Informacione personale të 44 zyrtarëve të zgjedhur federalë në Zvicër janë bërë publike në rrjetin e errët, sipas një raporti të kompanisë për sigurinë kibernetike Proton me seli në Gjenevë. Të dhënat e rrjedhura përfshijnë numra telefoni, adresa private dhe fjalëkalime, të cilat mund të shfrytëzohen për qëllime keqdashëse, duke i bërë këta politikanë të cenueshëm ndaj shantazheve apo sulmeve dixhitale, shkruan RTS, transmeton albinfo.ch.

Hetimi tregon se shkeljet kanë ndodhur kur zyrtarët kanë përdorur adresat e tyre zyrtare të email-it për t’u kyçur në platforma të palëve të treta si LinkedIn, Dropbox apo faqe për rezervime dhe takime, për përdorues mbi 18 vjeç. Në total, u zbuluan 145 shkelje të të dhënave që prekën rreth 16% të politikanëve federalë, duke përfshirë edhe anëtarë të Këshillit Federal.

Megjithëse emrat e të prekurve nuk janë bërë publikë, përfshirja e numrave të telefonit dhe adresave private në rrjetin e errët ngrit shqetësime për sigurinë dhe privatësinë e zyrtarëve.

Proton paralajmëron se politikanët mbeten një objektiv i preferuar i kriminelëve kibernetikë, dhe këto rrjedhje mund të shfrytëzohen për fushata dezinformimi ose për presion të padrejtë politik.

Një krahasim ndërkombëtar tregon se situata nuk është më e mirë në vendet fqinje: në Mbretërinë e Bashkuar, sipas studimeve të mëparshme, rreth 68% e zyrtarëve të zgjedhur janë ekspozuar ndaj rrezikut të vjedhjes së të dhënave personale, transmeton albinfo.ch.

Prishja e ndërtesave të vjetra për të ndërtuar njësi të reja banimi po çon në dëbime të shumta të qiramarrësve, duke prekur veçanërisht familjet me të ardhura të ulëta. Ky është përfundimi i një studimi të ETH Zurich, të porositur nga Zyra Federale e Strehimit (OFL) dhe i publikuar të marten, shkruan RTS, transmeton albinfo.ch.

Në përpjekje për të zgjidhur mungesën e banesave në qytetet e mëdha si Gjeneva, Lozana, Berna, Zyrihu dhe Bazeli, autoritetet po zgjedhin gjithnjë e më shpesh prishjen dhe rindërtimin e ndërtesave të vjetra, një praktikë që tani përbën deri në 63% të ndërtimeve të reja – një rritje e madhe krahasuar me fillimin e viteve 2000.

Por ky transformim urban ka një kosto sociale të lartë. Sipas studimit, qiramarrësit e dëbuar kishin të ardhura 30 deri në 40% më të ulëta se mesatarja e popullsisë. Ndërkohë, banesat e reja që zëvendësojnë ndërtesat e prishura okupohen nga persona me të ardhura mesatarisht 15 deri në 39% më të larta se mesatarja.

“Banorët e goditur janë shpesh më të moshuar, refugjatë ose azilkërkues, veçanërisht nga vendet afrikane”, deklaroi David Kaufmann, profesor në ETH Zurich. Fiona Kauer, studente e doktoraturës dhe autore e bashkëstudimit, shtoi se mosha mesatare e personave të dëbuar ishte 5 deri në 12 vjet më e lartë se ajo e banorëve që i zëvendësojnë, duke çuar në më pak diversitet breznor në lagjet e reja, transmeton albinfo.ch.

Ndërsa ndërtimi i banesave të reja synon të përballojë krizën e strehimit, shumica e tyre nuk janë të përballueshme për kategoritë më të rrezikuara. Zëvendësimi i ndërtesave të vjetra me struktura moderne rrit qiratë dhe ul ndjeshëm aksesin për ata që kanë më shumë nevojë për strehim të lirë.

Kreu i OFL-së, Martin Tschirren, theksoi se shumë ndërtesa ekzistuese kanë nevojë për rinovim për të përmbushur standardet e reja të energjisë, gjë që po nxit më tej këtë valë ndërtimeje. Por ai pranoi se ky proces ndryshon përbërjen socio-demografike të lagjeve, transmeton albinfo.ch.

Disa kantone në Zvicër kanë rritur alarmin për rrezik të konsiderueshëm të zjarreve në pyje, si pasojë e temperaturave të larta dhe mungesës së reshjeve. Sipas autoriteteve federale, rreziku është në nivelin 3 nga 5, dhe përfshin kantonet Thurgau, Schaffhausen, Jura, Gjenevë dhe pjesë të Valais-it, shkruan Blick, transmeton albinfo.ch.

