Archives

Kosovë: Dy nga katër të arrestuarit konfirmojnë se punojnë në institucione të sigurisë në Serbi

Posted on by erezzaademi

Dy nga katër serbët e arrestuar dje në Gjakovë kanë konfirmuar se punojnë në institucione serbe të sigurisë.

Në seancë, Pavle Kragoviq ka thënë se punon si inspektor i Policisë në Kragujevc të Serbisë, ndërsa Milovan Steviq deklaroi se është doktor, stomatolog, në Akademinë Ushtarake të Mjekësisë në Beograd.

Ndryshe, lidhur me masën e sigurisë në Gjykatën Themelore në Gjakovë janë edhe Branko Rakiq, i cili deklaroi se është teknik i komunikacionit, dhe Nemanja Vamoviq, i cili tha se është inxhinier i pylltarisë. Rakiq dhe Kragoviq janë me dyshtetësi, kurse Steviq dhe Vamoviq janë vetëm shtetas të Serbisë, transmeton albinfo.ch.

Ministri në detyrë i Punëve të Brendshme, Xhelal Sveçla, dje ka shkruar se në veturën ku ishin ata, u gjetën dy thika, një sëpatë dhe një dritë rotative, por edhe një fotografi me fytyrat e pjesëtarëve të grupit terrorist që u vranë gjatë sulmit në Banjskë.

Prokurorja Venera Shala, gjatë leximit të kërkesës për paraburgim, tha se mjetet e mprehta i mbanin gjatë vizitës së manastireve ortodokse në Republikën e Kosovës dhe se rreziku i arratisjes për të pandehurit duhet të lidhet me faktin se të gjithë janë shtetas të Serbisë, dhe kjo mund t’i bëjë të paarritshëm nëse ata ikin në Serbi.

Konfirmohet aktakuza ndaj Naim Murselit dhe të tjerëve për vrasjen e Liridona Ademajt

Posted on by erezzaademi

Gjykata Themelore në Prishtinë ka konfirmuar aktakuzën ndaj Naim Murselit, Granit Plavës dhe Kushtrim Kokallës, për rastin e vrasjes së Liridona Ademajt më 29 nëntor 2023.

“REFUZOHEN kërkesat për kundërshtimin e provave dhe hedhjen e aktakuzës së Prokurorisë Themelore në Prishtinë, nën shenjën PP.1.nr.256/2023, e datës 15.01.2025, të parashtruara nga mbrojtësi i të akuzuarit Naim Murseli, av. Teuta Zhinipotoku, më datë 26.02.2025, nga mbrojtësi i të akuzuarit Granit Plava, av. Skender Gojani, më datë 04.03.2025 dhe nga mbrojtësi i të akuzuarit Kushtrim Kokalla, av. Ndrecë Dodaj, më datë 11.03.2025”, si të pabazuara”, thuhet në vendim, raporton “Betimi për Drejtësi“.

Në seancën fillestare të mbajtur më 31 janar 2025, Naim Murseli u deklarua i pafajshëm për vrasjen e bashkëshortes së tij, Liridona Ademajt. Granit Plava nuk u deklarua rreth fajësisë, kurse Kushtrim Kokalla tha se nuk deklarohet pa u konsultuar me mbrojtjen. Ndërsa fajtor u deklarua i akuzuari Tom Dodaj. Ky i fundit, pasi pranoi fajësinë, u dënua me 5 vjet burgim dhe 5 mijë euro gjobë.

Ndryshe, Prokuroria Themelore në Prishtinë, më 15 janar 2025, ka ngritur aktakuzë ndaj Naim Murselit, Granit Plavës, Kushtrim Kokallës dhe Tom Dodajt, transmeton albinfo.ch.

Sipas aktakuzës, Murseli, Plava dhe Kokalla ishin dakorduar paraprakisht që vrasja të kryhej nga i akuzuari Plava, me marrëveshje që Murseli t’ia paguante atij 30 mijë euro. I gjithë plani për vrasjen e Liridonës, thuhet se u bë nga bashkëshorti i saj, tani i akuzuari Naim Murseli, si pasojë e çrregullimit të raporteve familjare e martesore, ku edhe lindi dëshira e tij për hakmarrje.

Në aktakuzë thuhet se fillimisht plani i ishte shpalosur Kokallës nga Murseli, por ai kishte refuzuar të gjente një mundësi për vrasjen e Liridonës, e më pas Kokalla kishte gjetur Plavën, me të cilin e kishte njoftuar Naimin. E vetë Naim Murseli thuhet se siguroi armën me 20 fishekë nga i akuzuari Tom Dodaj, nga i cili e bleu për 280 euro. Me këtë armë u krye vrasja e tani të ndjerës.

IBAS: Nga një ide inovative në një lider të tregut financiar

Posted on by albinfo.ch

Kur Gazmend Selmani nisi rrugëtimin për të themeluar IBAS, ai kishte një vizion të qartë: të krijojë një institucion financiar që jo vetëm do të modernizonte shërbimet e pagesave dhe investimeve, por do të ndryshonte mënyrën se si njerëzit dhe bizneset i menaxhojnë financat e tyre. Si nevojë e kohës, duke parë boshllëqet në treg dhe potencialin e madh për inovacion, ai dhe ekipi i tij ndërtuan një platformë që sot ka rritjen më të madhe dhe të qëndrueshme në tregun e fintech.

IBAS SI ZGJIDHJE E NEVOJAVE TË TREGUT

Në një kohë kur tregu financiar në Kosovë kishte mungesë të zgjidhjeve digjitale të avancuara, IBAS u krijua për të ofruar një platformë gjithëpërfshirëse që i shërben individëve dhe bizneseve. Me shërbime që përfshijnë pagesat, transferet e parasë, kreditë, mbitërheqjet dhe modelin inovativ “Buy Now, Pay Later”, IBAS është platforma me ofertën më të llojllojshme në treg. Për më tepër, ofrimi i këshillimit për investime në instrumente financiare në tregjet e rregulluara e bën atë një opsion unik jo vetëm në Kosovë por edhe në rajon.

Megjithatë, sfidat e shumta për një institucion të tillë ekipi i IBAS i shndërruan në pasion për t’i zgjidhur shpejtë e me lehtësi.

NGA RRITJA LOKALE TEK AMBICIET NDËRKOMBËTARE

Në pak vite, IBAS u bë institucioni i parë i parasë elektronike në Kosovë dhe arriti të fitojë mbi 40,000 klientë në Kosovë. Përmes një kombinimi të teknologjisë së avancuar dhe përkushtimit ndaj shërbimit ndaj klientit, IBAS kontribuon në ekosistemin financiar me një qasje që i jep përdoruesve fleksibilitet dhe siguri.

