Archives

Franca ndalon duhanin në plazhe, parqe e afërsi të shkollave

Posted on by Drin Reçica

Bëhet e ditur se Franca do të ndalojë pirjen e duhanit në të gjitha vendet publike të hapura ku mund të jenë të pranishëm fëmijët, duke përfshirë plazhet, parqet, kopshtet publike, stacionet e autobusëve, hapësirat pranë shkollave dhe mjediset sportive, përcjell albinfo.ch.

Lajmi u bë i ditur të enjten nga ministrja e Shëndetësisë dhe e Familjes, Catherine Vautrin, e cila theksoi se ndalimi hyn në fuqi më 1 korrik.

“Duhani duhet të zhduket aty ku ka fëmijë,” u shpreh Vautrin në një intervistë për gazetën Ouest-France. Ajo shtoi se “liria për të pirë duhan ndalet aty ku fillon e drejta e fëmijëve për të thithur ajër të pastër.”

Ndalimi do të zbatohet edhe para shkollave, për të ndaluar nxënësit që të pinë duhan në ato hapësira. Shkelësit do të përballen me gjoba deri në 135 euro.

Megjithatë, ndalimi nuk do të zbatohet në tarracat e kafeneve franceze, një simbol i kulturës vendase. Po ashtu, cigaret elektronike nuk përfshihen në këtë masë.

Franca ka ndërmarrë hapa të vazhdueshëm për të reduktuar përdorimin e duhanit në hapësira publike, por mbetet ndër vendet me përqindjen më të lartë të duhanpirësve në Evropë, rreth 35 për qind e popullsisë, krahasuar me 25 për qind mesatarja evropiane dhe 21 për qind globalisht, sipas të dhënave të OBSH-së.

Çdo vit, rreth 75,000 francezë humbin jetën nga ndërlikimet që lidhen me duhanin. Programi Kombëtar Kundër Duhanit për periudhën 2023-2027 synon të arrijë një brez pa duhan deri në vitin 2032.

Sipas një sondazhi të fundit, 62 për qind e qytetarëve mbështesin ndalimin e pirjes së duhanit në hapësirat publike. Ndërkohë, mbi 1,500 qytete dhe fshatra në Francë kanë vendosur tashmë ndalime lokale të duhanit.

10 të arrestuar në Tiranë për trafikim të armëve nga Kosova në Shqipëri

Posted on by Drin Reçica

Së fundmi, policia e Shqipërisë ka njoftuar se ka arrestuar 10 persona dhe 2 të tjerë i ka shpallur në kërkim, pasi dyshohen për trafikim të armëve nga Kosova në Shqipëri, përcjell albinfo.ch.

Thuhet se operacioni policor i koduar si “Puzzle”, sipas njoftimit është zhvilluar pas një hetimi 5-mujor.

“Në kuadër të operacionit bazuar në informacionet e siguruara nga hetimi për disa shtetas që dyshohej se trafikonin armë zjarri, kryesisht nga Kosova në Tiranë, me qëllim shitjen, janë vënë në pranga shtetasit: E. T., 32 vjeç, L. H., 21 vjeç, F. B., 26 vjeç, R. H., 21 vjeç, V. M., 23 vjeç, K. F., 18 vjeç, G. M., 22 vjeç dhe A. Sh., 23 vjeç. Gjithashtu, u shpallën në kërkim shtetasit R. K., 41 vjeç dhe A. N., 24 vjeç”, thuhet në njoftim. 

Nga hetimet thuhet se dyshohet që këta persona, pasi siguronin armë zjarri kryesisht në Kosovë por dhe në qytete të ndryshme të Shqipërisë, i dërgonin ato në Tiranë, për t’i shitur. 

“Gjatë periudhës hetimore, në kuadër të këtij procedimi, më datë 01.04.2025, janë ndaluar shtetasit A. P dhe K. P., pasi u kapën në flagrancë me 2 armë zjarri, të dyshuara të trafikuara nga Kosova, me qëllim shitjen në Tiranë. Në vijim të veprimeve, gjatë kontrollit të banesës së shtetasit K. F, shërbimet e Policisë gjetën e sekuestruan 2077 fara kanabisi”, thuhet në njoftim. 

Gjatë operacionit thuhet se janë sekuestruar 14 armë zjarri (12 pistoleta, njëra prej tyre me silenciator, dhe 2 automatikë), 2077 fara cannabisi, municion luftarak, 3 automjete dhe 8 celularë.

Bebe Rexha thyen rekord në Billboard, shpallet kënga më e dëgjuar ‘country’ e shekullit 21

Posted on by Drin Reçica

Bëhet fjalë për artisten shqiptare me famë botërore, Bebe Rexha, ka shënuar një tjetër sukses të madh në karrierën e saj ndërkombëtare. Këngëtarja nga Dibra, e cila ka pushtuar skenat më të mëdha të muzikës në botë, ka ndarë së fundmi me ndjekësit e saj në Instagram një arritje historike, përcjell albinfo.ch.

Së fundmi, Billboard ka publikuar në rrjetin social Instagram listën e 100 këngëve më të dëgjuara në historinë e muzikës country në shekullin 21  dhe në krye të kësaj liste renditet pikërisht kënga e Bebe Rexhës, “Meant To Be”.

“Grafikët country të shekullit 21. Hidhni një sy listës së Billboard për këngët më të mira country të shekullit 21 në @billboardcharts, bazuar në 25 vitet e para të këtij shekulli. Renditja me 100 pozicione është përpiluar sipas performancës në tabelën javore Top Country Songs, nga fillimi i vitit 2000 deri në fund të vitit 2024. Lëvizni fotot për të parë renditjen e plotë dhe klikoni linkun në bio për më shumë detaje” – shkruhet në njoftimin zyrtar të Billboard, të cilin Bebe Rexha e ka rishpërndarë me krenari në llogarinë e saj.

