Në një reagim, Këshilli i Marrëdhënieve Shqiptaro-Amerikane (AARC) dhe Oda Ekonomike Amerikane në Kosovë shprehin shqetësimin e tyre të thellë lidhur me vonesat e vazhdueshme në konstituimin e Kuvendit dhe formimin e një qeverie të re pas zgjedhjeve të 9 shkurtit, përcjell albinfo.ch.

Në reagimin e tyre thuhet se, në një kohë kur Kosova përballet me sfida dhe mundësi kritike – si brenda ashtu edhe jashtë vendit – një stagnim i tillë institucional minon stabilitetin demokratik, zhvillimin ekonomik dhe besueshmërinë e vendit në skenën globale.

“AARC dhe Oda Amerikane u bëjnë thirrje liderëve politikë të Kosovës që të veprojnë me urgjencë dhe përgjegjësi për të krijuar institucione plotësisht funksionale. Vakuumi i zgjatur në qeverisje dërgon sinjale shqetësuese për aleatët ndërkombëtarë dhe dobëson pozitën e Kosovës në zhvillimet jetike gjeopolitike. Këto vonesa rrezikojnë t’i largojnë më tej përkrahësit e shtetësisë së Kosovës, ndërkohë që inkurajojnë kundërshtarët e saj,” thuhet në reagimin e tyre.

Tutje, theksohet se Kosova nuk mund t’ia lejojë vetes luksin e bllokadave të brendshme politike.

“Asnjë kalkulim politik nuk e arsyeton ngërçin e vazhdueshëm. Qytetarët e kanë shprehur qartazi vullnetin e tyre dhe ai mandat duhet të respektohet përmes veprimit të menjëhershëm institucional. Stabiliteti, sundimi i ligjit dhe vizioni për një të ardhme më të mirë duhet të jenë prioritetet që tejkalojnë ndarjet politike,” theksohet mes tjerash në komunikatë.

Më tej thuhet: “Ne u bëjmë thirrje të gjitha partive politike që të lënë mënjanë dallimet e tyre dhe të përqendrohen në interesin e përbashkët kombëtar – ndërtimin e një partneriteti më të fortë strategjik me Shtetet e Bashkuara, sigurimin e rritjes ekonomike, krijimin e vendeve të punës dhe tërheqjen e investimeve amerikane dhe të tjera të huaja. Popullsia e re e Kosovës, pozicioni strategjik dhe shpirti ndërmarrës ofrojnë një mundësi të veçantë për kompanitë dhe investitorët amerikanë. Sidoqoftë, ky potencial mund të realizohet vetëm me qeverisje të qëndrueshme, transparente dhe efektive.”

“Për të zhbllokuar këtë potencial, Oda Amerikane dhe AARC bëjnë thirrje për krijimin e një Partneriteti Ekonomik Strategjik ndërmjet Kosovës dhe Shteteve të Bashkuara. Kjo kornizë formale duhet të përmirësojë bashkëpunimin dypalësh në sektorë kyç, duke përfshirë lehtësimin e investimeve, zhvillimin e eksportit, tranzicionin e energjisë, transformimin digjital dhe inovacionin. I rrënjosur në vlerat e përbashkëta demokratike, një partneritet i tillë do të nxiste investimet amerikane, do të thellonte lidhjet industriale dhe do të ndihmonte në integrimin e Kosovës në zinxhirët e vlerës globale.”

Gjithashtu, pohohet se të dyja organizatat theksojnë rëndësinë e adresimit të shpejtë të vendimeve kyçe të politikave, duke përfshirë heqjen e tarifave doganore për mallrat amerikane – veprim ky i mbështetur tashmë edhe nga Presidentja e Republikës së Kosovës.

“Heqja e këtyre barrierave do të demonstronte përkushtimin e Kosovës për një mjedis të drejtë dhe të hapur ekonomik.”

Përveç kësaj, Oda Amerikane dhe AARC theksojnë potencialin e jashtëzakonshëm të diasporës së Kosovës si një katalizator për investime, inovacion dhe lidhje ndërkombëtare.

“Me burimet e tyre financiare, ekspertizën globale dhe rrjetet me shtrirje të gjerë, komuniteti i diasporës është partner kritik në zhvillimin e Kosovës. Ne u bëjmë thirrje institucioneve qeveritare dhe misioneve diplomatike që të angazhojnë diasporën në mënyrë proaktive, përmes programeve të targetuara dhe mekanizmave joburokratikë të investimeve.

