Para pak minutash, Prokuroria Themelore në Ferizaj ka bërë të ditur në një konferencë për media se, nga provat materiale të siguruara, shihet se polici Muhamed Lika u vra të martën në mbrëmje në Kaçanik nga dy persona, përcjell albinfo.ch.

Deri tani nuk ka të arrestuar e as të identifikuar si të dyshuar.

Sipas Prokurorisë, personat që kryen vrasjen kanë ikur nga vendi i ngjarjes në këmbë.

Po ashtu, sipas Prokurorisë, polici është qëlluar në shkallët e ndërtesës ku jetonte. Rasti ka ndodhur në mbrëmje, kur polici po kthehej nga puna.

Prokuroria ka thënë se po punohet për të gjetur motivet e kësaj vrasjeje të rëndë.

“Kemi marrë dëshmi që mund të japin informacione dhe që mund të shpijnë deri në zbardhjen e këtij rasti,” ka thënë Burim Çerkini, kryeprokuror i Prokurorisë Themelore në Ferizaj.

Bëhet e ditur se Gjykata e Prishtinës ka dënuar me 250 euro kryeministrin në detyrë, Albin Kurtin, për shkak se nuk ishte paraqitur në Prokurorinë Speciale (PSRK) për të dëshmuar lidhur me rastin e rezervave shtetërore, përcjell albinfo.ch.

Gjykata e Prishtinës, më 04.03.2025, kishte lëshuar urdhër ndaj Kurtit për t’u paraqitur në Prokurori dhe për të dëshmuar lidhur me këtë rast. Përkundër se kishte urdhër nga Gjykata, Kurti përsëri nuk ishte paraqitur. Në të njëjtën ditë, kryeministri kishte zgjedhur të shkonte në një vizitë pune në Gjilan, për të përuruar gurthemelin e një çerdheje.

Pas këtij veprimi të kryeministrit, Gjykata e Prishtinës, siç mëson kallxo.com, e ka dënuar atë me 250 euro.

Ndërkohë, për këtë dënim me gjobë, ankesë ka paraqitur Zyra e Kryeministrit, Albin Kurti, më 13.03.2025.

Pyetje lidhur me këtë rast i janë dërguar edhe zëdhënësit të Qeverisë, Përparim Kryeziu, më datë 01.04.2025, mirëpo i njëjti nuk ka kthyer përgjigje.

Ndonëse ishte thirrur për të dëshmuar tri herë nga Prokuroria – çka kishte rezultuar pa sukses për organin e akuzës dhe pa një zgjidhje për ta bindur kryeministrin Kurti të japë dëshmi për rastin e rezervave shtetërore në objektet e Prokurorisë Speciale – atëherë Prokuroria i ishte drejtuar Gjykatës.

Prokuroria kishte kërkuar nga Gjykata që të nxjerrë vendim për urdhërimin e dëshmitarit, Albin Kurti, që të paraqitet në objektet e Prokurorisë Speciale për të dhënë dëshmi lidhur me rastin e rezervave shtetërore. Kjo kërkesë e PSRK-së kishte ardhur pasi kryeministri i vendit, Albin Kurti, nuk iu kishte përgjigjur tri thirrjeve me radhë.

Presidentja e Kosovës, Vjosa Osmani, i ka propozuar të mërkurën sekretarit të Jashtëm të Mbretërisë së Bashkuar, David Lammy, lidhjen e një marrëveshjeje për mbrojtje dhe për ekonomi ndërmjet dy vendeve, përcjell albinfo.ch.

Lammy po qëndron për vizitë zyrtare në Kosovë, në kuadër të një turneu në Ballkanin Perëndimor, që, sipas Qeverisë së Mbretërisë së Bashkuar, ka për qëllim kyç forcimin e bashkëpunimit në luftimin e imigracionit të parregullt dhe krimit të rëndë të organizuar.

Osmani ka thënë, në një konferencë të përbashkët për media me Lammyn, se me kryediplomatin britanik ka diskutuar për “thellimin strategjik të bashkëpunimit” ndërmjet Kosovës dhe Mbretërisë së Bashkuar, i cili, sipas saj, “në veçanti do të mbulojë fushën e mbrojtjes dhe të ekonomisë”.

Presidentja kosovare ka bërë të ditur se ka diskutuar “gjerë e gjatë” me Lammyn, i cili ka mirëpritur idenë e një thellimi bashkëpunimi.