Aksident në Itali, humb jetën 39-vjeçari shqiptar

Posted on by Drin Reçica

Një 39-vjeçar shqiptar ka humbur jetën si pasojë e një aksidenti të ndodhur në zonën e Corotona-s në Itali, përcjell albinfo.ch.

Referuar  mediave italiane, ai u godit nga një makinë e cila drejtohej nga një 19-vjeçar.

Ngjarja ka ndodhur rreth orës 7:45. Pavarësisht ndërhyrjes së menjëhershme të ekipeve mjekësore, shqiptari me iniciale E.G humbi jetën në vendin e ngjarjes.

Rrethanat e aksidentit janë ende të paqarta dhe po hetohen nga policia.

Për tri vjet, mbi 105 mijë të larguar nga Kosova

Posted on by Drin Reçica

Duket se problemeve esenciale për qytetarët, të cilat e kanë rënduar jetën e tyre tash një kohë të gjatë I është shtuar edhe migrimi, që sipas statistikave zyrtare, për tri vjet radhazi, nga 2021-ta  deri në vitin 2023, e ka zbrazur Kosovën  për rreth 105 mijë vetë, përcjell albinfo.ch.

“Brenda tre vjetësh, nga fillimi i vitit 2021 e deri në fund të 2023-tës, nga Kosova janë larguar mbi 105 mijë qytetarë. Në vitin 2021 janë larguar mbi 42 mijë qytetarë, mbi 41 mijë në vitin 2022 dhe 21.244 në vitin 2023. Të dhënat për numrin e qytetarëve të Kosovës që janë larguar nga vendi gjatë vitit 2024, do të publikohen gjatë muajit qershor të këtij viti.”

Tkurrjen e popullësisë, Vebi Mujku nga Instituti për Zhvillimin e Politikave Sociale, e cilëson alarm, edhe për faktin se ndikon drejtpërdrejt në zhvillimin ekonomik, social e shëndetësor të vendit.

“…numri i personave që largohen është shumë i madh. Nëse e shohim regjistrimin e fundit të popullësisë, Kosovës i mungojnë rreth 350 mijë banorë. Kjo është një shifër alarmante për një periudhë kaq të shkurtër kohore. Kjo ndikon drejt për drejt në tkurrjen e popullësisë. Për 5 vite Kosova është në plakje. Kjo ndikon në zhvillim ekonomik, social dhe shëndetësor…”, tha Mujku

Janë shumë arsye që detyrojnë qytetarët ta lënë atdheun për një jetë më të mirë, thotë ekonomisti, Alban Hashani, i cili thekson tregun e punës dhe ngecjet në në sistemin shëndetësor dhe në fushën e arsimit, ku është konstatuar rënie e cilësisë.“…ndikimi është shumë i madh. Kjo është evidentuar edhe në regjistrimin e fundit të popullësisë. Pjesërisht kjo i atribuohet emigrimit. Prej vitit 2015 kur Gjermania vecse e bëri më të lirë që njerëzit të marrin leje pune. Përveç tregut të punës, njerëzit largohen edhe për sistemin shëndetësor, cilësinë e arsimit e të tjera…”,deklaroi Hashani për rtv21

Një vend i vogël si Kosova ka shënuar rekord të ikjes së qytetarëve drejt perëndimit, në vitet 2014, 2015 dhe 2021. Në këtë dyndje të popullësisë, duhet potencuar sidomos vitin 2015, kur patën migruar mbi 74 mijë qytetarë.

Britani: Kapet shqiptari, po kultivonte kanabis

Posted on by Drin Reçica

Raportohet se një shtetas shqiptar, me inicialet A.A, 47 vjeç, është dënuar me 14 muaj burg në Mbretërinë e Bashkuar, pasi u kap nga autoritetet britanike në një banesë të përshtatur për kultivim të paligjshëm të kanabisit, përcjell albinfo.ch.

Thuhet se vlera e drogës së sekuestruar në vendngjarje arrinte deri në 900 mijë paundë, sipas vlerësimeve të ekspertëve britanikë.

Referuar policisë, hetimet kishin nisur pas dyshimeve që lindën nga gjendja e jashtme e dyshimtë e objektit: dritare të mbyllura me dërrasa, mungesë aktiviteti dhe moskryerje pagesash për qira. Kur policia hyri në shtëpi, gjeti brenda vetëm A.A.

Në dëshminë e dhënë para gjykatës, A.A rrëfeu se kishte mbërritur në Britani për të vizituar një mik, por përfundoi në këtë situatë pas një takimi me disa bashkëkombës në një lokal në Londër.

Ai pretendoi se, pas konsumimit të alkoolit, iu ofrua një punë për të ujitur bimë në një vend të panjohur. Më tej, sipas tij, ishte çuar në një banesë të braktisur, ku iu dorëzua një telefon dhe u pajis me udhëzime për kujdesin ndaj bimëve të kanabisit.

A.A shtoi se ishte kërcënuar për të qëndruar aty dhe se dokumentet italiane i ishin marrë.

Megjithatë, gjykata vlerësoi se i pandehuri kishte qëndruar i izoluar për rreth 11 ditë, kishte pasur mundësi të largohej ose të kërkonte ndihmë dhe nuk e kishte bërë këtë. Kjo, sipas trupit gjykues, rrëzonte pretendimet e një situate të detyruar.