Në këtë frymë, Këshilli i Marrëdhënieve Shqiptaro-Amerikane dhe Oda Ekonomike Amerikane në Kosovë rikonfirmojnë përkushtimin e tyre për të mbështetur proceset demokratike dhe avancimin ekonomik të Kosovës. Ne jemi të gatshëm të ndihmojmë në nxitjen e unitetit, ndërtimin e kapaciteteve institucionale dhe forcimin e pozitës së Kosovës në skenën ndërkombëtare. Koha për lidership të vendosur është tani. E ardhmja e Kosovës varet nga ai.”

Mësohet se Lidhja Demokratike e Kosovës do të bëjë kallëzim penal ndaj Albin Kurtit si kryeministër në detyrë dhe deputetëve të Vetëvendosjes që kanë ushtruar pozita të ministrave, ka thënë deputetja e LDK-së, Hykmete Bajrami. Kjo, siç ka thënë ajo, për shkak se ata kanë ushtruar mandatin për një periudhë që nuk është e lejuar, përcjell albinfo.ch.

Deputetja Hykmete Bajrami ka thënë se në vazhdim do t’i shqyrtojnë mundësitë për në Gjykatën Kushtetuese.

“Komisioni për verifikim i ka njohur si faktike dorëheqjet deklarative të kryeministrit dhe ministrave, që nënkupton se nga 27 marsi, kur është bërë certifikimi i zgjedhjeve, të gjithë kanë bërë shkelje duke ushtruar funksionin e kryeministrit dhe ministrave. LDK-ja do të bëjë kallëzim penal lidhur me ushtrimin e mandatit që këta e kanë bërë nga 27 marsi deri sot. Ne nuk kemi ndryshuar qëndrim. Fillimisht do të bëjmë kallëzim penal, e më pas do të shohim hapat për në Kushtetuese,” ka thënë ajo.

Bajrami ka shtuar se LDK-ja nuk ka votë për kandidatët që i propozon LVV-ja për kryeparlamentar.

Albulena Haxhiu, e propozuara për kryetare të Kuvendit nga radhët e Lëvizjes Vetëvendosje, nuk i ka marrë votat e nevojshme për t’u zgjedhur, as në herën e dytë, përcjell albinfo.ch.

Kështu, kryesuesi i seancës, Avni Dehari, e ndërpreu seancën, duke thënë se ajo do të vazhdojë pas 48 orësh.

Dehari bëri të ditur se Kuvendi punimet do t’i vazhdojë të hënën nga ora 15:00.

Ndërkaq, sot Haxhiu mori 57 vota, 19 kundër dhe tre deputetë abstenuan.

Kryetari i AAK-së, Ramush Haradinaj, ka deklaruar se sot ekziston një dakordim mes partive opozitare për të votuar raportin për konstituimin e Kuvendit, përcjell albinfo.ch.

Në një deklaratë për media, ai tha se pas kalimit të raportit, është i gatshëm të mbështesë emrat e propozuar nga VV-ja, Saranda Bogujevci dhe Shqipe Selimi, nëse ato do të jenë kandidate për këtë post.

Lëvizja Vetëvendosje ka propozuar për herë të dytë Albulena Haxhiun për kryetare të Kuvendit të Kosovës, përcjell albinfo.ch.

Deputeti i LVV-së, Glauk Konjufca ka kërkuar nga deputetët në sallë që të votojnë këtë propozim në mënyrë që të mos bllokohet Kuvendi.

“Ju kisha lutë si kolegë ta mbështetin se vetëm kështu nuk bëheni pjesë e bllokimit të kuvendit të Kosovës”, tha Konjufca.

Haxhiu me 57 vota pro, 11 kundër dhe 3 abstenime nuk arriti t’i sigurojë votat e mjaftueshme për të bërë kryetare e Kuvendit.

Kryesuesi i seancës konstituive, Avni Dehari tha se seanca mbyllet për sot ( e shtune), dhe do të vazhdojë të hënën nga ora 15:00.

Deputeti i VV-së, Albin Kurti, ka reaguar ashpër pas përfundimit të mandatit të Shkëlqim Devollit si Konsull Nderi në Malin e Zi, përcjell albinfo.ch.

Ai, në dokumentet e tij, kishte mohuar shtetësinë e Republikës së Kosovës duke e identifikuar qytetin e Pejës si pjesë të Serbisë.

“Nuk mund ta përfaqësojnë Republikën ata që e mohojnë atë. Peja është në Kosovë, kurrë në Serbi”, ka shkruar Kurti.

Deputetët e zgjedhur të legjislaturës së re kanë bërë sot betimin në seancën konstituive të Kuvendit të Kosovës, përcjell albinfo.ch.