Osmani ka thënë se autoritetet e Kosovës janë të përkushtuara për të punuar me ato britanike për t’i dhënë formë marrëveshjes, që ajo të nënshkruhet sa më parë.

Ajo ka bërë, po ashtu, thirrje për prani edhe më aktive të Mbretërisë së Bashkuar në Kosovë.

Lammy ka thënë se Ballkani është rajon që ka rëndësi për Britaninë sot, ashtu siç kishte kur Tony Blair ishte kryeministër.

Ai ka shtuar se Britania “do të vazhdojë të luajë rolin e mikes dhe partneres kyç” të Kosovës.

Kryediplomati britanik ka thënë se vendi i tij dëshiron një “normalizim të qëndrueshëm e paqësor” ndërmjet Kosovës dhe Serbisë, teksa ka bërë thirrje që autoritetet e Kosovës të angazhohen me plot energji në dialogun me Serbinë, të ndërmjetësuar nga Bashkimi Evropian.

Osmani ka thënë se “Kosova mbetet një palë konstruktive, e përkushtuar për paqe dhe stabilitet, pavarësisht se vazhdimisht përballemi me obstruksione dhe provokime nga ana e Serbisë, përfshirë edhe sulmet e njëpasnjëshme që kanë filluar vite më herët dhe po vazhdojnë edhe tani, për ç’gjë dua ta përmend sërish se është e domosdoshme që të ketë llogaridhënie dhe vënie të autorëve para përgjegjësisë nga ana e Serbisë”.

“Por, fatkeqësisht po e shohim se nuk ka asnjë lëvizje në këtë drejtim, as sa i përket aktit të agresionit të shtatorit 2023, as sa i përket sulmit ndaj 93 ushtarëve të NATO-s, që ka ndodhur edhe më herët, po as edhe veprimeve të fundit terroriste që kanë ndodhur në veri të vendit”, është shprehur ajo.

Lammy ka thënë se Britania është kontribuuese e rëndësishme në misionin paqeruajtës të Organizatës së Traktatit të Atlantikut Verior (NATO) në Kosovë, KFOR, i cili, sipas tij, është “absolutisht vendimtar” për sigurinë e Kosovës.

Kurti i flet Lammyt për Radoiçiqin

Të martën mbrëma, kryediplomati britanik u prit në Prishtinë nga kryeministri në detyrë i Kosovës, Albin Kurti, dhe ministrat e Qeverisë së tij.

Kurti ka biseduar me Lammyn, ndër të tjera, rreth situatës aktuale në rajon dhe asaj gjeopolitike në Evropë, si dhe për çështjet e sigurisë, ka bërë të ditur Zyra e Kryeministrit.

Kreu në detyrë i ekzekutivit kosovar “theksoi faktin që ende nuk ka drejtësi dhe llogaridhënie për sulmin terrorist në Banjskë, teksa Millan Radoiçiq endet i lirë dhe i mbrojtur nga aparati shtetëror serb”, thuhet në komunikatën e Kryeministrisë.

Në shtator të vitit të kaluar, Prokuroria Speciale e Kosovës ngriti aktakuzë ndaj 45 personave – në mesin e tyre edhe Millan Radoiçiq – për sulmin e armatosur ndaj Policisë së Kosovës në Banjskë më 24 shtator të vitit 2023, kur kishte mbetur i vrarë rreshteri Afrim Bunjaku.

Autoritetet në Serbi nuk pranojnë ta ekstradojnë Radoiçiqin në Kosovë dhe thonë se ai do të gjykohet nga “gjykatat serbe”, ndërsa zyrtarët në Kosovë thonë se ato i kanë ofruar mbrojtje atij.

Kurti ka shtuar se Radoiçiq “duhet të ekstradohet në Kosovë ku do të ballafaqohej me një gjykim të drejtë për veprat e tij”.

Më herët, Ministria e Punëve të Jashtme dhe Diasporës e Kosovës ka vlerësuar vizitën e Lammyt në vend, duke thënë se ajo “thekson angazhimin e përbashkët për forcimin e lidhjeve mes dy shteteve dhe avancimin e paqes e stabilitetit në rajon dhe më gjerë”.