Avokati mbrojtës u përpoq të lehtësonte pozitën e klientit të tij, duke deklaruar se ai nuk e konsideronte veten viktimë të trafikimit, por një individ që ishte mashtruar dhe shfrytëzuar për shkak të rrethanave të tij të brishta.

Pavarësisht rrethanave, gjykata vendosi se përgjegjësia penale e A.A nuk mund të mohohej, dhe e dënoi me 14 muaj burgim për pjesëmarrje aktive në një aktivitet të paligjshëm që lidhet me drogën.

Ky rast është një tjetër tregues i përfshirjes së shtetasve të huaj në rrjete të organizuara të kultivimit të kanabisit në Mbretërinë e Bashkuar, si dhe i sfidave që lidhen me identifikimin e viktimave të mundshme të trafikimit apo shfrytëzimit.

Dua Lipa befason me këngë në gjuhën e vendeve ku këndon

Posted on by Drin Reçica

Flet anglisht. Shqipen e ka në gjak. Me spanjishten ia del më shumë se mirë. Frëngjishtja i rrjedh natyrshëm. Gjermanishtja? Edhe ajo s’është pengesë. Dhe nëse gjuhët janë dritaret drejt botës, Dua Lipa duket se i ka hapur të gjitha, shkruajnë mediat birtaneze, përcjell albinfo.ch.

Dua është më shumë se një emër i madh në muzikën botërore  është një fenomen kulturor që sfidon kufijtë dhe stereotipet, që performon me energji të pangatërrueshme dhe komunikon me një univers të tërë, pa pasur nevojë për përkthyes.

Sot, ajo është në qendër të vëmendjes jo vetëm për hitet si Levitating, One Kiss apo Houdini, por për një element të ri që po kthehet në markën e saj: surprizat lokale. Në çdo qytet ku ndalet gjatë turneut botëror, Dua Lipa i dedikon një moment të veçantë një artisti vendas  dhe e bën këtë në gjuhën e vendit, me ndjeshmëri dhe mjeshtëri.

Në Australi, është ngjitur në skenë me këngët e Kylie Minogue, Natalie Imbruglia, Tame Impala dhe AC/DC. Në Zelandën e Re, ka kënduar Lorde. Në Spanjë, Enrique Iglesias dhe Manu Chao. Në Gjermani, ajo ngjalli nostalgjinë me Scorpions. Dhe në Francë, arriti kulmin me një trilogji që ndezi rrjetet sociale: Indila me “Dernière danse”, Daft Punk me “Get Lucky” dhe Alizée me “Moi Lolita”.

Kjo qasje e ka kthyer në një sensacion të ri digjital. Video të fansave që reagojnë mes emocioneve dhe krenarisë për këto homazhe të papritura, po qarkullojnë viral në rrjet. Komentet janë të pafundme. Epitetet po ashtu. “Dualingo” e quajnë tani, një lojë fjalësh me aplikacionin për të mësuar gjuhë, Duolingo. Dhe me të drejtë: Dua nuk është vetëm një yll që këndon, por një artiste që dëgjon, vëzhgon, nderon.

Më 7 qershor, Dua Lipa mbërrin në Milano për koncertin e radhës. Tifozët italianë presin me ankth  çfarë do të sjellë në skenë? A do të jetë një këngë e Mina-s, një hit i Gianna Nannini-t, apo ndoshta diçka e papritur nga repertori i Adriano Celentano-s?

Një gjë është e sigurt: çfarëdo të zgjedhë, Dua do ta bëjë të vetën. Sepse ajo nuk është thjesht një zë që dëgjohet  është një frymë që ndihet, që bashkon dhe që, në çdo gjuhë, tingëllon njësoj bukur.

Kroaci: Talentja shqiptare e mundjes, Ajla Kadriji, shkëlqeu në turneun “Wrestling Festival”

Posted on by Drin Reçica

Talentja shqiptare e mundjes, Ajla Kadriji, shkëlqeu në turneun ndërkombëtar “Wrestling Festival” u rendit e treta në Evropë dhe ka fituar medaljen e bronztë në Poreç të Kroacisë,  transmeton albinfo.ch.

Mundësja e talentuar shqiptare, Ajla Kadriji nga Dobërdolli, e cila është përfaqësuese e Kroacisë U15 në mundje, dje ka shkëlqyer në turneun ndërkombëtar “Wrestling Festival” në Poreç të Kroacisë.

Në këtë turne kanë marrë pjesë mundësit dhe mundëset më të mira të Kroacisë.

Turneu në fjalë është një nga më të njohurit në Europë.

Qëndresa Morina doktoron në “Charles University” për Matematikë

Posted on by Drin Reçica

Qëndresa Morina ka mbrojtur me sukses disertacionin e doktoratës në Fakultetin e Edukimit “Charles University” në Pragë të Çekisë, transmeton albinfo.ch.

Është ky një sukses i kësaj matematikane të re, e cila gjatë studimeve ka arritur rezultate të shkëlqyera dhe është vlerësuar kontributi i saj lartë nga profesorët çekë.

Të pranishëm në doktoraturë të Qëndresa Morina ishin edhe ambasadorët e Shqipërisë dhe të Kosovës në Çeki, Ilir Tepelena dhe Albesjana Ibërhysaj.