Performanca e IBAS është mbresëlënëse: me një rritje mesatare të të ardhurave prej mbi 138% gjatë tre viteve të fundit, kompania ka tejkaluar shumë institucione financiare të ngjashme, madje edhe disa që vlerësohen në miliarda dollarë (Revolut, Monzo, Starling, N26, Klarna, etj.) duke shënuar rritje të jashtëzakonshme të vlerës, deri në mbi 400 herë më shumë se investimi i tyre fillestar. Rritja eksponenciale e IBAS, sidomos duke pasur parasysh fillimet në një treg relativisht të vogël, paraqet mundësi të jashtëzakonshme për investitorë.

Për këta të fundit, IBAS ka shkuar një hap më tej në krijimin e një lehtësie ligjore, duke u themeluar IBAS në Mbretërinë e Bashkuar, një nga vendet me infrastrukturën më të avancuar në botë në tregjet financiare.

ÇFARË PRITET NË VAZHDIM NGA IBAS?

Për të adresuar këtë kërkesë dhe për të zgjeruar më tej operacionet, IBAS vendosi të hapte një cikël fillestar investimesh përmes CrowdCube, platforma e njohur dhe e licencuar për investime në Mbretërinë e Bashkuar.

Fillimisht, IBAS synoi të siguronte 1 milion euro, por brenda një kohe të shkurtër, pa e publikuar thirrjen finale, arriti të mbyllë 61% të kësaj shume. Për shkak të interesit të lartë të publikut, kompania vendosi të rrisë shumën e synuar në 1.25 milion euro. Me këto fonde, IBAS planifikon të zgjerojë aktivitetet në Kosovë dhe të përgatitet për serinë A të investimeve, ku vlera e investimeve do të jetë dukshëm më e lartë. Objektivi kryesor është hyrja në tregun evropian (EEA) dhe përgatitja për IPO në bursën e Londrës ose Nasdaq.

HISTORI SUKSESI: NGA KLIENTËT TEK INVESTITORËT

Një nga treguesit më të mirë të suksesit të IBAS është ndikimi që ka pasur tek klientët dhe investitorët. IBAS filloi si një vizion në letër, por investitorët e hershëm besuan ne te dhe e trajtuan si një mundësi të sigurt për sukses. Tani, të gjithë investitorët aktualë shohin rritje të vazhdueshme të vlerës së kapitalit të tyre, një trend që me shumë gjasë do përcillet nga viti në vit. Grafikonët e performancës së IBAS vazhdojnë të jenë në rritje, duke e vendosur kompaninë në një pozicion të fortë për të arritur objektivat e saj të mëdha.

Një moment kyç për IBAS ka qenë konsolidimi i reputacionit si një institucion financiar inovativ dhe i besueshëm. Duke ofruar zgjidhje të personalizuara për nevojat e klientëve dhe duke siguruar që çdo shërbim të jetë transparent dhe i mbrojtur nga rregulloret ndërkombëtare, IBAS ka krijuar një bazë solide për suksesin e radhës.

IBAS nuk e sheh suksesin vetëm në terma të rritjes financiare, por edhe në ndikimin e tij në industrinë financiare, respekitivisht sektorin e FinTech. Pas këtij cikli fillestar të investimeve, kompania do të fokusohet në:

Zgjerimin e shërbimeve në tregun kosovar, duke forcuar pozicionin e tij si lider në këtë industri.

Përgatitjen për serinë A të investimeve, që do të sigurojë kapital shtesë për zgjerim në tregjet ndërkombëtare.

Rritjen e numrit të klientëve dhe profitabilitetit, për të garantuar IPO të suksesshme në Londër ose Nasdaq.

NJË MODEL PËR SUKSESIN NË FINTECH

Historia e IBAS është një dëshmi e fuqisë së vizionit, inovacionit dhe menaxhimit të duhur. Siç thekson vetë Gazmend Selmani: “IBAS është i përkushtuar të sigurojë që grafiku i kthimit të investimeve të ndjekë të njëjtën trajektore siç është ai i rritjes së të hyrave, duke u krahasuar me standardet e vendosura nga liderët e industrisë si Revolut, Monzo, Starling, N26 dhe Klarna.”

IBAS ka dëshmuar se, me strategjinë dhe përkushtimin e duhur, çdo synim mund të arrihet. Me hapa të qartë drejt zgjerimit dhe një plan të mirëpërcaktuar për listim në bursë, IBAS po ndërton të ardhmen e tij si një emër i fuqishëm në industrinë globale të FinTech.

 

Albin Kurti letër kryetarit të LDK-së, e fton për konsulta para konstituimit të Kuvendit

Posted on by erezzaademi

Kryetari i Lëvizjes Vetëvendosje, Albin Kurti, përmes një letre e ka ftuar kryetarin e Lidhjes Demokratike të Kosovës, Lumir Abdixhiku, në një takim për konsulta paraprake, në prag të konstituimit të Kuvendit të Kosovës pas zgjedhjeve të 9 shkurtit.

Në këtë letër, Kurti ka ftuar Abdixhikun për takim të mërkurën ose të enjten.

“Me certifikimin e rezultateve përfundimtare të zgjedhjeve parlamentare të 9 shkurtit 2025 nga Komisioni Qendror i Zgjedhjeve, siç e dini, edhe Presidentja e ka caktuar mbledhjen e parë të Legjislaturës së Nëntë të Kuvendit të Republikës së Kosovës për datën 15 prill 2025. Me qëllim të konstituimit të plotë të Kuvendit të Republikës së Kosovës dhe procesit të zgjedhjes së Qeverisë së re, për t’u konsultuar paraprakisht, ju ftoj në takim të mërkurën, më 9 prill, në orën 15:00, apo të enjten, më 10 prill, në orën 9:00 ose në 14:00. Mirëpres përgjigjen tuaj për këtë takim”, thuhet në letër, transmeton albinfo.ch.

Pse shoferët në Gjermani mund të presin më shumë kontrolle të shpejtësisë këtë javë?

Posted on by erezzaademi

Policia po shton kontrollet e shpejtësisë në rrugët e 14 shteteve gjermane këtë javë, në një përpjekje për të reduktuar vdekjet në trafik. Ja ku priten kontrollet dhe rregullat bazë rreth shpejtësisë.

Zyra e Statistikave të Gjermanisë regjistroi 2.780 viktima për shkak të aksidenteve të trafikut vitin e kaluar, ku shpejtësia e tepërt ishte ndër shkaqet kryesore të aksidenteve me fatalitet.

Për shembull, në Bavari, rreth një e katërta e të gjitha aksidenteve fatale të trafikut vitin e kaluar u zbulua se ishin rezultat i shpejtësisë së papërshtatshme, sipas një raporti nga Tagesschau, përcjell albinfo.ch.

