Në disa pjesë të Kosovës, kryesisht në pjesën veriore të vendit, sot janë raportuar erëra të forta.
Instituti Hidrometeorologjik i Kosovës ka njoftuar se, përkundër se parashihet mot me diell dhe vranësira të pakta, nuk përjashtohet mundësia për reshje të izoluara dhe rrufe në disa pjesë të territorit.
Bëhet e ditur se vranësirat mund të sjellin riga shiu dhe rrufe në disa zona.
Temperaturat do të luhaten nga 12 gradë Celsius deri në 16 gradë Celsius në orët e mëngjesit, ndërsa në mesditë do të arrijnë vlerat maksimale prej 26 gradë Celsius deri në 29 gradë Celsius, transmeton albinfo.ch.
Paralajmërohet se era do të fryjë nga verilindja me shpejtësi të lehtë deri mesatare, nga 1 deri në 9 metra për sekondë. IHMK apelon për kujdes të shtuar në zonat ku mund të ketë rrufe, sidomos për ata që qëndrojnë në ambiente të hapura gjatë pasdites.
Një turist 31-vjeçar me origjinë nga Republika Çeke dhe banues në Zvicër u plagos rëndë mbrëmjen e së mërkurës në Majorka, pasi ra nga kati i gjashtë i një hoteli në zonën e njohur Ballermann në Playa de Palma. Sipas raportimeve nga portali lokal “Crónica Balear”, i riu u përpoq të ngjitej nga kati i gjashtë në të pestin përmes shkallëve të emergjencës, por humbi ekuilibrin dhe ra, përcjell albinfo.ch.
Ai u gjet pa ndjenja në tokë dhe u transportua në gjendje kritike në spitalin Son Espases në Palma. Dëshmitarët okularë treguan se ai shfaqi sjellje të çuditshme dhe mund të ketë qenë nën ndikimin e drogës ose alkoolit. Dyshohet gjithashtu se paraprakisht kishte pasur një konflikt me personelin e sigurisë së hotelit.
Policia ka nisur një hetim për të sqaruar rrethanat e sakta të ngjarjes. Ky është rasti i dytë i ngjashëm këtë verë në të njëjtën zonë, pasi në fillim të korrikut një turist gjerman 20-vjeçar humbi jetën duke u përpjekur të hidhej në pishinë nga ballkoni i hotelit. Autoritetet po bëjnë thirrje për më shumë kujdes dhe respektim të rregullave të sigurisë në vendet turistike.
Një në katër të rritur pret që gjendja e tyre financiare të përkeqësohet këtë vit krahasuar me vitin 2024, përcjell albinfo.ch.
Përveç kësaj, pothuajse një në tre persona në Zvicër ka vështirësi të mbulojë të gjitha shpenzimet e tyre.
Kjo tregohet nga një sondazh i Comparis.
Kostot e larta për qiranë dhe primet e sigurimit shëndetësor, si dhe frika nga humbja e vendit të punës, po ushtrojnë presion mbi besimin financiar, siç tregon një sondazh përfaqësues nga portali i krahasimit të çmimeve Comparis.
Një shkollë në Eschenbach, kantoni St. Gallen, ia mohoi punësimin një mësueseje sepse ajo mban hixhab, një mbulesë koke myslimane, përcjell albinfo.ch.
Aplikimi i saj për këtë punë shkaktoi protesta të forta midis prindërve, të cilët mendonin se arsimi neutral i fëmijëve të tyre ishte në rrezik.
Në fund, shkolla iu dorëzua presionit të prindërve, duke vendosur përfundimisht kundër punësimit të gruas.
Nuk ka një ndalim të përgjithshëm për shamitë në shkollat në Zvicër, por raste të ngjashme kanë dalë vazhdimisht gjatë viteve.
Për shembull, në vitin 1997, një mësuese shkolle fillore në Gjenevë u pushua nga puna sepse nuk e hoqi shaminë gjatë orës së mësimit. Gruaja paraqiti një ankesë kundër këtij vendimi, por Gjykata Federale e hodhi poshtë atë.
Më pas, Gjykata Evropiane e të Drejtave të Njeriut vendosi gjithashtu se e drejta e nxënësve për arsim jofetar në një shkollë publike ishte më e rëndësishme se liria fetare.