Ndërkohë, mentorja e saj, Nada Vondorova e ka çmuar lart punën e saj gjatë tërë studimeve./Albinfo.ch

 

 

Mbi 6,000 armë të sekuestruara nga të miturit në Paris

Posted on by Alb

Nënkryetarja e Asamblesë Kombëtare të Francës, Naima Moussou, ka ngritur shqetësimin për rritjen alarmante të numrit të armëve të sekuestruara nga të miturit në rajonin e Parisit. Ajo deklaroi për televizionin BFM TV se vetëm gjatë vitit të kaluar janë konfiskuar mbi 6,000 armë në këtë zonë.

“Ky trend është seriozisht shqetësues,” theksoi Moussou, duke përmendur se shumë prej këtyre armëve janë përdorur në përleshje që kanë rezultuar me plagosje apo humbje jetësh mes të rinjve. Ajo përmendi si shembull incidentet në gjimnazin e Nantes dhe vrasjen në Châteauroux.

Sipas saj, konfliktet shpesh ndodhin fare pranë shkollave fillore dhe të mesme, e herë pas here edhe brenda vetë institucioneve arsimore.

“Statistikat janë alarmante. Më shumë se 6,000 armë u sekuestruan vetëm vitin e kaluar në zonën metropolitane të Parisit,” u shpreh ajo, përcjell albinfo.ch.

Nga viti 2016, rreth 20% e të dyshuarve për posedim armësh kanë qenë të mitur, që përkthehet në afro 3,000 të rinj të arrestuar çdo vit për posedim të armëve të ftohta. Thikat, sipas saj, janë të përfshira në 60% të rasteve të vrasjeve.

Statistikat e vitit 2024 tregojnë gjithashtu se të rinjtë e moshës 13 deri në 17 vjeç përbëjnë 31% të të dyshuarve për grabitje të armatosura.

Eksperimenti i parë për kontraceptiv për meshkujt shënon sukses

Posted on by Alb

Një kontraceptiv i injektueshëm, jo-hormonal për meshkujt ka treguar se mund të zgjasë deri në 2 vjet.

Kontraceptivi i quajtur Adam është një hidroxhel i tretshëm në ujë që implantohet në kanalet e spermës për ta ndaluar përzierjen me lëngun spermatik, raporton The Guardian.

Contraline, kompania që ka krijuar kontraceptivin, thotë se kjo qasje është një alternativë e kthyeshme krahasuar me prezevativët dhe vazektominë pasi hidroxheli shpërbëhet pas një periudhe të caktuar duke mundësuar rikthimin e fertilitetit.

Kompania ka publikuar detajet e fazës së parë të eksperimentit klinik ku tregon se Adam mund të bllokojë me sukses lëshimin e spermës për 24 muaj pasi në lëngun spermatik nuk dallohet asnjë gjurmë e saj.

Gjthashtu, përmennd se nuk janë vënë re efekte anësore.

evin Eisenfrats, themeluesi i kompanisë thotë se 24 pjesëmarrësit në eksperiment janë regjistruar në momente të ndryshme kohore. Implanti vendoset përmes një procedure minimalisht invazive që zgjat jo më shumë se 10 minuta dhe realizohet përmes anestezisë lokale.

Adam nuk është kontraceptivi i parë që mund të bllokojë kanalet e spermës, por sipas Eisenfrats, implantet e tjera përdorin materiale që nuk shpërbëhen. Ai thotë se ka pak të dhëna që tregojnë rikthimin e fertilitetit, por ka edhe shqetësime nëse këto implante mund të lënë shenja dhe të 1#ojnë drejt sterilitetit.

Sipas tij, në eksperimentet te kafshët hidroxheli është shpërbërë, ndërsa dozat më të ulëta te meshkujt tregojnë periudhë më të shkurtër veprimi.

“Këtë mund ta mendosh si një pajisje intrauterine për meshkujt”, thotë Eisenfrats duke shtuar se pas 2 vitesh, personi mund të vendosë nëse do ta ribëjë.

Ekipi shkencor po punon për të mundësuar heqjen e kontraceptivit sipas dëshirës. Gjithashtu pacienti mund të bëjë një test sperme në shtëpi për të kontrolluar nëse kontraceptivi funksionon ende.

Dua Lipa dhe mbi 300 figura publike i kërkojnë Britanisë të ndalojë shitjen e armëve tek Izraeli

Posted on by Alb

Më shumë se 300 personalitete të njohura nga fusha të ndryshme, përfshirë këngëtaren me origjinë shqiptare Dua Lipa, ish-futbollistin Gary Lineker dhe aktorin Benedict Cumberbatch, kanë nënshkruar një letër të hapur drejtuar kryeministrit britanik Keir Starmer. Në këtë letër, ata i bëjnë thirrje qeverisë së Mbretërisë së Bashkuar të ndalojë menjëherë shitjen e armëve ndaj Izraelit, për shkak të ofensivës së vazhdueshme ushtarake në Rripin e Gazës.

Letra kërkon nga qeveria britanike që të ndërmarrë masa urgjente për:

Ndalimin e menjëhershëm të shitjes së armëve britanike për Izraelin;

Sigurimin e ndihmës humanitare për popullin e Gazës;

Nxitjen e një armëpushimi të menjëhershëm dhe të qëndrueshëm.

Nënshkruesit e letrës përfshijnë edhe figura të tjera të njohura si aktori Brian Cox, këngëtaret Paloma Faith dhe Annie Lennox, si dhe të mbijetuarin e Holokaustit Stephen Kapos. Letra është iniciuar nga organizata humanitare “Choose Love”, e cila bën thirrje për veprim konkret nga qeveria britanike për të ndaluar bashkëfajësinë në atë që quhet “tmerre në Gaza”, përcjell albinfo.ch.