Si përgjigje, policia në 14 shtete federale të Gjermanisë po shton kontrollet këtë javë për të luftuar tejkalimin e shpejtësisë.

Ku dhe kur bëhen kontrollet e shpejtësisë?

Për të shmangur gjobat e panevojshme, drejtuesit e mjeteve në Gjermani këshillohen të ndjekin kufijtë e shpejtësisë me kujdes të veçantë këtë javë, pasi policia sugjeron se kontrollet e shtuara do të vendosen në shumicën e shteteve gjermane në ditët në vijim.

Nga të gjitha shtetet federale të Gjermanisë, vetëm Berlini dhe Saarlandi nuk janë të përfshirë në fushatë.

Kontrollet ka të ngjarë të përqendrohen në rrugët me rrezik më të lartë aksidentesh, si dhe pranë zonave të ndjeshme, si shkollat dhe kantieret e ndërtimit.

Deutschlandfunk raportoi se në disa shtete, si Bavaria dhe Turingia, shumica e kamerave të shpejtësisë do të vendosen të mërkurën. Shtete të tjera, si Saksonia e Ulët dhe Saksonia-Anhalt, do të kenë kontrolle të shtuara gjatë gjithë javës, sipas shoqatës së shoferëve ADAC.

Ministria e Brendshme deklaron se qëllimi është ndalimi i shpejtësisë së tepërt, mbrojtja e jetëve dhe sensibilizimi i qytetarëve për drejtimin e përgjegjshëm. Vetëm në Bavari do të ketë rreth 1.500 kontrolle shpejtësie të vendosura këtë javë.

ADAC mbështet të ashtuquajturën “maratonë e kamerave të shpejtësisë” si një kontribut për sigurinë rrugore.

Kush vozit me shpejtësi të tepërt në Gjermani?

Sipas Autoritetit Federal të Transportit Motorik (KBA), meshkujt e rinj deri në moshën e mesme kanë shumë më tepër gjasa të shkelin kufijtë e shpejtësisë gjatë drejtimit të automjetit.

Në vitin 2023, si në vitet e mëparshme, burrat u kapën me shpejtësi rreth 1.9 milionë herë, ndërsa gratë rreth 550.000 herë.

Në të dy gjinitë, shkelësit ishin zakonisht midis moshës 25 dhe 44 vjeç.

Raporti i KBA-së gjithashtu vë në dukje se shkeljet e shpejtësisë ndodhin më shpesh në zona rurale.

Cilat janë rregullat e Gjermanisë për shpejtësinë?

Gjermania është e njohur për mungesën e kufirit të shpejtësisë në Autobahn, por në realitet kjo vlen vetëm për disa pjesë të autostradave. Drejtuesit e mjeteve janë përgjegjës për t’u orientuar sipas shenjave rrugore që tregojnë kufijtë e shpejtësisë dhe për t’i respektuar ato.

Përtej Autobahn-it, nëse nuk ka shenja të tjera, kufiri i shpejtësisë është 50 km/h brenda zonave urbane dhe 100 km/h jashtë tyre.

Dënimet për tejkalim të shpejtësisë ndryshojnë në varësi të shkallës së tejkalimit dhe vendit ku ka ndodhur shkelja.

  • Tejkalimi i kufirit me më pak se 10 km/h mund të sjellë një gjobë prej 20-30 euro.

  • Tejkalimi me 70 km/h mund të rezultojë me gjobë mbi 600 euro dhe ndalim drejtimi për tre muaj.

  • Tejkalimi me 20 km/h ose më shumë mund të sjellë ndalim drejtimi prej të paktën një muaji.

Në ndryshim nga disa vende të tjera evropiane, në Gjermani është shoferi – jo pronari i regjistruar i automjetit – që është përgjegjës për shkeljet e shpejtësisë. Prandaj, nëse kapet nga kamera, shoferi duhet të jetë i identifikueshëm në fotografi.

Rekordi i Raclette u thye në Valais

Posted on by BR

Një rekord botëror u thye në Martigny në kantonin Valais gjatë fundjavës – Raclette më e madhe në botë.

4,893 të ftuar, 361 punëtorë u takuan dhe gatuan më shumë se dy ton djathë dhe 1,2 ton patate.

Rekordi u mor nga Saint-Etienne në Francë, i cili mbante më të madhin, në atë kohë, në mars me vetëm gjysmën e numrit të njerëzve, transmeton albinfo.ch.

Gjermani: Arrihet marrëveshje në negociatat e pagave në sektorin publik

Posted on by erezzaademi

Pas negociatave në Potsdam gjatë fundjavës, është nënshkruar një marrëveshje e re pagash për 2.5 milionë punonjës të sektorit publik në Gjermani.

Marrëveshja, e cila u bazua në rekomandimet e një komiteti arbitrazhi, parashikon që punëtorët të marrin një rritje page prej 5.8 për qind për një periudhë prej 27 muajsh, transmeton albinfo.ch.

Nga 1 prilli, pagat do të rriten me tre për qind, ose të paktën 110 euro më shumë në muaj, ndërsa një rritje tjetër prej 2.8 për qind është planifikuar për majin e vitit të ardhshëm. Do të rriten gjithashtu edhe bonuset për punën me turne.

Për më tepër, paga ‘bonus’ e muajit të 13-të do të rritet nga viti 2026, megjithëse ajo mund të këmbehet me pushime shtesë deri në tre ditë. Nga viti 2027, punëtorët do të përfitojnë një ditë shtesë pushimi si standard, shkruan The Local.

Duke folur në emër të punëdhënësve, ministrja e Brendshme, Nancy Faeser (SPD), tha se qeveria “ka shkuar në kufirin e asaj që mund të përballojë në një situatë të vështirë buxhetore”.

Ndërkohë, Frank Werner, kreu i sindikatës së shërbimeve Verdi, e përshkroi marrëveshjen si “një rezultat të vështirë në kohë të vështira”.

Marrëveshja përmbyll javë të tëra negociatash të ashpra mes punëdhënësve të qeverisë lokale dhe federale, sindikatës së shërbimeve Verdi dhe sindikatës së sektorit publik DBB.

Ajo do t’i japë fund një vale grevash në transportin publik, në klinika, në depozitimin e mbeturinave, në qendrat e kohës së lirë dhe në çerdhe – të paktën deri në mars të vitit 2027.

Megjithatë, një mosmarrëveshje për pagat ndërmjet Verdi-t dhe operatorit të transportit të Berlinit, BVG, ende nuk ka arritur në një përfundim.