Presidentja e Kosovës, Vjosa Osmani, ka pritur në takim të ngarkuarën me punë të Shteteve të Bashkuara të Amerikës në Kosovë, Anu Prattipati, përcjell albinfo.ch.
Gjatë takimit u diskutua për vizitën e fundit të Presidentes Osmani në SHBA, takimet e shkëlqyera të zhvilluara me zyrtarë të lartë të administratës “Trump”, si dhe për çështje të tjera me interes të përbashkët.
“Osmani rikonfirmoi përkushtimin e Kosovës për avancimin e mëtejmë të marrëdhënieve bilaterale, duke përfshirë hapjen e kapitujve të rinj të bashkëpunimit me SHBA-në, me theks të veçantë në fushat e ekonomisë dhe të mbrojtjes”, thuhet në njoftim.
Po ashtu, bëhet e ditur se gjatë këtij takimi u diskutua edhe për zhvillimet e fundit në vend, me fokus në hapat e mëtejmë drejt konstituimit të Kuvendit në dritën e vendimit të fundit të Gjykatës Kushtetuese, si dhe për zhvillimet në fushën e sigurisë.
Yulia Svyrydenko, ekonomistja 39-vjeçare dhe ish-zëvendëskryeministrja e parë, është konfirmuar nga parlamenti ukrainas si kryeministrja e re e Ukrainës, kanë bërë të ditur ligjvënësit, përcjell albinfo.ch.
Svyrydenko ka luajtur një rol kyç në negociatat me Shtetet e Bashkuara të Amerikës lidhur me marrëveshjen për mineralet e rralla, teksa, sipas agjencisë së lajmeve Reuters, “nominimi i saj i dërgon mesazh të qartë Washingtonit se Kievi i ka për prioritet marrëdhëniet”.
Ajo ka zëvendësuar kryeministrin e mëparshëm, Denys Shmyhal, i cili kishte shërbyer në këtë post për pesë vjet, mandati më i gjatë në historinë e Ukrainës.
Kryeministri në largim pritet të marrë një post të ri në kabinetin qeveritar, atë të ministrit të Mbrojtjes, duke e zëvendësuar ministrin aktual, Rustem Umerov.
Në mesin e këtij riorganizimi të madh qeveritar, burimet ukrainase kanë sugjeruar se Umerov pritet të shpallet ambasadori i ri i vendit në Shtetet e Bashkuara të Amerikës.
Priten edhe ndryshime të tjera në nivele të larta, me mbrojtjen dhe sektorin digjital që shihen si prioritetet kryesore për qeverinë e re.
Pas një periudhe të gjatë me mungesë ngjarjesh të qëndrueshme kulturore, Gjakova po ringjallet përmes edicionit të dytë të festivalit “Ditët e shqiptarit”, që zhvillohet nga 18 korriku deri më 10 gusht. Organizuar nga “Fondacioni për Gjakovën”, festivali sjell 22 koncerte, gara sportive tradicionale, panaire të gastronomisë dhe aktivitete të tjera që vendosin theksin te identiteti kulturor shqiptar, përcjell albinfo.ch.
Me skena në Çarshinë e Madhe, parkun “Ali Podrimja” dhe “Çarshinë e Jupave”, Gjakova shndërrohet në epiqendër të artit dhe traditës, duke mirëpritur artistë si Eugent Bushpepa, Elina Duni, Jericho, Eda Zari e shumë të tjerë. Pjesë e programit janë edhe diskutimet me figura të njohura si sopranoja Ermonela Jaho dhe shkrimtari Kim Mehmeti.
Ky festival synon jo vetëm të pasurojë jetën kulturore lokale, por edhe të forcojë imazhin e Gjakovës si destinacion i turizmit kulturor. Një fazë tjetër e festivalit, “Ditët e nëntorit”, pritet të zhvillohet në nëntor me disa ngjarje madhore që do të shpallen së shpejti.
Së fundmi, Komisioni Evropian e ka propozuar të mërkurën një buxhet prej 2 trilionë eurosh për Bashkimin Evropian për periudhën 2028-2034, duke vendosur theks të ri mbi konkurrueshmërinë ekonomike dhe mbrojtjen, përcjell albinfo.ch.
