Bedri Shabani dhe Muharrem Qerimi janë Kosovarët e arrestuar e më pas të akuzuar për veprën penale të spiunazhit.

Prokuroria Speciale pretendon se të akuzuarit përmes komunikimit me zyrtarë të lartë të BIA-s serbe ju kanë ofruar informacione e dokumentacione të cilat kishin të bënin me luftën e fundit në Kosovë, emra të ushtarëve, emra të mjekëve, duke u munduar të bëjnë ndërlidhje të shtëpisë së verdhë dhe spitalit ushtarak të Mollopolcit për trafikim organesh.

Ndër provat që janë të listuara në këtë aktakuzë janë edhe libra që i kanë siguruar të akuzuarit të cilët janë shkruar për luftën e fundit në Kosovë, eprorët e saj, spitalin ushtarak të UÇK-së në Mollopolc.

Pjesë të nxjerra nga libra e gazeta të ndryshme, sipas prokurorisë janë përdorur nga Shabani që t`i japë për qëllime të BIA-s serbe, duke u munduar t`i ndërlidhë rastin e Spitalit “Medikus” dhe “Shtëpinë e verdhë” që pretendohej se janë bërë transplante të organeve njerëzore.

Kapituj nga libri “Shëndetësia e Ferizajt me rrethinë në shekullin XX” ishin marrë dhe i shin dërguar strukturave të BIA-s duke u munduar t`i ofroj dëshmi sa i përket luftës së fundit në Kosovë.

Në aktakuzë tutje shpjegohet se si është munduar i pandehuri të krijoj narrativë të dëmshme për shtetin e Kosovës në veçanti luftën e UÇK-së, duke tentuar t`i denigroj dhe mjekët dhe ofruesit e shërbimeve mjekësore në spitalin e Mollopolcit gjatë vitit 1998-1999, duke u munduar që t`i ndërlidhë të gjitha këto me rastin e “Shtëpisë së Verdhë” në Burrel të Shqipërisë.

Këto madje i akuzuari ishte munduar që t`i elaboroj sa më mirë duke përpiluar edhe skicime e forografi për të shpeguar ndërlidhjen në mënyrë figurative.

Tutje prokuroria në njërën nga provat ku i akuzuari ishte nën masa të fshehta, konfirmohet se Shabani vazhdimisht insiston që librin sa i përket spitalit ushtarak të improvizuar në Mollopolc ta përdorin si dëshmi.

“Ju ende nuk e dini çfarë libri keni pranuar dhe çfarë vlere ka… problemi është të takohemi dhe të fillojmë punën ndërsa nuk është problem që unë të shkoj dhe gjithçka do të shpjegoj rreth librave dhe nëse është nevoja do t`i dërgoj origjinalin mos të mendojmë se kam shpikuar ndonjë gjë”- përshkruhen bisedat e bëra mes Shabanit dhe Srgjan Rosiq dhe Bogoljub Janiçeviq.

Më 17.05.2024 sipas prokurorisë Shabani në pikën kufitare Dheu i Bardhë kalon me autobus dhe po të njëjtën ditë pas disa orësh kthehet në Kosovë. Qëndrim 10 minutësh prokuroria përshkruan të ketë bërë Shabani edhe më 16.04.2024, ku kishte kaluar në territorin e Serbisë dhe pastaj ishte kthyer mbrapsht në Kosovë.

Në këto kalime kufitare, Prokuroria thotë se Shabani kishte takuar fizikisht zyrtarët e BIA-s serbe dhe ju kishte dhënë dokumentacione dhe informacionet e përmendura.

Ndër dëshmitë e siguruara nga Prokuroria Speciale thuhet se Shabani kishte marrë informacione edhe për rastet ku flitej për Gjykatën Speciale në Hagë, nga mediume të ndryshme.

Kështu më 25.05.2023 ishte nxjerrë një shkrim më titullin “Richard Grenell takohet me Ramën: Duhet të bëjmë më shumë për të liruar Hashim Thaçin”.