Qytetarët në këto rajone këshillohen të tregojnë kujdes të madh me përdorimin e zjarrit në pyje dhe në skajet e tyre. Zjarret lejohen vetëm në vende të posaçme të përcaktuara, për të shmangur përhapjen e mundshme të flakëve.

Në kantonin e Thurgau-t, përveç rrezikut të zjarreve, nga e premtja hyn në fuqi ndalimi i nxjerrjes së ujit, sidomos nga përrenjtë dhe rrjedhat më të vogla. Vendimi vjen si pasojë e nivelit jashtëzakonisht të ulët të ujërave, për shkak të thatësisë së zgjatur.

Megjithatë, disa zona dhe burime janë përjashtuar nga ky ndalim. Liqeni i Konstancës, lumi Rajna, Hüttwilersee dhe Nussbaumersee mbeten të hapura për përdorim, po ashtu edhe ujërat nëntokësore dhe burimet, transmeton albinfo.ch.

Sipas autoriteteve të Thurgau-t, ndalimi prek rreth 13% të ujit të destinuar për bujqësi gjatë periudhave të thatësisë. Kjo masë synon të mbrojë rezervat ujore dhe ekosistemin, në një kohë kur vala e të nxehtit pritet të vazhdojë.

Qeveria federale bën thirrje për vëmendje të shtuar, sidomos në zonat pyjore dhe gjatë aktiviteteve në natyrë, për të parandaluar rrezikun e shpërthimeve të zjarrit në kushte të thata dhe të nxehta, transmeton albinfo.ch.

Turistët që vizitojnë kantonin e Lucernit do të duhet të paguajnë më shumë për çdo natë qëndrim, duke filluar nga viti 2026. Këshilli qeveritar ka paraqitur një projektligj të ri për turizmin, i cili parashikon dyfishimin e tarifës së qëndrimit nga 0.50 në 1.10 franga zvicerane për person, për natë, shkruan Blick, transmeton albinfo.ch.

Ky vendim vjen në kohën kur turizmi në Lucern po arrin nivele rekord. Vetëm në vitin 2024 u regjistruan 2.4 milionë qëndrime brenda natës, një shifër historike për kantonin. Edhe viti 2025 pritet të vazhdojë me të njëjtin ritëm, duke sjellë përfitime për hotelierët dhe bizneset lokale, por edhe sfida për komunitetin vendas, që ndjen presionin e turizmit masiv.

Qëllimi i rritjes së taksës, sipas autoriteteve, është të gjenerohen fonde shtesë për promovimin e qëndrueshëm dhe dixhital të turizmit. Parashikohet që rritja të sjellë rreth 1.3 milion franga të ardhura shtesë në vit, transmeton albinfo.ch.

“Turizmi në Lucern duhet të jetë dritë drejt së ardhmes,” u shpreh këshilltari qeveritar Fabian Peter për Luzerner Zeitung. “Ai paraqet potencialin ekonomik dhe kulturor të kantonit në arenën ndërkombëtare.”

Megjithatë, rritja e taksës shihet më shumë si një masë për financim të zhvillimit të turizmit, sesa një zgjidhje për problemin e mbiturizmit. Vitin e kaluar, qyteti ishte aq i mbingarkuar, saqë disa turistë kaluan natën në parkingje publike. Skena të ngjashme janë parë edhe në vende të tjera zvicerane, që po përballen me sfidat e fluksit të lartë turistik.

Me tarifën e re, Lucerni mbetet në mesataren zvicerane për taksat turistike. Disa vendpushime, si Montreux, aplikojnë tarifa shumë më të larta, deri në 7 franga për natë.

Ligji i ri i turizmit dhe rritja e taksës pritet të shqyrtohen nga këshilli kantonal në muajt në vijim, transmeton albinfo.ch.

Vala e parë e të nxehtit në Zvicër u ndërpre papritur të hënën pasdite nga stuhi të forta, reshje të dendura shiu dhe breshër, veçanërisht në pjesën lindore të vendit. Megjithatë, moti u qetësua shpejt dhe temperaturat filluan të rriten sërish që të martën, duke paralajmëruar rikthimin e vapës së verës, shkruan 20minuten, transmeton albifno.ch.