“Ky është një buxhet që i përgjigjet ambicies së Evropës, që përballet me sfidat e saj dhe që forcon pavarësinë tonë”, tha presidentja e Komisionit Evropian, Ursula von der Leyen, para gazetarëve në Bruksel.
“Buxheti është më i madh. Është më i zgjuar dhe më i mprehtë. Ai jep rezultate për qytetarët dhe bizneset tona, për partnerët tanë dhe për të ardhmen tonë”, shtoi ajo.
Komisioni tha se propozimi përfaqëson 1.26 për qind të Prodhimit Kombëtar Bruto të Bashkimit Evropian me 27 vende anëtare, një matës i madhësisë së ekonomisë, krahasuar me 1.13 për qind në buxhetin e tanishëm shtatëvjeçar.
Buxheti i ri duhet të miratohet nga të gjitha vendet anëtare dhe të nënshkruhet nga Parlamenti Evropian.
Propozimi përfshin 451 miliardë euro për Fondin e ri të Konkurrueshmërisë Evropiane, i fokusuar në forcimin e industrisë së mbrojtjes, nxitjen e inovacionit dhe mbështetjen e tranzicionit të industrisë drejt energjisë së pastër në të gjithë bllokun.
Po ashtu, ndahen 131 miliardë euro në veçanti për mbrojtjen dhe hapësirën, një rritje pesëfish në krahasim me shkallën e tanishme, sipas Komisionit.
Gjithashtu, parashikohen 302 miliardë euro për të mbështetur fermerët dhe të paktën 218 miliardë euro për rajonet më pak të zhvilluara të Evropës, si dhe 200 miliardë euro për programe globale.
Shumica e fondeve për buxhetin vijnë nga qeveritë e vendeve anëtare të BE-së.
Megjithatë, Komisioni propozoi disa mënyra për t’i rritur fondet drejtpërdrejt për buxhetin, përfshirë një taksë të re ndaj kompanive që bëjnë biznes në Evropë dhe që kanë një qarkullim vjetor neto mbi 100 milionë euro në një vend të BE-së.
Disa vende të BE-së dhe ligjvënës e kritikuan menjëherë këtë propozim.
“BE-ja është e rëndësishme për mirëqenien tonë, por buxheti i propozuar është shumë i lartë”, tha ministri holandez i Financave, Eelco Heinen.
Parlamenti Evropian, nga ana tjetër, tha se propozimi i Komisionit nuk ishte mjaftueshëm i madh.
“Nuk mund të bëjmë më shumë me më pak. Prioritetet e reja kërkojnë burime të reja dhe të duhura, jo shkurtime të prioriteteve ekzistuese”, tha Siegfried Mureșan, eurodeputet i qendrës së djathtë dhe negociator për buxhetin e ardhshëm të BE-së.
Debatet për buxhetin janë ndër më të vështirat në politikën e BE-së, sepse nxjerrin në pah ndarjet politike dhe ekonomike mes vendeve anëtare.
Bisedimet në muajt në vijim pritet të theksojnë tensionet politike mes përpjekjeve për të rritur financimet për prioritetet e reja dhe ruajtjen e investimeve tradicionale në bujqësi dhe zhvillim rajonal.
Mësohet se mjetet financiare të BE-së për procesin e zgjerimit, nga viti 2028, do të jenë shumë më të mëdha sesa që janë tani, për t’u përshtatur me progresin e përshpejtuar të vendeve kandidate. Këtë e ka bërë të ditur të enjten komisionerja për Zgjerim, Marta Kos, duke folur për pjesën kushtuar zgjerimit në kuadër të kornizës shumëvjeçare financiare, që të mërkurën e ka propozuar Komisioni Evropian.
Thuhet se nga të gjitha vendet e përfshira në procesin e zgjerimit, vetëm Kosova nuk e ka formalisht statusin e vendit kandidat, për çka ka mbetur jashtë disa nismave në disa institucione të BE-së.