Dëshmi të tjera të marra nga Prokuroria Speciale janë edhe librat “Jeta mund vdekjen” ku ishin paraqitur përjetimet dhe ngjarjet gjatë luftës së fundit në Kosovë për ngjarje të ndryshme.

Dëshmi tjetër e siguruar nga PSRK është edhe libri tjetër me temën “Spitali ushtarak i UÇK-së i zonës operative të Pashtrikut. Në këtë libër sipas prokurorisë janë paraqitur përjetimet dhe ngjarjet gjatë luftës së fundit në Kosovë kryesisht i kushtohet aspektit shëndetësor – trajtime të ndryshme të plagosurve dhe trajtimi i tyre nga mjekë të ndryshëm që kanë vepruar në këto zona.

Prokuroria thotë se nga këta libra janë nxjerrë shënime dhe pjesë përmbajtjesore të librave që kanë të bëjnë më luftën e UÇK-së, duke cekur një skriptë prej 11 faqesh e në të cilat ka shënime dhe foto të personave të Ushtrisë Çlirimtare të Kosovës ku në mesin e tyre janë edhe Hashim Thaçi e Fatmir Limaj, Musa Jashari të cilët janë identifikuar me emra dhe me foto.

Ajo çka ka ngjallë çudi tek Prokuroria Speciale është se si kishte arritur i akuzuari Shabani të siguronte mesazhe private të personave që kishin komunikuar në rrjete sociale për luftën në Kosovë.

Nga të gjitha këto prova të elaboruara nga PSRK është arritur në përfundim se këto informacione kanë pasur për qëllim të trajtojnë veprimtarinë e eprorëve të UÇK-së, stafin mjekësor nga zonat e luftës më konkretisht spitalin e Mollopolcit, pra personeli që ka kontribuar në këtë spital duke i listuar me emra dhe me fotografi.

Të gjitha këto informacione dhe  dokumentacione i janë dhënë BIA-s serbe përmes Bedri Shabanit tek Sërgjan Rroshiq dhe Bogoljub Janiçeviq. Prokuroria pretendon se këto të dhëna janë përdorur nga shteti serb për interesa të veta.

Prokuroria kishte bërë ekzaminime të telefonave që i shin gjetur Shabanit në pronësi, ku në këta telefona kishin gjetur shënime të shumta që dyshohen se janë mbledhje e informacioneve për të ju dërguar BIA-s serbe.

“E kam prit përgjigjen tënde, e kujtoj se nuk ka asgjë”– sipas prokurorisë është lënë të nënkuptohet se ka pritur përgjigjen nga dikush në gjuhën serbe.

Fotografi tjetër e nxjerrë nga telefoni i sekuestruar i të akuzuarit, përmban një tekst ku thuhet me disa tituj gazetash për tentimin e ndërkombëtarëve për shfuqizimin e Gjykatës Speciale, ku sipas prokurorisë qëllimi i tij ka qenë që të njoftoj BIA-n serbe.

Teks tejtër i marrë nga Prokuroria Speciale në telefonin e të akuzuarit “nuk do të humb kohë dhe do të vazhdoj rrugën time që e kam planifikuar që moti, mirëpo kam pritur vetëm për ju”, pra sipas prokurorisë ky është një pritje e përgjigjes nga një lajmëtar me nofkën “Gjoka” duke e njoftuar se nga muaji maj nuk do të jetë këtu dhe personalisht beson se nuk do të ftojnë fare duke ju referuar Zyrës së Prokurorisë se Specializuar në Hagë.

Prokuroria e ka bindjen e fortë se Shabani kishte zhvilluar komunikime telefonike me zyrtarët e BIA-s serbe përmes një telefoni që e mbante në dollapin e dhomës së tij, me qëllim të spiunazhit.

Në telefonat që i kishte sekuestruar prokuroria konsiderohen se janë nxjerrë një numër i madh i fotografive që janë përdorur nga i akuzuari për spiunazh.