Deputetët u ngritën të gjithë në këmbë për të lexuar tekstin e betimit.

Teksti i deklaratës së betimit:

“Unë, deputet i Kuvendit të Republikës së Kosovës, betohem se me nder e me përkushtim do ta kryej detyrën time dhe do ta përfaqësoj me dinjitet popullin, do të punoj në interes të Kosovës dhe të gjithë shtetasve të saj, do të angazhohem për mbrojtjen dhe për respektimin e kushtetutshmërisë dhe të ligjshmërisë, për mbrojtjen e sovranitetit, tërësisë territoriale dhe të integritetit institucional të Kosovës, për garantimin e lirive dhe të drejtave të njeriut, në përputhje me ligjet e vendit. Betohem!”

Sot, zëvendëskryeministrja Donika Gërvalla ka njoftuar se ka marrë vendim që Shkëlqim Devollit t’i përfundojë mandati si Konsull Nderi i Kosovës në Mal të Zi, përcjell albinfo.ch.

Gërvalla e quajti këtë më shumë sesa një akt administrativ, teksa aludon se Devolli ka mohuar shtetësinë e Kosovës.

“Zero tolerancë ndaj mohuesve të Republikës së Kosovës. Kushdo që mohon shtetësinë e Kosovës, nuk mund të jetë përfaqësues i Kosovës. Kushdo që lëkund të vërtetën tonë shtetërore, do ta gjejë Republikën tonë të vendosur dhe të përgatitur ndaj veprimeve të tyre.”

Dje ka marrë fund mandati i z. Shkëlqim Devolli si Konsull Nderi i Republikës së Kosovës në Mal të Zi për rrethin konsullor të Rozhajës. Ky vendim i marrë në momentin që jam informuar për këtë rast është i pakthyeshëm. Qëllimi është i qartë: mbrojtja e dinjitetit të Republikës së Kosovës nga çdo përpjekje për mohimin e saj.

Individët që marrin tituj nderi me dokumente ku mohohet Republika e Kosovës, mohojnë gjakun e derdhur për liri, mohojnë ekzistencën tonë, mohojnë Republikën tonë.

Po flasim për të njëjtët që, ndërsa përfitojnë nga Kosova, regjistrojnë biznese me adresa serbe, përhapin propagandë kundër udhëheqjes shtetërore dhe investojnë miliona për të njollosur imazhin e Kosovës në opinionin publik,” shkroi ajo krahas vendimit.

Gërvalla ka thënë se kushdo që mohon shtetësinë e Kosovës, nuk do të jetë përfaqësues i saj.

“Ky vendim është më shumë se një akt administrativ, është një betim institucional që Kosova nuk do të përfaqësohet kurrë nga ata që i shërbejnë narrativave të shteteve që nuk e njohin pavarësinë tonë.

Kushdo që mohon shtetësinë e Kosovës, nuk mund të jetë përfaqësues i Kosovës. Kushdo që lëkund të vërtetën tonë shtetërore, do ta gjejë Republikën tonë të vendosur dhe të përgatitur ndaj veprimeve të tyre,” shkroi ajo.

Mësohet se përfaqësuesit e grupit “Asnjë Cent më Shumë” dhe qytetarë kanë protestuar sot kundër rritjes së tarifës së energjisë elektrike, përcjell albinfo.ch.

Kjo protestë u mbajt si përgjigje e drejtpërdrejtë ndaj vendimit të Zyrës së Rregullatorit për Energji (ZRRE), të cilin e kanë cilësuar si “të padrejtë dhe jo legjitim”.

Qytetarët në këtë protestë mbanin pankarta si: “Asnjë cent ma shumë”, “Shkarkim, jo shtrenjtim”, “Shkarkojeni bordin”, “ZRRE nuk na përfaqëson”, “Nuk paguajmë për dështime tuaja”.

Ndryshe, është thënë se, nëse nuk ka reflektim, do të detyrohen ta masivizojnë protestën.

Me 120 vota për, Kuvendi i Kosovës ka miratuar raportin për verifikimin e mandateve të deputetëve gjatë seancës së tretë konstituive, përcjell albinfo.ch.

Ky dakordim erdhi pas një takimi ndërpartiak të zhvilluar sot në orën 11:30, ku krerët e partive politike arritën një marrëveshje të përbashkët.

Ministrja Albulena Haxhiu deklaroi se gjatë këtij takimi është arritur pajtim unanim për krijimin e një Komisioni të ri, i cili do të kishte mandat të shqyrtojë edhe një herë raportin e marrë nga Komisioni Qendror i Zgjedhjeve (KQZ) dhe ta procedojë atë për miratim në Kuvend.