“Ne mbyllëm fëmijët e padisiplinuar”: shpërthejnë raportet për abuzime në çerdhet frëngjishtfolëse

Posted on by erezzaademi

Në Zvicrën frëngjisht-folëse, ankesat kundër qendrave të kujdesit ditor janë trefishuar pothuajse në gjashtë vjet. Prindërit dhe edukatorët po denoncojnë kushtet e parregulluara të punës dhe rrezikimin e fëmijëve. Mise au Point hetoi cilësinë dhe sigurinë e shumë ndërmarrjeve dhe rezultatet janë të dyshimta.

Katër herë në javë, Jeanne e çon djalin e saj në çerdhe, një vend që ajo imagjinon të jetë i sigurt. Megjithatë, ajo kishte frikën e jetës për shkak të neglizhencës. Një ditë i ra telefoni: një mësuese i tha se djali i ri kishte pësuar tronditje anafilaktike pasi kishte gëlltitur kos. Djali i saj është alergjik ndaj laktozës. Kopshti u informua dhe ishte nënshkruar një protokoll i rreptë. Fatkeqësisht, një mësues zëvendësues nuk e ndoqi atë, transmeton albinfo.ch. Për Jeanne, aksidenti ishte i shmangshëm: “Ekipet e edukatorëve punojnë me një orar të ngjeshur. Ata duken të rraskapitur (…) Ka shumë rrotullime, shpesh zëvendësime, gjithmonë të reja. Ne ishim të shqetësuar për këtë paqëndrueshmëri (…) dhe ndikimin në siguri.”

Kjo dëshmi për fat të keq nuk është e izoluar. Midis 2018 dhe 2024, raportet e abuzimit ose neglizhencës në qendrat e kujdesit ditor pothuajse u trefishuan në Zvicrën frëngjisht-folëse. Në Gjenevë, numri shkoi nga 11 në 47 alarme. Rritje është shënuar edhe në Neuchâtel dhe Valais, raporton RTS.

Në kantonin Vaud, shifrat u rritën në 34 raporte në vitin 2023 përpara se të bien përsëri vitin e ardhshëm. Sipas Shërbimit Kantonal të Kujdesit për Fëmijët (SCAJE), më shumë se 50% e këtyre kishin të bënin me raste abuzimi. Pjesa tjetër kishte të bënte me kushtet e kujdesit ndaj fëmijëve dhe mosrespektimin e rregullave të sigurisë dhe mbikëqyrjes.

Mise au Point ishte në gjendje të merrte dhjetëra raporte anonime, të shkruara nga punonjës ose prindër. Për shembull, është rasti i një foshnjeje të harruar nga një mësuese “i vetëm në errësirë” në një dhomë të mbyllur, ekipe profesionistësh që dhanë dorëheqjen masivisht për të protestuar kundër kushteve të pritjes, apo edhe autoritetet bashkiake që alarmuan për “akte të rënda” të kryera në një çerdhe fshati.

Dëshmi goditëse

Për të vlerësuar shkallën e mosfunksionimeve dhe për të identifikuar qendrat problematike të kujdesit ditor, Mise au Point nisi një thirrje për dëshmi në mediat sociale. Brenda pak ditësh u përgjigjën më shumë se 50 persona, kryesisht edukatorë, pasi profesioni mbetet kryesisht femër dhe i ri.

“Në çerdhen time të vjetër kishte abuzime. Fëmijët e padisiplinuar mbylleshin. Fëmijët e vegjël detyroheshin të hapnin gojën dhe të hanin. Unë e lashë,” thotë një mësues nga Neuchâtel. “Drejtoria e çerdhes nuk funksionon. Gjashtë prej nesh kemi dhënë dorëheqjen ose jemi pushuar nga puna në harkun kohor të katër muajve”, thotë një tjetër vizitor nga Friburgu, i cili përmend gjithashtu “qumësht pluhur ose kos të skaduar që u jepen fëmijëve gabimisht”.

“Hapësira buxhetore është e dukshme. Nganjëherë jemi të detyruar të blejmë vetë pajisje për t’i akomoduar fëmijët në kushte të mira. Blerja ime e fundit? Një qilim për dhomën e pritjes,” ankohet një i tretë.

Mosrespektimi i normave të mbikëqyrjes

Në proporcion me numrin e banorëve, Neuchâtel dhe Fribourg janë pak të mbipërfaqësuar në këto dëshmi. Këto dy kantone nuk kanë një marrëveshje kolektive të punës, ndryshe nga Vaud apo Gjeneva. Për më tepër, Friburgu ka rregulla më pak strikte mbikqyrjeje sesa kantonet e tjera. Është veçanërisht e mundur të numërohen praktikantët ose praktikantët në nivele të personelit, diçka e ndaluar diku tjetër.

Megjithatë, një vëzhgim është i dukshëm në të gjithë Zvicrën frëngjishtfolëse: mosrespektimi i rregullores për normat e mbikëqyrjes. Ligji vendos një raport të rreptë prej një profesionisti për çdo pesë foshnja nën një vjeç. Midis moshës 1 dhe 4 vjeç, ky raport varion nga një i rritur për çdo gjashtë deri në dhjetë fëmijë, në varësi të kantonit.

Megjithatë, dëshmitë përshkruajnë një realitet shumë të ndryshëm. “Unë punoj në një çerdhe private (…), e vë në dyshim ligjshmërinë tonë çdo ditë,” pranon një edukatore e Gjenevës. “Nuk respektohen proporcionet e edukatorëve dhe asistentëve të trajnuar. Nuk respektohen as kuotat e fëmijëve për edukator.”

“Shpesh ka vetëm një edukator të trajnuar në çerdhe. Në grupe, ka vetëm asistentë. Është e ndaluar, por është realiteti në terren,” konfirmon një grua nga Vaud.

“Është e trishtueshme të thuhet, por kujdesem për fëmijën. Shpesh jemi të dobët për sa i përket personelit, kështu që ka pak vend për mësimdhënie dhe ndjeshmëri,” shton një profesionist i kujdesit për fëmijët në Neuchâtel.

Si rezultat, gjithnjë e më shumë qendra të kujdesit ditor po kërkojnë përjashtime nga rregulloret e kujdesit për fëmijët. Sipas shifrave zyrtare, në vitin 2018 janë dhënë 96 përjashtime nga kantoni Vaud. Kjo shifër u rrit në 121 në vitin 2019 dhe më pas shpërtheu në 280 përjashtime në vitin 2024. Arsyeja më e zakonshme është akomodimi i fëmijëve shtesë përtej lejes së funksionimit të çerdhes. Këto përjashtime përgjithësisht jepen për disa muaj.