Kjo nismë vjen pas vendimit të qeverisë izraelite për të rinovuar ofensivën ushtarake në Gaza dhe pas thirrjeve të komunitetit ndërkombëtar për të ndalur luftimet.

Ndërkohë, qeveria britanike ka ndërmarrë disa masa si pezullimi i bisedimeve tregtare me Izraelin, vendosja e sanksioneve ndaj kolonëve të Bregut Perëndimor dhe thirrja e ambasadorit izraelit për sqarime. Kryeministri Starmer gjithashtu i ka bërë thirrje homologut të tij izraelit, Benjamin Netanyahu, që të ndalojë ofensivën.

 

Mërgimtari ecën 1900 km nga Gjermania në Kosovë për një kauzë humanitare

Posted on by Alb

Pas 42 ditësh rruge, pas mijëra kilometrave nën këmbë, më në fund Arbert Lubeniqi mbërriti aty ku e pati destinacionin, në Kosovë.

I nisur nga Kasseli i Gjermanisë më 18 prill, 53-vjeçari mori një rrugëtim të jashtëzakonshëm prej gati 1900 kilometrash. Jo për famë, as për garë, por për një mision, që të ndihmojë fëmijët dhe të moshuarit me aftësi të kufizuara.

Të enjten, në mesditë, në pikën kufitare të Jarinjës, ai kaloi kufirin pas ditë të tëra ecjesh.

Në bashkëpunim me një fondacion nga Suedia, Arberti solli pako ndihme për ata që kanë më shumë nevojë, duke e kthyer këtë ecje të gjatë në një rrugëtim humaniteti, përcjell albinfo.ch.

Por misioni i tij nuk përfundon këtu. Më 1 qershor, në Ditën Ndërkombëtare të Fëmijëve, ai synon të arrijë në Prishtinë dhe t’i bëjë një dhuratë të veçantë më të vegjëlve,  një ekskursion gjithëditor,

VIDEO:

https://youtu.be/H38466f38KM?si=pC6lOm6PN3wsYfKo

Ndeshja Shqipëri-Serbi: Mbi 200 mijë kërkesa për 22 mijë bileta

Posted on by BR

Më pak se 10 ditë larg ndeshjes së radhës kualifikuese të Shqipërisë përballë Serbisë dhe kryefjala mbetet më tepër te bileta pasi sportdashësit fitoren e konsiderojnë një detyrim më shumë se sa në ndeshjet e tjera të kuqezinjve përballë këtij kundërshtari, si rrjedhojë janë të shumtë ata që do të duan të jenë dëshmitarë të saj në Arenën Kombëtare më 7 qershor.

Në një intervistë për Top Channel, sekretari i përgjithshëm I FSHF-s, Ilir Shulku tregon se çfarë ndodh me procesin e biletave që ndryshe nga takimet e tjera për këtë ndeshje janë me prenotim dhe më pas me një short kompjuterik të rastësishëm, transmeton albinfo.ch.

“Ka mbetur edhe një ditë nga prenotimi i biletave që është data 30 maj pasi procesi i prenotimit ka filluar më 15 maj dhe ndryshe nga ndeshjet e tjera këtë herë ka patur një kërkesë mbi 200 mijë bileta ndërkohë që kapaciteti i stadiumit është 22 mijë vende. Për të hyrë në stadium do të duhet që sportdashësit të kenë me vete edhe një kartë ID që korrespondon me emrin në biletë për ndryshe nuk do të futen dot”, tha Ilir Shulku, sekretar i përgjithshëm i FSHF-s.

A ka patur masa ekstra nga policia për këtë ndeshje dhe keni patur komunikime?

Shulku: Po kemi patur disa takime me drejtuesit e policisë dhe më i fundit ishte dje pasi kjo ndeshje konsiderohet me risk të lartë dhe këtë herë policia do të ketë masa shumë të rrepta dhje do të ketë disa rrethime kontrolli.

Në aspektin sportiv si e shihni këtë ndeshje sa i përket ngarkesës dhe presionit që e rrethon?

Shulku: Ndonjëherë ngarkesa të tilla e kalojnë cakun dhe nuk bën mirë, por lojtarët tanë aktivizohen në klube të rëndësishme në Evropë dhe patjetër që unë jam optimist dhe besoj se i kemit ë gjitha shanset për të fituar.

Shqipëria ka zhvilluar deri më tani dy ndeshje sa i përket fushatës eliminatore të Botërorit 2026-të me Anglinë dhe Andorrën nga të cilat ka fituar 3 pikë duke u renditur e dyta pas 3 luanëve në Grupin K, ndërkohë që Serbia do të zhvillojë ndeshjen e parë pikërisht ndaj Shqipërisë më 7 qershor në këtë fushatë eliminatore të botërorit.

Studim: Të rinjtë ndihen të shkëputur nga jeta reale për shkak të jetës online

Posted on by Alb

Të rinjtë janë gjithnjë e më të lidhur përmes smartphone-ve dhe kompjuterëve, por shpesh edhe më të pasigurt, me vështirësi në komunikimin me miqtë dhe familjen në jetën reale. Sipas një hulumtimi të Doxa për Generatën Z, të porositur nga Lenovo, në rastin e Ditës Ndërkombëtare të Internetit të Sigurt, 45 për qind e të rinjve në Itali ndjejnë një shkëputje midis jetës online dhe offline, që ka ndikim në mirëqenien mendore dhe marrëdhëniet e tyre.

Lenovo ka realizuar një eksperiment social duke përdorur AI dhe teknologjitë më të avancuara për të krijuar dy avatarë interaktivë 3D që mund të përfaqësojnë dixhitalisht dy të rinj dhe të zhvillojnë biseda me të dashurit e tyre për tema që rinjtë kishin vështirësi t’i diskutonin drejtpërdrejt me ta.