PSRK kishte arritur që të grumbullonte edhe shkrime që Shaban ii kishte bërë Zyrës së Prokurorisë Speciale në Hagë duke shprehur dyshimet për krimet e kryera gjatë luftës së UÇK-së dhe është i brengosur se punët nuk janë duke shkuar sipas planifikimit dhe se Shabani është i gatshëm të bashkëpunoj me ta.

Prokuroria kishte arritur të nxirrte si provë edhe një shkrim tjetër ku Shabani i kishte shkruar Zyrës së Prokurorisë së Specializuar që të hetohet më shumë rreth Spitalit Ushtarak të Mollopolcit.

Në listën e të dhënave që kishte mbledhur Bedri Shabani janë edhe emrat e personave që kishin dëshmuar kundër Sllobodan Millosheviçit.

Gjatë Provave të elaboruara janë edhe disa foldere ku njëri ndër ta mban emrin “Diagrame”, ku janë gjithsej 60 fotografi të cilat i akuzuari i ka bërë strukturimin në formë të diagramit, veprimet e eprorëve dhe pjesëtarëve të UÇK-së në mënyrën se si ishte arrestuar (sipas tij më 14 korrik 1999) si ishte trajtuar gjatë ndalimit si dhe veprime të tjera duke i paraqitur me skica.

Bedri Shabani kishte shfrytëzuar të drejtën të mbrohet në heshtje edhe në Polici edhe në Prokuori./KALLXO

Bashkimi Evropian (BE) ka thënë të premten se Serbia, me sjelljen e saj në Këshillin e Evropës, është duke e shkelur Marrëveshjen e Ohrit të vitit 2023, në të cilën, mes tjerash, Beogradit i kërkohet të mos e pengojë anëtarësimin e Kosovës në asnjë organizatë ndërkombëtare.

Kosova hasi edhe në një pengesë tjetër gjatë kësaj jave në Këshillin e Evropës (KiE), pasi kërkesa e saj për të qenë mysafire speciale në Komitetin për Çështje Politike dhe Demokraci të Asamblesë Parlamentare të KiE-së, u hoq nga rendi i ditës të mërkurën.

Serbia, përmes delegacionit të vet në këtë Komitet, por edhe përmes kryetares së Kuvendit, Ana Bërnabiq, u krenua për këtë arritje, duke e quajtur si fitore të madhe të Serbisë në mbrojtjen e interesave kombëtare.

I pyetur për këtë, një zëdhënës i BE-së tha të premten se Serbia qartazi po i shkel detyrimet e saj nga Marrëveshja e Ohrit, e arritur mes saj dhe Kosovës më 2023.

“Sjellja e Serbisë në Këshillin e Evropës është një shkelje e qartë e obligimeve të Serbisë nga Marrëveshja e Ohrit”, thotë zëdhënësi i BE-së, duke nënvizuar se ky obligim përmendet në nenin 4 të Marrëveshjes, ku flitet për moskundërshtimin e anëtarësimit në organizatat ndërkombëtare.

Serbia, në disa raste në të kaluarën, ka lobuar kundër anëtarësimit të Kosovës në organizata ndërkombëtare, ndonëse Marrëveshja e arritur me lehtësimin e Bashkimit Evropian qartë thotë se ajo nuk mund ta bëj një gjë të tillë.

Marrëveshja nuk është nënshkruar, por BE-ja ngul këmbë se ajo është ligjërisht e detyrueshme për palët dhe duhet të zbatohet në tërësi.

Kosova dështoi të anëtarësohet në Këshillin e Evropës në fillim të vitit 2024, për shkak se u kushtëzua me krijimin e Asociacionit të komunave me shumicë serbe në Kosovë. Edhe Asociacioni është obligim për Kosovën nga kjo Marrëveshje.

Vitin e kaluar, Serbia kishte formuar grup punues për koordinimin e aktiviteteve të autoriteteve shtetërore kundër pranimit të Kosovës në Këshillin e Evropës.