Sipas MeteoSwiss, e mërkura pritet të jetë dita më e nxehtë e javës, me temperatura që mund të arrijnë deri në 36 gradë Celsius në Sion (kantoni Valais). Në pjesën tjetër të Zvicrës, pritet që termometri të shënojë mbi 30 gradë, me temperatura maksimale prej 32–33 gradë në Bernë, Lugano, Zvicrën perëndimore dhe lindore, ndërsa Cyrihu, Bazeli dhe Gjeneva mund të përjetojnë vlera edhe më të larta.

Autoritetet federale kanë lëshuar paralajmërim për rrezik të moderuar deri të lartë për të gjithë Zvicrën veriore, perëndimore dhe kantonin Ticino. Rreziku për probleme me qarkullimin e gjakut dhe shqetësime fizike është i shtuar, veçanërisht për personat e moshuar dhe ata me sëmundje kronike, transmeton albifno.ch.

Netët gjithashtu nuk do të sjellin freski, me temperatura minimale nga 18 deri në 21 gradë Celsius, çka mund të vështirësojë gjumin. Ekspertët këshillojnë të përdoren metoda natyrale për freskim, si vendosja e kubeve të akullit në pikat e pulsit (kyçet, tëmthat, qafa) dhe të qëndrohet në ambiente të errëta dhe të freskëta gjatë kulmit të vapës.

Pas vapës përvëluese, të enjten pritet një ulje e lehtë e temperaturave dhe reshje shiu. MeteoSwiss njofton për mundësi stuhish të forta, sidomos në zonat malore, me breshër dhe rrebeshe në mëngjes. Temperaturat në ultësira do të bien rreth 26 gradë Celsius, por kjo lehtësim do të jetë i përkohshëm.

Nga fundjava, temperaturat pritet të rriten sërish, duke arritur deri në 32 gradë të dielën në mbrëmje, me mundësi të reja stuhish në horizont.

Zyra e meteorologjisë këshillon qytetarët të shmangin ekspozimin e drejtpërdrejtë në diell gjatë orëve të pikut, të pinë mjaftueshëm ujë dhe të kujdesen për personat vulnerabël gjatë këtyre ditëve të nxehta, transmeton albifno.ch.

Duke filluar nga 1 korriku, në Zvicër hyjnë në fuqi një sërë ndryshimesh ligjore që prekin fusha të ndryshme, nga siguria në trafik e deri te kontrolli i kancerit dhe lufta kundër falsifikimeve. Këto ndryshime synojnë të lehtësojnë procedurat burokratike, të përmirësojnë mbrojtjen shëndetësore dhe të rrisin sigurinë në rrugë, shkruan 20minuten, transmeton albinfo.ch.

Shkatërrimi më i thjeshtë i mallrave të falsifikuara

Pakot që përmbajnë deri në tre produkte të falsifikuara dhe nuk kalojnë pesë kilogramë mund të shkatërrohen më lehtë nga doganat. Nga tani, vetëm personi që ka bërë porosinë do të njoftohet, ndërsa pronari i markës nuk do të informohet më, për të shmangur burokracinë për raste të vogla – veçanërisht për porositë nga faqe si Temu apo Shein.

Paraburgim për vrasje gjatë moshës së mitur

Të rinjtë që kanë kryer vrasje mes moshës 16 dhe 18 vjeç mund të vendosen në paraburgim si të rritur, nëse ekziston rreziku i përsëritjes së veprës. Ky ndryshim zbatohet vetëm nëse personi është bërë madhor në kohën e paraburgimit.

Kontrolli i kancerit i mbuluar deri në moshën 74 vjeç

Sigurimi bazë shëndetësor do të mbulojë kontrollin për kancerin e zorrës së trashë deri në moshën 74 vjeç – më parë kufiri ishte 69. Kjo pasi pothuajse gjysma e rasteve diagnostikohen pas moshës 70 vjeç.

Rregulla të reja për testin e shoferëve

Kandidatët për leje drejtimi do të testohen edhe për përdorimin e sistemeve moderne të asistencës në automjet, si ruajtja e korsisë dhe kontrolli i shpejtësisë. Kjo ka për qëllim përgatitjen më të mirë të shoferëve për teknologjitë e reja, transmeton albinfo.ch.

Risi në rregullat për biçikletat elektrike dhe ato të ngarkesës

Krijohet një kategori e re për “biçikletat e rënda elektrike me motor”, të cilat mund të peshojnë deri në 450 kg. Ndryshime ka edhe në sinjalistikë: simboli “biçikletë” do të vlejë për biçikleta klasike dhe të gjitha nënkategoritë elektrike, përfshirë skuterët me shpejtësi deri në 20 km/orë. Ndërsa simboli “biçikletë me motor” do të përfshijë edhe mjetet e reja të motorizuara të kategorisë së rëndë, transmeton albinfo.ch.