiptar kthehet nga Prekazi legjendar, që shekuj e vite i dha Kosovës shumë.

Që nga viti 1991 deri më 1998, Prekazi dhe Drenica ishin të rrethuar nga forcat paramilitare serbe. Synimi ishte vrasja e komandantit të Ushtrisë Çlirimtare të Kosovës, Adem Jashari dhe familjes së tij, për të shuar dhe shtypur rezistencën që familja Jashari me në krye Ademin e Hamzën po ia bënin regjimit të Sllobodan Millosheviqit.

Më 30 dhjetor të vitit 1991 kryhet sulmi i parë ndaj familjes Jashari. Ndërsa sulmin e dytë forcat paramilitare serbe e kryen në muajin janar, 1998. Më 22 janar forcat serbe sulmuan familjen Jashari, por edhe kësaj beteje, fëmijët dhe gratë e familjes Jashari i rezistuan. Megjithatë, në këtë betejë që zgjati afër 30 minuta, të plagosura mbeten Iliriana, vajza e Rifat Jasharit dhe Selvetja, vajza e Hamzë Jasharit. Pas këtij sulmi, familjes Jashari i erdhën miq, shok e bashkëkombës për t’u solidarizuar me ta. Ata i kërkuan kryefamiljarit Jashari që t’i tërheqin gratë dhe fëmijët nga aty. Por, edhe gratë dhe fëmijët kishin marr vendimin që të qëndrojnë, duke thënë se “po të vriten djemtë, nuk na vyen jeta të jetojmë”. Dhe vendosen të qëndrojnë, qëndruan për t’i treguar botës se shqiptarët nuk shkojnë askund përtej truallit dhe shtëpive të tyre.

Sulmi i tretë, që ndodhi më 5, 6 dhe 7 mars të vitit 1998, mori jetën e 55 njerëzve në fshatin Prekaz, 22 prej të cilëve ishin familjarë të ngushtë të Adem Jasharit. Këtij sulmi i mbijetoi vetëm Bashkimi, djali i Rifatit, i cili ia del që mes datës 5-6 mars të largohet nga rrethina dhe arrin t’i shpëtojë sulmit, si dhe Besarta, vajza e Hamzës, e cila pa dhe përjetoj tmerrin derisa vriteshin anëtarët e familjes së saj.

Historia e familjes Jashari dhe eksponatet e saj janë vendosur në Muzeun e Epopesë së Ushtrisë Çlirimtare të Kosovës.

Në 27-vjetorin e rënies heroike të komandantit legjendar Adem Jashari, familjes Jashari, dëshmorëve të kombit si dhe të gjithë të rënëve për liri, Qeveria e Kosovës më 5, 6 dhe 7 mars organizon manifestimin gjithëpopullor “Epopeja e Ushtrisë Çlirimtare të Kosovës”.

Kjo është agjenda:

08:00 Ora e parë mësimore në të gjitha shkollat e Republikës së Kosovës i kushtohet Epopesë së UÇK-së

10:00 Mbledhja solemne e Qeverisë së Republikës së Kosovës

10:00 Seanca solemne nga Kuvendet e Komunave të Republikës së Kosovës

Rreshtimi i kuadrateve të FSK-së në Kazermën “Adem Jashari” në Prishtinë, ora 12:00.

14:00 Turne në Futsall, palestra “Ilaz Kodra” në Skënderaj

14:30 Turne në Volejboll në Skënderaj.

E enjte, 6 mars

10:00 Krerët e shtetit homazhe në Kompleksin memorial “Adem Jashari” në Prekaz Homazhe nga komunat në të gjitha komplekset memoriale të dëshmorëve Parakalimi i motorklubeve në Skënderaj;

10:00 Homazhe nga komunat në të gjitha komplekset memoriale të dëshmorëve;

12:00 Parakalimi i motorklubeve në Skënderaj;

19:00 Akademi përkujtimore për Epopenë e UÇK-së në Prishtinë.

E premte, 7 mars

19:00 Ndezja e flakadanëve në shtatë rajone të Republikës së Kosovës;

19:00 Nata e zjarreve në Prekaz;

19:30 Programi artistik në Sheshin “Adem Jashari” në Skënderaj.