Kësaj i shtohet edhe një fenomen tjetër: shkalla e humbjes së stafit arsimor është mesatarisht 30% në vit, tre herë më e lartë se në profesionet e tjera, sipas një sondazhi të fundit nga organizata ombrellë e çerdheve kibesuisse. Në çerdhet më problematike, qarkullimi është edhe më i lartë. Dhe kjo normë zhvlerësimi përfaqëson një rrezik shtesë për sigurinë e fëmijëve.

“Gjatë pesë muajve të fundit, 100% e stafit të çerdhes është larguar. Vajza ime nuk njeh më askënd,” shpjegon një nënë nga Friburgu. Përveç krijimit të një klime stresi për fëmijët, ky paqëndrueshmëri rrit rrezikun e gabimeve, veçanërisht në transmetimin e informacionit ose përdorimin e stafit të trajnuar dobët ose të patrajnuar. Siç e kemi parë, kjo mund të çojë në aksidente të rënda.

Për Dominique Golay, një profesor në Shkollën e Punës Sociale të Lozanës (HETSL), problemi është sistemik. “Në këto raste abuzimi apo neglizhimi ka përgjegjësi individuale, por pedagogët punojnë në kushte të tilla, nën një presion të tillë… Veç të këqij mund të jemi!

Janë veçuar çerdhet private

Ankesat e marra nga Mise au Point kishin në shënjestër dy lloje institucionesh: çerdhe komunitare të subvencionuara, ndonjëherë të kritikuara për menaxhim amator ose neglizhent, dhe institucione private. Këto ambiente janë shumë më të shtrenjta se çerdhet publike, por për shkak të mungesës së hapësirave në dispozicion, shumë prindër nuk kanë zgjidhje tjetër.

Një nga çështjet kryesore të ngritura është presioni financiar i bërë mbi stafin dhe kushtet e kujdesit ndaj fëmijëve. “Për të tërhequr prindërit, ne kishim projekte edukative imagjinative me foto të bukura në mure,” ankohet një ish-drejtues i një grupi privat në Zvicrën frëngjisht-folëse. “Por në realitet, duke pasur parasysh kushtet e kujdesit ndaj fëmijëve, ishte e pamundur zbatimi i tyre”.

“Për shkak të qarkullimit dhe mënyrës së trajtimit të stafit, nuk e kam kuptuar kurrë se si autoritetet kantonale nuk kanë tërhequr lejet e funksionimit nga qendrat e caktuara të çerdheve të këtij grupi, pavarësisht kontakteve të shumta për t’i informuar për këto fakte,” ankohet ai.

Prindër të varfër

Nga ana e prindërve, dëshmitë tregojnë një ndjenjë pafuqie. Akoma më keq, mungesa e çerdheve i pengon disa prindër të raportojnë problemet, nga frika se mos humbasin vendin e tyre dhe mos gjejnë një zgjidhje alternative.

“Si nënë beqare, jam e detyruar ta lë vajzën time në një çerdhe problematike. Nëse raportoj mosfunksionimet, do të jem pa zgjidhje për kujdesin e fëmijëve dhe pa mundësi për të punuar”, shpjegon një tridhjetë vjeçare nga Vaud.

Në planin politik, debati deri më tani është fokusuar në sasinë e çerdheve, jo në cilësinë. Megjithatë, duke gjykuar nga këto dëshmi të shumta, duket urgjente të veprohet: mirëqenia dhe siguria e fëmijëve të vegjël janë në rrezik.

Sindikatat zvicerane bëjnë thirrje për orar më të shkurtër për punëtorët e ndërtimit

Posted on by erezzaademi

Punëtorët e ndërtimit kanë nevojë për ditë më të shkurtra pune, thonë sindikatat zvicerane. Ata kërkojnë përmirësimin e kushteve të punës, të cilat, sipas tyre, aktualisht janë të papajtueshme me jetën familjare. Demonstrata janë planifikuar në Cyrih dhe Lozanë më 17 maj.

“Jeta familjare vuan nga ditët e gjata të punës”, deklaruan Unia dhe Syna në një komunikatë të hënën. Dy sindikatat theksojnë se në dhjetë vitet e fundit “është ndërtuar shumë më tepër me më pak punëtorë ndërtimi”.

Si pasojë, orari i punës është zgjatur dhe rreziku për aksidente është rritur, thonë ato. Sipas sindikatave, në Zvicër ka një mungesë të ndjeshme të punëtorëve në ndërtimtari: deri në fund të vitit 2040, një në tre muratorë nuk do të jetë më i disponueshëm, transmeton albinfo.ch.

Unia dhe Syna u bëjnë thirrje punëdhënësve që të kufizojnë ditën e punës në tetë orë, të kompensojnë pushimin e mëngjesit dhe të paguajnë plotësisht kohën e udhëtimit. Puna gjatë së shtunës gjithashtu duhet të reduktohet, ndërsa pagat të rriten, shkruan swissinfo.

Për këtë arsye, sindikatat po i bëjnë thirrje industrisë që të marrë pjesë në demonstratat e 17 majit në Lozanë dhe Cyrih.

Rrjeti holandez i dyqaneve me zbritje, në Zvicër

Posted on by erezzaademi

Action, rrjeti holandez që pretendon të jetë zinxhiri i shitjeve me pakicë me rritje më të shpejtë në Evropë, ka hapur dyqanin e tij të parë të shtunën në Bachenbülach, në kantonin e Cyrihut.

Ai planifikon të ofrojë rreth 6,000 artikuj me çmime të ulëta, të pakrahasueshme diku tjetër në Zvicër, sipas shitësit me pakicë, shkruan thelocal, transmeton albinfo.ch.

Rreth 1500 artikuj – duke përfshirë furnizimet DIY, pajisje multimediale, produkte për kujdesin e trupit dhe lodra – pritet të kenë çmime nën 2 franga.

Dyqani i dytë Action në territorin zviceran pritet të hapet më 14 prill në Martigny (VS).

 

Zvicër: Pasuritë e paluajtshme janë mundësi “popullore” për pastrimin e parave

Posted on by erezzaademi

Industria e pasurive të paluajtshme në Zvicër është një ndër vendet më të popullarizuara për kriminelët që kërkojnë të pastrojnë paratë e tyre të paligjshme, sipas avokatit dhe ekspertit të pastrimit të parave, Fabian Teichmann.

“Po të isha kriminel, do të investoja në patundshmëri në Zvicër”, ka theksuar ai.

Kjo për shkak se tregu zviceran i pronave është “i njohur ndërkombëtarisht si i sigurt, i qëndrueshëm dhe tërheqës për investime afatgjata”, transmeton albinfo.ch.

Është e pamundur të thuhet saktësisht se sa para derdhen në pasuri të paluajtshme në Zvicër çdo vit.