Këshilli i Evropës është organizatë lidere në mbrojtjen e të drejtave të njeriut. Anëtarësimi eventual do t’i ndihmonte Kosovës, mes tjerash, në fushën e sundimit të ligjit, dhe luftimin e korrupsionit./REL

Zyra e Kryeminsitrit ka bërë një reagim pasi para tri ditëve, kryeministri i Kosovës, Albin Kurti, ka shpërfillur urdhrin e Gjykatës Themelore të Prishtinës për t’u paraqitur për intervistim në Prokurorinë Speciale, për të dhënë dëshminë e tij lidhur me rezervat shtetërore.

Në reagimin e tyre, thuhet se “Këto ditë, është ngritur një debat publik mbi një çështje që nuk duhet të ishte politizuar: dhënia e dëshmisë së Kryeministrit në lidhje me rezervat shtetërore”.

“Gjatë kësaj kohe jemi përballur me një valë dezinformatash dhe përpjekjesh për të sajuar një perceptim të rremë mbi këtë proces. Prandaj, është e rëndësishme të sqarojmë faktet dhe të mbrojmë parimet e një shoqërie të drejtë e demokratike. Mos reagimi ynë i deritanishëm, nuk ka qenë mungesë vëmendjeje, por respekt për procesin ligjor që duhet të zhvillohet pa ndërhyrje të jashtme. Sidoqoftë, është bërë e qartë se po përballemi me një orvatje të hapur për të manipuluar dhe hutuar opinionin publik”, thuhet në reagim, transmeton albinfo.ch.

Tutje, theksohet se Kurti asnjëherë nuk ka refuzuar të dëshmojë.

“Duam të jemi të qartë: Kryeministri Kurti asnjëherë nuk ka refuzuar të dëshmojë. Përkundrazi, ka ofruar bashkëpunim të plotë për të ndihmuar drejtësinë të kryejë punën e saj me integritet. Gatishmëria dhe vullneti për të dhënë dëshmi është ofruar në disa raste dhe në kohë të ndryshme në Zyrën e Kryeministrit. Në të gjitha demokracitë e zhvilluara, përfshirë ShBA-në dhe Francën, është praktikë standarde që zyrtarët e lartë të shtetit të dëshmojnë nga zyrat e tyre, për të ruajtur diskrecionin dhe për të shmangur politizimin e proceseve ligjore. I njëjti parim është zbatuar edhe në Kosovë, së paku në rastin e dy ish-kryeministrave dhe madje te zëvendëskryeministri aktual! Atëherë, pse në këtë rast po bëhet përjashtim? Pse ky insistim i panevojshëm për një formalitet procedural që nuk ka ndikim në thelbin e çështjes? Qeveria jonë ka sjellë reforma të mëdha, veçanërisht në transparencën qeveritare dhe luftën kundër korrupsionit, të cilat janë njohur dhe vlerësuar nga organizata të pavarura ndërkombëtare si Transparency International. Ne mbështesim fuqishëm pavarësinë e sistemit gjyqësor, por refuzojmë përdorimin e tij si një mjet për përfitime politike”, thuhet në reagim.

Reagimi thekson se nuk është dhe nuk mund të jetë detyrë e cilitdo, e sidomos dhomave tregtare e ekonomike të japin opinione ligjore apo të ndikojnë në proceset gjyqësore.

“Bizneset dhe organizatat ekonomike kanë një rol të rëndësishëm në zhvillimin e vendit. Qeveria jonë ka qenë një aleate e fortë e punës së tyre duke ofruar stabilitet institucional e politik dhe duke nxitur rritjen ekonomike, e cila ka çuar në dyfishimin e investimeve te huaja direkte gjatë katër viteve të fundit. Ata që kërkojnë ta keqpërdorin këtë çështje për qëllime politike duhet të gjejnë mënyra të ndershme për të sfiduar qeverinë —përmes ideve dhe politikave që i shërbejnë qytetarëve. Zyra e Kryeministrit mbetet e hapur dhe bashkëpunuese me çdo institucion që vepron në përputhje me parimet e drejtësisë dhe paanshmërisë”, thuhet në njoftim.