Homologia kosovare e Lammyt, Donika Gërvalla-Schwarz, e ka informuar sekretarin e Jashtëm britanik për, siç është thënë në një komunikatë të MPJD-së, “sfidat e sigurisë në Ballkan, përfshirë veprimet destabilizuese të Serbisë dhe ndikimin rus, të cilat vazhdojnë të rrezikojnë stabilitetin rajonal”.

MPJD është shprehur më tej se “partneriteti mes Kosovës dhe Mbretërisë së Bashkuar do të vazhdojë të forcohet dhe të thellohet, me fokus në përmirësimin e bashkëpunimit në fushat e sigurisë, ekonomisë dhe politikës ndërkombëtare”.

I pranishëm në takimin e Lammyt me kabinetin qeverisës të Kosovës mori pjesë edhe ambasadori britanik në Kosovë, Jonathan Hargreaves, i cili ka thënë se miqësia mes Kosovës dhe Britanisë është e kamotshme dhe e fortë.

Kryeministri i Kosovës, Albin Kurti ka nisur diskutimet për formimin e qeverisë me partitë politike nga pakicat.Gjatë të mërkurës, Kurti takoi kryetaren e Partisë së Re Demokratike, Emilija Rexhepi, e pas saj edhe kryetarin e Partisë për Liri, Drejtësi dhe Mbijetesë, Nenad Rashiq, përcjell albinfo.ch.

Kështu u bë e ditur në njoftimin për media nga Zyra e Kryeministrit.“Kryeministri i Republikës së Kosovës, Albin Kurti, vijoi takimet me partitë politike të pakicave, në kuadër të konsultimeve për formimin e qeverisë së re. Ai mirëpriti ministrin për Komunitete dhe Kthim dhe kryetarin e Partisë për Liri, Drejtësi dhe Mbijetesë, Nenad Rashiq. Përgjatë diskutimit, ministri Rashiq e përsëriti mbështetjen e tij ndaj kryeministrit Kurti për formimin e qeverisë së re dhe vazhdimit të bashkëpunimit të frytshëm edhe në mandatin e ardhshëm”, thuhet në njoftim.

Kurti e falënderoi kryetarin Rashiq për punën e madhe dhe kontributin e dalluar që ka dhënë për komunitetin serb në Kosovë për vetëm gjysmë mandati si ministër për Komunitete dhe Kthim.“Ai shprehu gjithashtu vullnetin për vijimin e bashkëpunimit efikas dhe të frytshëm edhe në katër vjeçarin e ardhshëm për të arritur së bashku suksese të tjera dhe punë të mbara në shërbim të të gjithë qytetarëve, pa dallim”, thuhet në njoftim.

Sekretari i Jashtëm britanik, David Lammy, në një konferencë të përbashkët për media me presidenten Vjosa Osmani, ka thënë se shpreson që Kosova do të formojë së shpejti qeverinë e re, pasi, sipas tij, kjo është esenciale në një kohë të vështirë që po mbizotëron në botë, përcjell albinfo.ch.

“Keni bërë progres edhe në zgjedhjet e shkurtit, dhe shpresoj që këtu në Kosovë, së shpejti do të formohet qeveria e re, e cila është esenciale në këto kohë të vështira”, tha Lammy.

Ai po ashtu shtoi se Kosova ka bërë progres pozitiv si shtet i ri, ndërsa theksoi se ky progres duhet të vazhdojë.

“Është e qartë që, kur vjen në Kosovë, sheh progresin që ka bërë – një shtet kaq i ri dhe dinamik. Ky është një progres që duhet të vazhdojmë ta ndërtojmë, në këtë kohë sfidash në globin tonë,” u shpreh ai.

Kujtojmë se më datë 23 mars, në Vushtrri vdiq një 19-vjeçar. Dorasi dyshohet të jetë një bashkëmoshatar i tij. Ai është në paraburgim dhe e ka pranuar fajësinë.

Pas një dite, po në këtë qytet ndodhi një vrasje e dyfishtë. Një burrë dyshohet se vrau një grua dhe më pas i dha fund jetës së vet. Ky rast ndodhi në fshatin Stanoc, përcjell albinfo.ch.