Vlerësimet janë të pakta dhe shifra të besueshme nuk ekzistojnë.

“Problemi është numri i lartë i rasteve të paraportuara”, tha Teichmann, shkruan The Local. “Logjikisht, ata që pastrojnë paratë me sukses nuk do të kapen. Por një gjë është e qartë: pastrimi i parave përbën një pjesë të konsiderueshme të tregut të pasurive të paluajtshme.”

“Nëse oferta mbetet e njëjtë, çmimet e blerjes në mënyrë të pashmangshme do të rriten – dhe përfundimisht, edhe qiratë do të rriten”, shtoi ai.

Pushime me pagesë pas abortit: Propozimet shkaktojnë polemika në Zvicër

Posted on by albinfo.ch

Në Zvicër, polemikat kanë shpërthyer rreth një propozimi për të ofruar pushim me pagesë për gratë që humbasin fëmijën gjatë shtatzënisë, përfshirë edhe pas një aborti spontan ose lindje të vdekur. Aktualisht, gratë kanë të drejtë për pushim të paguar vetëm nëse shtatzënia ka arritur të paktën javën e 23-të. Propozimet e reja, të cilat kërkojnë të zgjerohen këto të drejta, kanë hasur kundërshtime nga disa politikanë dhe organizata, shkruan 20minuten.

Politikanët si Nik Gugger dhe Mattea Meyer mbështesin idenë e lejes me pagesë, duke theksuar rëndësinë e mbështetjes emocionale për familjet që përjetojnë këto humbje. Sidoqoftë, Këshilli Federal dhe disa organizata si Shoqata Zvicerane e Punëdhënësve (SAV) kundërshtojnë ndryshimin e ligjit, duke theksuar kostot shtesë dhe ngarkesën administrative që do të shkaktonte.

Pavarësisht këtyre polemikave, debati vazhdon të mbetet i hapur, me disa palë që kërkojnë një analizë të hollësishme mbi ndikimin e këtyre humbjeve dhe nevojën për mbështetje më të madhe për gratë, transmeton albinfo.ch.

Aksidentohet autobusi me mërgimtarë që udhëtonte nga Kosova në Zvicër

Posted on by albinfo.ch

Të hënën është raportuar se një autobus i linjës Zvicër-Kosovë me mërgimtarë është aksidentuar.

Kompania ka sqaruar rrethanat duke thënë që nuk ka të lënduar dhe se aksidenti ka ndodhur pasi një person ka humbur kontrollën mbi mjetin dhe ka përplasur autobusin.

“Ju njoftojmë se dje gjatë rrugës Zvicër-Kosovë ka ndodhur një aksident trafiku 3 km afër kufirit Kosovë-Serbi afër “Dheut të Bardhë” dhe i sqarojmë publikut se deri te aksidenti ka ardhur ku një veture me targa serbe një person i moshuar ka humbë vetëdijen e vozitjes dhe ka dalë në krahun e kundërt në drejtim të autobusit”, shkruan kompania Arditi Tours.

 

Gjermani: Policia në kërkim të të dyshuarit për vrasjen e trefishtë në Weitefeld

Posted on by albinfo.ch

Policia në shtetin perëndimor gjerman Rheinland-Pfalz është në kërkim intensiv të një personi të dyshuar për vrasjen e tre personave në qytetin e qetë Weitefeld, rreth 30 kilometra larg Siegenit. Ngjarja tragjike ndodhi në orët e hershme të mëngjesit të së dielës, duke tronditur komunitetin lokal prej afro 2.000 banorësh.

Sipas autoriteteve, viktimat janë një burrë 47-vjeçar, një grua 44-vjeçare dhe një djalë 16-vjeçar, të cilët u gjetën pa shenja jete brenda një shtëpie në lagjen ku banonin. Policia ka konfirmuar se bëhet fjalë për një ngjarje me sfond familjar, ndërsa kryebashkiaku Karl-Heinz Keßler ka bërë të ditur se viktimat dhe i dyshuari ishin banorë të përhershëm të qytetit, transmeton albinfo.ch.

Hetimet paraprake sugjerojnë se është përdorur një armë zjarri dhe një armë therëse gjatë sulmit. Zëdhënësi i policisë ka sqaruar se një telefonatë emergjente është pranuar në orën 03:45 nga një grua që denonconte një akt dhune – autoritetet nuk përjashtojnë mundësinë që ajo të jetë një nga viktimat.

Dëshmitarët kanë raportuar se i dyshuari, një mashkull, është parë duke u larguar nga vendi i krimit në momentin kur policia mbërriti në vendngjarje. Pavarësisht kërkimeve intensive, që përfshijnë forca taktike speciale dhe helikopterë, ai nuk është gjetur ende.

Policia u ka bërë thirrje banorëve të Weitefeldit dhe fshatrave përreth që të qëndrojnë brenda, të mbajnë dritaret të mbyllura dhe të shmangin kontaktet me persona të panjohur, duke përfshirë marrjen e autostopistëve. Megjithatë, autoritetet kanë theksuar se nuk ka ndonjë rrezik të menjëhershëm për popullatën, shkruan DW.

Kërkimet do të vazhdojnë gjatë gjithë natës, ndërsa hetuesit po përpiqen të zbardhin motivet pas këtij akti të rëndë kriminal, që ka tronditur një komunitet të tërë, transmeton albinfo.ch.

Prindër birësues në Ticino kundërshtojnë ndalimin e birësimeve ndërkombëtare

Posted on by albinfo.ch

Në Ticino po formohet një valë kundërshtimi ndaj propozimit të Këshillit Federal për të ndaluar birësimet ndërkombëtare në Zvicër. Dhjetëra prindër birësues kanë krijuar shoqatën “Adoption and Family Group Switzerland” për të mbrojtur të drejtën e birësimit ndërkombëtar, duke theksuar se procedurat aktuale janë të rrepta dhe të mbikëqyrura, shkruan SRF, përcjell albinfo.ch.

Vendimi i Bernës për ndalimin e birësimeve ndërkombëtare bazohet në rastet e paligjshme të ndodhura mes viteve 1970–1990 dhe frikën se fëmijët nga vendet e varfra mund të bien pre e trafikimit. Por avokatët e birësimeve thonë se sot rregullat janë ndryshe dhe shumë më të sigurta.

Shoqata ka gjetur mbështetje politike nga përfaqësues të Ticinos dhe nga deputeti Nik Gugger, vetë i birësuar, i cili ka nisur një peticion që deri tani ka mbledhur mbi 8000 firma. Mbështetësit kërkojnë më shumë reforma dhe kontrolle, jo ndalim total, duke theksuar se çdo birësim është një shans për një jetë më të mirë, transmeton albinfo.ch.