Të dhënat që dalin janë se një i ri nga dy në Itali ndjen një shkëputje ose lufton me një shkëputje mes jetës online dhe offline. Kjo shpeshherë shkakton ankth, vetmi dhe izolim. Qëllimi është të përdorim teknologjinë për të krijuar një urë mes brezave dhe për të promovuar një ndryshim pozitiv përmes saj,” ka theksuar Pietro Parodi, PR i kompanisë në fjalë. “Si liderë teknologjikë, ne besojmë se teknologjia mund të ketë një ndikim pozitiv në shoqëri, për një shoqëri digjitale më të lidhur, më gjithëpërfshirëse dhe më të aksesueshme për të gjithë.”

Siç tregon ky eksperiment me avatarët hiperrealistë, “teknologjia, nëse përdoret në mënyrë të përgjegjshme, mund të luajë një rol thelbësor në mbështetje të atyre që janë në vështirësi,” shpjegoi Cristina Rigon, presidente e Telefono Amico Italia, një organizatë jo fitimprurëse .

Por a mund të zëvendësojë ndihmën njerëzore inteligjenca artificiale, e cila po përparon me një shpejtësi eksponenciale, në fushën e shëndetit mendor? “Ne duhet ta lëmë teknologjinë të na ndihmojë. Inteligjenca artificiale është e nevojshme, por eksperti i fushës, doktori dhe doktoresha, janë gjithnjë e më të rëndësishëm,” thonë ekspertët.

Profesioni i përkthimit në pikëpyetje përballë zhvillimit të Inteligjencës Artificiale

Posted on by Alb

Përballë ngritjes së inteligjencës artificiale, profesioni i përkthimit po përballet me pikëpyetje dhe pasiguri. Ndërsa disa po dorëzohen, nga frika se profesioni po zhduket gradualisht, të tjerë po përpiqen të përshtaten dhe të vënë në pah vlerën shtesë që sjell ndërveprimi njerëzor.

Që në moshë të vogël, Violaine – tashmë 29 vjeç – ka ushqyer një pasion për gjuhët. Ajo shkoi deri në Austri për të studiuar përkthimin. Por, pas kthimit në Zvicër, u përball me zhgënjimin. Gjatë studimeve kishte ndjerë tashmë se karriera e saj e ardhshme po ndikohej gjithnjë e më shumë nga inteligjenca artificiale. Megjithatë, ishin muajt e parë në tregun e punës që e çuan në një zhgënjim të thellë.

“E gjeta si një ambient stresues,” rrëfeu ajo për Mise au point. “Pasi pozicionet janë të pakta, konkurrenca është e ashpër. Ka shumë përkthyes të trajnuar me vite përvoje që aplikojnë. Është shumë e vështirë të konkurrosh.”

Për këtë arsye, Violaine vendosi të ndryshojë drejtim. Filloi studimet për logopedi, një fushë në të cilën shpreson të mbetet e pazëvendësueshme. “Gabimin e bëra një herë, por jo dy herë. Po ta dija që profesioni do të kërcënohej kaq shpejt, nuk do ta zgjidhja kurrë.”

Përshtatje e domosdoshme

Ndryshe nga ajo, Maxence – student në Fakultetin e Përkthimit dhe Interpretimit (FTI) në Universitetin e Gjenevës – mbetet optimist për të ardhmen e sektorit. Ai e kupton se do të duhet të përshtatë rrugëtimin e tij profesional: “Jam përgatitur tashmë për mundësinë që, në të ardhmen, të punoj si post-redaktor ose korrektor, më shumë se si përkthyes.”

Përveç studimeve, ai përkthen romane erotike nga anglishtja e epokës së Shekspirit në frëngjishten klasike për një shtëpi botuese franceze. Kjo punë e vë shpesh përballë kufijve të AI-së: shprehje të dykuptimta, nënkuptime kulturore apo përshkrime sensuale që ChatGPT ose nuk di t’i përkthejë – ose nuk do, për arsye të politikave të përdorimit.

Rëndësia e njeriut

“ChatGPT nuk fle me askënd. AI nuk shkon në shkollë, nuk përjeton herën e parë dhe nuk ka pasur biseda të sikletshme me prindërit për seksin. Teknologjia nuk njeh këto përvoja intime njerëzore që formësojnë ndjeshmërinë unike të çdo individi.” Për Maxence, është pikërisht kjo përvojë njerëzore që mundëson përcjelljen e emocioneve dhe e bën njeriun të pazëvendësueshëm. Ai përmend edhe shembullin e arkave “bla-bla” në supermarkete, që i japin mundësinë njerëzve të ndihen të dëgjuar në vend të vetëshërbimit anonim.

Solidariteti zviceran bën thirrje për ndihma për viktimat e fatkeqësisë në Blatten

Posted on by Alb

Pas tragjedisë që goditi fshatin Blatten, Solidariteti Zviceran ka aktivizuar fondin e tij për ndihma emergjente brenda Zvicrës dhe ka nisur një apel për donacione për të ndihmuar të prekurit. Caritas Zvicra dhe Kryqi i Kuq Zviceran kanë mobilizuar 400,000 franga, ndërsa Shoqata e Patronazhit të Komunave Malore ka premtuar një milion franga.

“Shumë banorë të Blatten-it kanë humbur gjithçka,” deklaruan Caritas dhe Kryqi i Kuq, duke theksuar se ndihma emergjente financiare do të shpërndahet në koordinim me autoritetet lokale për të mundësuar blerjen e nevojave bazë. Po ashtu, është planifikuar edhe mbështetje kalimtare për të mbuluar shpenzimet që nuk përfshihen nga sigurimet apo kontributet e tjera.