Ndërkohë, më 26 mars, një person rreth të 60-ave vdiq në Prishtinë pas plagëve të marra nga të shtënat që ndodhën në rrugën “Rrustem Hyseni”. I dyshuari është ende në arrati, sipas njoftimeve zyrtare të deritashme. Në këtë rast u plagos edhe një person tjetër, i cili, sipas mjekëve, është në gjendje stabile. I plagosuri besohet të ketë qenë shënjestra e sulmit, ndërsa personi që vdiq dyshohet se nuk kishte lidhje me ngjarjen.

Më 1 prill, e martë, në orët e mbrëmjes, një pjesëtar i Policisë së Kosovës u vra para banesës së tij në Kaçanik. Policia ka njoftuar se rasti është në hetim.

Para pak minutash ka nisur takimi i presidents Vjosa Osmani me Sekretarin e Jashtëm të Mbretërisë së Bashkuar, David Lammy.

Vlen të theksohet se takimi po zhvillohet në Presidencë.

Vizitën e sekretarit të Jashtëm të Mbretërisë së Bashkuar, David Lammy, presidentja e Kosovës, Vjosa Osmani, e ka cilësuar dëshmi të marrëdhënieve të shkëlqyera mes dy vendeve.

Ajo ka thënë të mërkurën para mediave se aleanca mes Mbretërisë së Bashkuar dhe Kosovës është ndërtuar në vlera të përbashkëta të demokracisë, lirisë e paqes, duke shtuar se përkushtimi i Britanisë së Madhe ka qenë i jashtëzakonshëm dhe i pandërprerë.

Osmani njoftoi se kanë arritur thellim të raporteve në çështje të sigurisë me Britaninë e Madhe, teksa shtoi se ka ende hapësirë për fuqizim të aleancës dhe të prezencës së Mbretërisë së Bashkuar në Kosovë.

“Lidhja e marrëveshjes për bashkëpunim strategjik mes dy vendeve që në veçanti do të mbulojë fushën e mbrojtjes dhe të ekonomisë. Pra, sot kemi diskutuar për thellim të bashkëpunimit strategjik në këto fusha që do të vazhdojnë më pas me ekipet tona. Jemi të përkushtuar të konkretizojmë këtë marrëveshje. Ka hapësirë për fuqizim të mëtejshëm të aleancës dhe të prezencës së Mbretërisë së Bashkuar në Kosovë”, ka thënë Osmani.

Presidentja e Kosovës shtoi se kanë diskutuar edhe mbi çështjen e dialogut me Serbinë, duke thënë se pala kosovare mbetet e përkushtuar dhe konstruktive për paqe e stabilitetit, “pavarësisht se përballemi me sulme që kanë nisur vite me herët dhe që po vazhdojnë edhe tani”.

Osmani tha se përkrahja e Mbretërisë së Bashkuara për Kosovën është historike.

Një polic është vrarë mbrëmë në Kaçanik. Ai u gjet i plagosur rëndë në hyrje të ndërtesës së tij.

Polici M. L. më pas u transportua në Qendrën e Mjekësisë në Kaçanik, por nuk arriti t’i mbijetonte plagëve, përcjell albinfo.ch.

Zëdhënësi i Policisë për rajonin e Ferizajt, Kanun Veseli, tha se rasti ka ndodhur rreth orës 23:00.

Rrethanat tjera të vdekjes janë ende të paqarta.

“Më 01.04.2025, rreth orës 23:00, kemi pranuar një informacion se një person është plagosur dhe gjendet në gjendje të rëndë në hyrje të ndërtesës së tij, në rrugën ‘Idriz Seferi’ në Kaçanik. Viktima është një pjesëtar i Policisë së Kosovës. Në vendngjarje, përveç njësive policore, ka dalë edhe ekipi i emergjencës së Kaçanikut, të cilët e kanë transportuar në Qendrën e Mjekësisë në Kaçanik. Si pasojë e plagëve të marra, pjesëtari i Policisë ka ndërruar jetë, gjë që është konstatuar nga mjekët në këtë qendër,” ka deklaruar Veseli.

Ai tha se për të gjitha veprimet policore është njoftuar prokurori i shtetit dhe IPK-ja.

“Hetuesit dhe krimteknikët rajonalë kanë dalë në vendin e ngjarjes për të kryer ekzaminimet e nevojshme. Nuk dihen ende shkaqet se si ka ardhur deri te kjo ngjarje. Për informacione të tjera do të njoftoheni me kohë,” ka deklaruar Veseli.