Kërkohet paraburgim për katër “pelegrinët” serbë

Posted on by albinfo.ch

Prokuroria Themelore në Gjakovë, Departamenti i Përgjithshëm, ka njoftuar se ka paraqitur kërkesë në Gjykatën Themelore në Gjakovë për caktimin e masës së paraburgimit prej 30 ditësh ndaj katër personave të dyshuar, me inicialet B.R., N.V., P.K. dhe M.S., të gjithë të nacionalitetit serb.

Sipas njoftimit të Prokurorisë, ekziston dyshimi i bazuar se të pandehurit, më 5 prill 2025, në rrugën “Gasper Karaqi” në Gjakovë, kanë vepruar në kundërshtim me Ligjin për armët duke mbajtur në pronësi armë të ftohta – një sopatë, një thikë me këllëf dhe një thikë sharrë.

Mjetet e mprehta janë gjetur nga zyrtarët policorë gjatë një kontrolli në një veturë të tipit Toyota me ngjyrë hiri, e cila drejtohej nga i dyshuari B.R., pasi ky i fundit ishte ndaluar për shkak të tejkalimit të shpejtësisë në zonën e kufizuar. Gjatë kontrollit, të pandehurit kishin deklaruar se nuk posedonin ndonjë objekt të paligjshëm dhe kishin shprehur gatishmëri për kontroll të automjetit.

Pas kontrollit të kryer nga policia, armët e ftohta janë zbuluar brenda automjetit, të cilat të dyshuarit pretendohet t’i kishin mbajtur gjatë një vizite të organizuar në disa prej manastireve ortodokse në Republikën e Kosovës.

Me këto veprime, sipas Prokurorisë, të pandehurit dyshohen për kryerjen e veprës penale “Mbajtja në pronësi, kontroll ose posedim të paautorizuar të armëve”.

Marrëveshje e re pagash për 2.5 milionë punonjës në sektorin publik të Gjermanisë

Posted on by albinfo.ch

Pas negociatave të ashpra në Potsdam, është nënshkruar një marrëveshje e re pagash për 2.5 milionë punonjës të sektorit publik në Gjermani, bazuar në rekomandimet e një komiteti arbitrazhi. Marrëveshja do të ofrojë një rritje të pagave prej 5.8 për qind për 27 muaj, duke përfshirë dy rritje të mëdha pagash.

Nga 1 prilli, pagat do të rriten me tre për qind, ose të paktën 110 euro më shumë në muaj. Një rritje tjetër prej 2.8 për qind është planifikuar për majin e vitit të ardhshëm. Po ashtu, do të rriten bonuset për punë me turne dhe paga e muajit të 13-të do të rritet nga viti 2026. Kjo mund të zëvendësohet me pushime shtesë deri në tre ditë, dhe nga viti 2027, punëtorët do të përfitojnë një ditë shtesë pushimi si standard, transmeton albinfo.ch.

Ministrja e Brendshme, Nancy Faeser, tha se qeveria ka bërë maksimumin e mundshëm, duke marrë parasysh kufizimet e buxhetit, ndërkohë që kreu i sindikatës Verdi, Frank Werner, e cilësoi marrëveshjen si një “rezultat të vështirë në kohë të vështira”.

Marrëveshja vjen pas javëve të negociatave të ashpra ndërmjet punëdhënësve të qeverisë lokale dhe federale, sindikatës Verdi dhe sindikatës DBB, dhe do të ndalë grevat në transportin publik, klinikat, depozitimin e mbeturinave dhe shumë shërbime të tjera deri në mars 2027. Megjithatë, nuk është arritur ende një marrëveshje për pagat midis sindikatës Verdi dhe operatorit të transportit të Berlinit, BVG, shkruan The Local, përcjell albinfo.ch.

Restoranti zviceran në Uashington përballet me tronditje ekonomike dhe sfida tregtare

Posted on by albinfo.ch

Restoranti “Stable”, një copëz Zvicre në zemër të kryeqytetit amerikan, po përjeton valë tronditëse ekonomike mes tarifave të administratës Trump dhe pasigurive të shkaktuara nga goditjet në tregun e punës, të ndikuara nga Elon Musk dhe Departamenti i tij i Efikasitetit të Qeverisë (DOGE).

Silvan Krämer, menaxheri i lokalit dhe një nga zërat më të zëshëm të kuzhinës zvicerane në SHBA, shprehet i shqetësuar për të ardhmen. “Disa furnizues kanë njoftuar tashmë rritje prej 15 deri në 20%. Pyetja është: për sa kohë do ta përballojmë këtë?” – deklaroi ai për RTS.

Gjysma e përbërësve të përdorur në restorant importohen direkt nga Zvicra, duke e bërë restorantin veçanërisht të ndjeshëm ndaj tarifave doganore. Krahas rritjes së çmimeve të produkteve, rënia e fuqisë blerëse në qytet po lë pasoja të dukshme në industrinë e restoranteve, përcjell albinfo.ch.

“Shumë njerëz që punonin për qeverinë këtu janë pushuar nga puna, dhe të tjerë nuk e dinë nëse do ta humbasin vendin e tyre. Njerëzit janë më të kujdesshëm, shpenzojnë më pak dhe hanë më pak jashtë,” – thotë Krämer. Sipas tij, tre muajt e parë të këtij viti kanë sjellë një rënie të përgjithshme të konsumit në të gjitha restorantet e kryeqytetit amerikan, krahasuar me vitin e kaluar, shkruan RTS.

Në këtë kontekst të brishtë, menaxheri shpreson në ndërhyrjen e Këshillit Federal të Zvicrës, duke sugjeruar nevojën për negociata të reja për tarifa doganore më të favorshme, për të ruajtur vijueshmërinë dhe qëndrueshmërinë e bizneseve zvicerane në tregje të ndjeshme si ai amerikan, transmeton albinfo.ch.

Franca tejkalon Gjermaninë në numrin e aplikimeve për azil në BE

Posted on by albinfo.ch

Për herë të parë pas shumë vitesh, Gjermania nuk është më vendi kryesor në Bashkimin Evropian për numrin e aplikimeve për azil. Sipas një raporti të fundit të Komisionit të BE-së, i cili citohet nga gazeta gjermane Welt am Sonntag dhe daton më 2 prill 2025, Franca ka marrë më shumë kërkesa për azil se çdo vend tjetër anëtar në tremujorin e parë të vitit.

Raporti, i konsideruar konfidencial, tregon se nga 1 janari deri më 31 mars të këtij viti, Franca ka regjistruar 40.871 kërkesa për azil, duke e lënë pas Spanjën me 39.318 kërkesa dhe Gjermaninë në vendin e tretë me 37.387 aplikime – që paraqet një rënie prej 41% krahasuar me të njëjtën periudhë të vitit të kaluar, transmeton albinfo.ch.