Ndihma e koordinuar

Fondacioni Solidariteti Zviceran ka vënë në funksion fondin e tij të përhershëm për fatkeqësi natyrore në Zvicër, për të mbuluar nevojat që nuk përfshihen nga sigurimet, autoritetet publike apo fondet zyrtare. Qytetarët ftohen të kontribuojnë përmes faqes zyrtare www.bonheur.ch.

Falë këtyre burimeve, organizata mund të veprojë shpejt në terren. Ndihma e planifikuar përfshin: mbështetje të drejtpërdrejtë financiare për viktimat, ndihmë për qira për strehim të përkohshëm, ndihmë për biznese të vogla në rast humbje të të ardhurave, si dhe ndihmë afatmesme dhe afatgjatë.

Solidariteti Zviceran po ndjek nga afër zhvillimin e situatës dhe do të përshtasë ndihmën në bazë të nevojave reale, transmeton albinfo.ch. Koordinimi me Caritas dhe Kryqin e Kuq Zviceran tashmë ka filluar, ndërsa ndërhyrja do të realizohet në bashkëpunim të ngushtë me komunën e Blatten-it dhe autoritetet kantonale. Procedurat për aplikimin për ndihmë do të bëhen të ditura në një moment të dytë.

 

“Baseli e pret me duar të hapura Granit Xhakën”

Posted on by BR

Granit Xhaka ndezi me deklaratat se mund të rikthehet në Basel, në pensionimin e vëllait të tij, Taulantit.

Dominik Schmid dhe Fabio Celsetini flasin për Xhakën në emisionin e futbollit “Heimspiel”, që transmetohet në kanalin “Blue Sport”, transmeton albinfo.ch.

“Njëri Xhakë po largohet, por një tjetër do të vijë shpejt këtu”, ishte shprehur Granit Xhaka të shtunën në mbrëmje në ndeshjen e fundit të Baselit kundër Luzernit.

“Stadiumi po gjëmonte. U trondita”, thotë Dominik Schmid për atmosferën e krijuar pas deklaratës së Granitit. Megjithatë, mbrojtësi i krahut mbetet i sigurt në vetvete. “Kushdo që ka pak njohuri për futbollin dhe shikon se si po luan Graniti, në këtë moment e di që kjo verë nuk është koha e duhur e tij për t’u kthyer”.

Ai u habit nga deklarata e kapitenit të ekipit përfaqësues të Zvicrës në futboll.

Fjalët e Xhakës kanë një ndikim të madh te tifozët e Baselit. Te Baseli tani ëndërrojnë rikthimin e lojtarit që ka luajtur deri tash 135 ndeshje për Zvicrën.

“Gjithmonë ka vend për një lojtar të tillë si Granit Xhaka”, thotë trajneri i Baselit, Fabio Celestini.

Pas Xherdan Shaqirit, i cili e dominoi ligën, trajneri do ta mirëpriste një rikthim të Granit Xhakës.

Kanë kaluar 13 vjet kur Graniti veshi për herë të fundit fanellën e Baselit. Në korrik të vitit 2012, ai la Baselin për t’iu bashkuar Borussia Monchengladbachut. Me Baselin fitoi dy tituj të kampionit para se t’i bashkohej ekipit gjerman.

Të dielën, Baseli mund ta mbyllë sezonin edhe me një trofe. Pas titullit, Baseli synon edhe Kupën. Do të përballet në finale ndaj Bielit të kategorisë së tretë të futbollit zviceran.

Titullin dhe Kupën për herë të fundit, Baseli i fitoi në vitin 2017.

FC Dardania e Lozanës fiton Kupën në Vaud

Posted on by BR

FC Dardania Lausanne ka fituar Kupën në Kantonin e Vaud-it.

Skuadra shqiptare në finale është përballur me FC Stade Nyonnais SA II, ku me përkrahjen e tifozëve shqiptarë arritën të fitojnë Kupën, shkruan albinfo.ch.

FC Dardania fitoi me rezultat 2:4.

Ky ishte një sukses për skuadrën kuqezi, që kryeson edhe në Ligën ku garon.

Pas 23 ndeshjeve, ka grumbulluar 59 pikë, duke qenë në vendin e parë.

https://matchcenter-acvf.football.ch/default.aspx?oid=16&lng=2&v=1161&tg=4142870

https://www.dardania-lausanne.ch/index.php

 

Gjykata kufizon tarifat e vendosura nga Trump, çfarë ndodh tani?

Posted on by Alb

Një gjykatë federale në SHBA ka vendosur që ish-presidenti Donald Trump nuk mund të përdorte një ligj emergjent të vitit 1977 për të vendosur tarifa ndaj vendeve të huaja. Sipas gjykatës, presidenti nuk ka të drejtë të veprojë i vetëm pa miratimin e Kongresit kur bëhet fjalë për masa tregtare me ndikim të gjerë.

Padia u ngrit nga disa biznese dhe 12 shtete amerikane, të cilat argumentonin se tarifat e ashtuquajtura “të Ditës së Çlirimit” kishin dëmtuar ekonominë dhe tejkaluar kompetencat presidenciale. Kjo ishte një përplasje e drejtpërdrejtë me politikat proteksioniste të Trump, që përfshinin tarifa ndaj Kinës, Meksikës dhe Kanadasë, përcjell albinfo.ch.

Çfarë ndodh tani?