“Sot, në seancë kemi theksuar që Komisioni i ri, me autorizim të Kuvendit, të mblidhet edhe një herë për të shqyrtuar raportin nga KQZ-ja dhe për ta sjellë për votim. Është arritur pajtimi që raporti të votohet unanimisht nga të gjitha partitë politike,” tha Haxhiu.

Ky hap shënon një moment të rëndësishëm drejt konstituimit të plotë të legjislaturës së re të Kuvendit të Kosovës.

Në një deklaratë për media, ministri i Bujqësisë në detyrë, Faton Peci, ka thënë se propozimi i dhënë nga kreu i PDK-së, Memli Krasniqi, që në qershor të organizohen zgjedhjet e jashtëzakonshme, nuk duhet hedhur poshtë, përcjell albinfo.ch.

Ai tha se 15 qershori mund të jetë njëra prej datave të përshtatshme për zgjedhje të reja, teksa shtoi se nuk mund të votojnë për mandatet e deputetëve të tjerë.

“Meqenëse PDK-ja ka dalë me propozime konkrete, e pashë që kryetari i kësaj partie ka deklaruar që data 15 qershor mund të jetë njëra prej datave të përshtatshme për zgjedhje të reja. Unë mendoj që nuk është propozim i keq.

S’po them që e përkrah, por s’është propozim që duhet me hedhur poshtë. Bile, ka bërë mirë që nuk ka bërë një propozim të mëhershëm, posaçërisht me atë pjesën që ndërlidhet me datën 12 qershor, për shkak se është Dita e Çlirimit.

Ta festojmë këtë festë, dhe është mundësia që edhe data 15 qershor të jetë një datë që potencialisht – ose një datë tjetër – e mbajtjes së zgjedhjeve të reja”, tha Peci në Tëvë1.

Ai thotë se nuk po bëjnë kalkulim me opsionin e zgjedhjeve, por që sipas tij është legale dhe Kushtetuta e Kosovës e lejon edhe shkuarjen në zgjedhje të reja.

Presidentja e Kosovës, Vjosa Osmani, në një intervistë është shprehur se Serbia është burimi i vetëm i destabilizimit në rajon, përcjell albinfo.ch.

Osmani ka thënë se me veprime agresive e akte terroriste, Serbia po tenton të rikthejë Ballkanin në të kaluarën. Megjithatë, ajo ka theksuar se Kosova do të mbrojë veten dhe do të kundërshtojë tendencat hegjemoniste që vijnë nga Beogradi.

“Serbia e ka sulmuar Kosovën përmes akteve të agresionit dhe akteve të terrorizmit. Serbia është përpjekur ta shkatërrojë Bosnje e Hercegovinën nga brenda duke e destabilizuar. Serbia shkakton probleme ndaj Kroacisë dhe vendeve të tjera në rajon. Pra, është shumë e qartë për të gjithë ne në Ballkanin Perëndimor se kush është burimi i vetëm i destabilitetit – dhe ajo është Serbia”, ka thënë Osmani.

Ajo ka shtuar se Kosova do të mbrojë interesat e saj dhe do të vazhdojë të punojë me partnerët e NATO-s për të siguruar paqen dhe stabilitetin rajonal dhe global.

“Natyrisht, ne do të mbrohemi nga të gjitha këto ide hegjemoniste, imperialiste që ka udhëheqja e Serbisë, të cilat synojnë të na kthejnë në vitet ’90, për të na kthyer në të kaluarën. Ne duhet të shikojmë drejt së ardhmes. Dhe e ardhmja mund të jetë paqësore dhe e qëndrueshme vetëm nëse mund të mbrohemi nga agresorë si Serbia, të cilët sjellin gjithashtu në rajonin tonë ndikimet e këqija të Rusisë, Kinës dhe Iranit”, ka thënë ajo.

Presidentja e Kosovës ka thënë gjithashtu se Kosova dhe vendet e tjera të rajonit janë të harmonizuara me politikat e jashtme të Bashkimit Evropian dhe po punojnë ngushtë me partnerët e NATO-s për të kontribuar në paqen dhe stabilitetin rajonal dhe global.

Tek ka folur për marrëveshjen ushtarake me Shqipërinë dhe Kroacinë, Osmani ka thënë se ky ka qenë hap i natyrshëm për forcimin e kapaciteteve mbrojtëse të Kosovës. Presidentja ka thënë se bashkëpunimi është në përputhje me standardet e NATO-s, teksa ka shtuar se po zhvillohen biseda edhe me shtete të tjera për ta zgjeruar bashkëpunimin. /TRT Ballkan