Në fund të listës gjenden Hungaria me vetëm 22 aplikime dhe Sllovakia me 37. Sa i përket përbërjes kombëtare të azilkërkuesve në Gjermani, sirianët përbëjnë 24% të totalit, të ndjekur nga afganët (16%) dhe turqit (11%).

Raporti vëren se Franca ka marrë gjithashtu numrin më të madh të aplikimeve nga qytetarë ukrainas, duke u kthyer në destinacionin kryesor për këtë kategori azilkërkuesish.

Në tërësi, në hapësirën e BE-së, Zvicrës dhe Norvegjisë, venezuelasit kryesojnë listën e aplikuesve për azil, të ndjekur nga afganët dhe sirianët. Numri i aplikimeve nga qytetarët e Venezuelës është rritur me 44% vetëm në tremujorin e parë të vitit. Po ashtu, është shënuar rritje edhe në kërkesat nga ukrainas, kinezë dhe indianë, ndërsa rënia më e madhe është regjistruar nga sirianët, kolumbianët dhe turqit, shkruan DW.

Këto të dhëna shënojnë një zhvillim të rëndësishëm në hartën e migrimit dhe kërkesave për azil në Evropë, duke reflektuar ndryshime në tendencat globale dhe ndikimin e politikave të brendshme të vendeve pritëse.

Austria zgjat pezullimin e bashkimit familjar për azilkërkuesit për të paktën edhe një vit

Posted on by albinfo.ch

Ministri i Brendshëm i Austrisë, Gerhard Karner (ÖVP), ka konfirmuar se pezullimi i bashkimit familjar për azilkërkuesit do të mbetet në fuqi për të paktën edhe një vit tjetër. Ai e ka arsyetuar këtë vendim si një masë të domosdoshme për të ulur presionin mbi sistemin social të vendit.

Në një deklaratë për gazetën Der Standard, Karner theksoi se rritja e kriminalitetit mes të miturve dhe mbingarkesa në shkolla janë ndër faktorët kryesorë që e justifikojnë këtë masë kufizuese. Ai përmendi gjithashtu një rënie të ndjeshme në numrin e aplikimeve për bashkim familjar – nga rreth 1.500 aplikime në muaj gjatë vitit 2023, në vetëm 60 në muajin shkurt të këtij viti, transmeton albinfo.ch.

Përveç kësaj, Karner njoftoi se Austria është duke eksploruar mundësitë për të rifilluar dëbimet drejt Sirisë në një afat të mesëm, duke përfshirë kthimet vullnetare dhe diskutime në bashkëpunim me Ministrinë e Brendshme të Gjermanisë.

Në kuadër të përpjekjeve për të forcuar sigurinë kombëtare, ministri austriak deklaroi gjithashtu se qeveria po planifikon të avancojë fuqitë e mbikëqyrjes për ekstremistët, duke përfshirë edhe monitorimin përmes aplikacioneve të mesazheve, shkruan The Local.

Masat e propozuara janë pritur me kritika nga grupet për të drejtat e njeriut, ndërsa Karner ka insistuar se këto janë hapa të nevojshëm për “ruajtjen e rendit dhe mbrojtjen e shoqërisë austriake”.

Pas Azisë, nis rënia e tregjeve në Evropë

Posted on by albinfo.ch

Tregjet evropiane të aksioneve kanë shënuar disa rënie masive në orët e para të tregtimit sot. Indeksi FTSE 100 në Londër ka regjistruar një rënie të theksuar prej 6%, pas disa luhatjeve të forta në minutat e para të hapjes së bursës, shkruan BBC.

Në Gjermani, indeksi DAX ka pësuar një rënie dramatike prej 7.6%, pas një uljeje të ndjeshme prej 10% që u shënua në një moment të caktuar. Po ashtu, indeksi CAC 40 i Francës ka rënë me 7%, duke reflektuar një pasiguri të madhe në tregjet e kontinentit.

Tregtimi nisi në bursën e Londrës me një rënie të menjëhershme prej 2.4%, dhe pritet që këto luhatje të vazhdojnë gjatë ditës, duke ngritur shqetësime për stabilitetin e tregjeve të aksioneve evropiane, transmeton albinfo.ch.

Bursat aziatike përjetojnë rënie drastike

Posted on by albinfo.ch

T

Tregjet financiare në Azi janë goditur rëndë këtë të hënë, duke përjetuar rënie të thella si pasojë e përshkallëzimit të luftës tregtare mes Shteteve të Bashkuara dhe Kinës. Pas një jave të trazuar në Wall Street, paniku ka kapluar edhe bursat aziatike, ku investitorët po reagojnë ndaj masave hakmarrëse të shpallura nga Kina ndaj tarifave të reja doganore të vendosura nga administrata e presidentit amerikan, Donald Trump.

Në Bursën e Tokios, rreth orës 00:10 GMT, indeksi kryesor Nikkei ra me 7.44 për qind, duke u ulur në 31,255 pikë. Indeksi më i gjerë Topix pësoi një humbje edhe më të madhe, duke u ulur me 8.14 për qind. Tregu i Seulit ndoqi të njëjtin trend negativ, me indeksin Kospi që shënoi një rënie prej 4.77 për qind, transmeton albinfo.ch.

Bursa e Sidneit në Australi gjithashtu pësoi një goditje të rëndë, me indeksin S&P/ASX 200 që ra me 5.83 për qind.

Ndërkohë, tregjet në Kinë dhe Hong Kong panë rëniet më dramatike. Vetëm pak pas hapjes së tregut, rreth orës 1:30 GMT, indeksi Hang Seng në Hong Kong u rrëzua me 9.28 për qind, duke arritur në 20,730.05 pikë. Në Kinën kontinentale, indeksi i përbërë i Shangait ra me 4.5 për qind, ndërsa një tjetër indeks i saj pësoi një ulje prej 3.01 për qind.

Tregjet tjera në rajon nuk mbetën të paprekura: indeksi i aksioneve në Tajvan ra me gati 10 për qind në sesionin e parë të mëngjesit, ndërsa bursa e Singaporit shënoi një rënie prej 7 për qind, shkruan DW.

Rënia e koordinuar në bursat aziatike është një tregues i frikës globale mbi ndikimet ekonomike të një konflikti tregtar në shkallë të gjerë. Analistët paralajmërojnë se situata mund të përkeqësohet nëse tensionet mes dy ekonomive më të mëdha në botë vazhdojnë të rriten. Investitorët, ndërkohë, janë duke u tërhequr nga aksionet dhe po kërkojnë strehë në asete më të sigurta si ari dhe obligacionet shtetërore.