Vendimi i gjykatës nuk shfuqizon menjëherë të gjitha tarifat e vendosura gjatë administratës Trump, por krijon një precedent të ri ligjor. Qeveria federale mund të apelojë vendimin në një gjykatë më të lartë, dhe ndërkohë, tarifat që nuk u përfshinë drejtpërdrejt në këtë rast (si ato për çelikun dhe aluminin) vazhdojnë të jenë në fuqi. Gjithashtu, Kongresi mund të ndërhyjë me ligje të reja që qartësojnë rolin e presidentit në politikat tregtare.

Në thelb, ky është një hap drejt rivendosjes së ekuilibrit mes degëve të qeverisë dhe një sfidë serioze ndaj praktikave proteksioniste pa mbikëqyrje legjislative.

Mësimi i frëngjishtes në shkollat fillore në Zvicrën gjermanofolëse po shkakton debat të ashpër

Posted on by Alb

Në Zvicrën gjermanofolëse po ndodh një valë protestash politike kundër mësimit të frëngjishtes në shkollat fillore. Sulme të tilla janë regjistruar në kantonet Cyrih, St. Gallen dhe Appenzell Ausserrhoden.

Frëngjishtja, “një gjuhë e bukur, por e vështirë!” – ky është vlerësimi i një nxënësi të shkollës fillore në Herisau të kantonit Appenzell Ausserrhoden, i cili është ndarë edhe nga Këshilli i Madh i këtij kantoni. Në mars të vitit të kaluar, anëtarët e këtij këshilli votuan për të shtyrë mësimin e frëngjishtes në shkollat e mesme.

Drejtori i shkollës, një francofil, beson se mësimi i hershëm i gjuhës së dytë kombëtare ka kufijtë e veta. “Për shembull, fëmijët e emigrantëve të rinj mësojnë gjermanisht dhe anglisht që nga viti i tretë i shkollës fillore, ndërsa frëngjishten në vend të gjuhës së tyre amtare. Kjo mund të çojë në mbingarkesë,” shpjegon ai.

Kantone të tjera gjermanofolëse po diskutojnë për heqjen e frëngjishtes në shkollat fillore dhe zëvendësimin e saj me anglishten. Kjo tendencë shqetëson Christophe Darbellay, president i Konferencës së Departamenteve të Arsimit Publik. “Është një çështje thelbësore dhe lidhet me kohezionin kombëtar. (…) Sot po shoh se kjo po dëmtohet në çdo cep të Zvicrës lindore, ku disa parlamentarë i trajtojnë këto çështje me lehtësi,” shpreh ai shqetësimin e tij.

“Së pari, është e rëndësishme të kemi një gjuhë të përbashkët. Nëse kuptohemi në anglisht, ne përsëri kuptohemi,” thotë Angela Koller, ministre e Arsimit në kantonin Appenzell Innerrhoden, transmeton albinfo.ch.

Kantoni Appenzell Innerrhoden, për shembull, ka hequr mësimin e hershëm të frëngjishtes dhe e ka vendosur atë vetëm në shkollat e mesme. Për ministren e Arsimit të këtij kantoni, kjo nuk kërcënon kohezionin kombëtar.

“Kur bëhet fjalë për njohjen dhe mirëkuptimin reciprok, më e rëndësishme është të kemi një gjuhë të përbashkët,” thotë ajo. “Sigurisht, gjuha lidhet ngushtë me kulturën, por nëse kuptohemi në anglisht, përsëri kuptohemi,” shton ajo.

 

Spar Zvicër në shitje: Një kapitull i ri për rrjetin e njohur të supermarketeve

Posted on by Alb

Grupi i Afrikës së Jugut, Spar, po përgatitet të shesë filialin e tij në Zvicër, Spar Switzerland, që operon me mbi 360 dyqane në të gjithë vendin. Kjo është konfirmuar nga kompania Spar Handels AG për agjencinë e lajmeve AWP, e cila po kërkon një pronar të ri që do të mbështesë strategjinë e rritjes së biznesit në Zvicër, duke garantuar gjithashtu vazhdimësinë për punonjësit, furnizuesit dhe klientët.

Spar Switzerland është prezente me markat Spar, Eurospar, Spar Express, Maxi dhe Top CC, dhe aktualisht punëson rreth 1600 veta. Në prill të këtij viti, kompania bleu edhe 14 degë nga grupi Schnellmann, duke zgjeruar kështu rrjetin e saj.

Drejtori i Spar Zvicër, Gary Alberts, deklaroi se negociatat me blerës potencialë janë në vazhdim e sipër dhe preferohet që pronari i ri të ketë interes dhe lidhje lokale në Zvicër. Megjithatë, ende nuk ka një marrëveshje përfundimtare, dhe nuk dihet saktësisht koha kur do të përfundojnë bisedimet.

Shitjet dhe fitimet e Spar Switzerland kanë pësuar një rënie në muajt dhe vitet e fundit, duke bërë që kompania amë në Afrikën e Jugut të rishikojë strategjinë e saj për këtë treg. Analistët vënë në dukje se rritja e biznesit u shënua kryesisht gjatë periudhës së pandemisë së koronavirusit, transmeton albinfo.ch.

Në procesin e shitjes, marka Spar do të mbetet në tregun zviceran, ndërsa kompanitë Migros dhe Coop nuk janë ndër blerësit e interesuar.

Ky zhvillim hap një kapitull të ri për tregun e shitjes me pakicë në Zvicër dhe mbetet për t’u parë se cili aktor do të marrë në dorë menaxhimin e kësaj rrjeti të madh dyqanesh në vend.