Referuar komisioneres Kos, Kosova nuk do të ketë pengesa për të përfituar nga mjetet financiare të BE-së, të dedikuara vendeve në procesin e zgjerimit, edhe në periudhën e ardhshme.
“Kur është fjala për Kosovën, ajo do të mbetet pjesë e këtyre instrumenteve financiare, siç ka qenë edhe deri më tani. Siç e dini, Kosova është tashmë edhe pjesë e Planit të Rritjes për Ballkanin Perëndimor”, ka thënë Kos.
Ajo ka përsëritur atë që një ditë më herët e ka thënë edhe presidentja e Komisionit Evropian, Ursula von der Leyen, se zgjerimi është identifikuar si prioritet edhe në propozimin e buxhetit shtatëvjeçar të BE-së, që përfshin periudhën nga viti 2028 deri në vitin 2034.
“Zgjerimi nuk e bën Bashkimin Evropian vetëm me sipërfaqe më të madhe dhe me numër më të madh banorësh. Zgjerimi ka të bëjë me unifikimin e Evropës. Duke rritur mbështetjen për të gjithë ata që plotësojnë kushtet e anëtarësimit, ne jemi në rrugën e duhur për të bashkuar Evropën tonë”, ka theksuar Marta Kos.
Ajo ka theksuar gjithashtu se përdorimi i mjeteve të BE-së nga vendet e përfshira në procesin e zgjerimit do të jetë i kushtëzuar me përmbushjen e kritereve përkatëse, ndërsa vendet do të vlerësohen në bazë të meritave individuale.
Ka thënë se për momentin Mali i Zi dhe Shqipëria janë duke avancuar shumë shpejt, ndërsa pret që këtë rrugë ta ndjekin edhe vendet e tjera të rajonit.
Komisioni Evropian ka propozuar një kornizë buxhetore prej 2 trilionë eurosh, nga të cilat 200 miliardë do të jenë në kuadër të programit “Evropa Globale”. Kjo përfshin zgjerimin, fqinjësinë, ndihmën humanitare dhe ndihmën zhvillimore të BE-së në botë. Nga kjo shumë, për zgjerimin pritet të dedikohen 42.6 miliardë euro, që përbën një rritje domethënëse krahasuar me kornizën e tanishme financiare, për të cilën janë ndarë 31 miliardë euro. Po ashtu, 100 miliardë euro për ndihmë të veçantë për Ukrainën nuk janë pjesë e kësaj pakete.
Pas propozimit të Komisionit Evropian, do të pasojnë negociatat me Parlamentin Evropian dhe vendet anëtare, për të aprovuar këtë propozim. Afati i fundit për të arritur pajtimin është viti 2027, kur përfundon edhe korniza aktuale financiare.
Ministri i Punëve të Brendshme, Xhelal Sveçla, e ka konfirmuar edhe njëherë arrestimin e eprorit policor Bojan Jevtic, në operacionin kundër spiunazhit të ndërmarrë nga Prokuroria Speciale, Agjencia Kosovare e Inteligjencës dhe Inspektorati Policor i Kosovës, përcjell albinfo.ch.
Sveçla ka thënë se Jevtic është arrestuar nën dyshimin për veprimtari të kundërligjshme të spiunazhit për llogari të strukturave të sigurisë së Serbisë, shkruan Reporteri.net.
“Fatin e këtyre rasteve do ta ketë edhe kushdo tjetër që përpiqet të minojë punën dhe rolin e besuar në Polici. Ndaj, si çdo herë, do të jemi të pakompromistë dhe vigjilentë përballë çdo përpjekjeje që, nëpërmjet hapësirës që vendi ynë u jep në Polici, të kthehet në sulm ndaj Republikës sonë”, ka shkruar Sveçla.
Ai ka lavdëruar institucionet e sigurisë për këtë aksion.
“Profesionalizmi, bashkëpunimi dhe bashkërendimi i institucioneve të sigurisë të Republikës së Kosovës edhe këtë herë ka treguar se është thelbësor në arritjen e rezultateve në luftën kundër veprimtarive të kundërligjshme, në mënyrë specifike atyre me rrezikshmëri të lartë, që shpeshherë e kanë burimin në strukturat e inteligjencës serbe”, ka shkruar Sveçla.
Së fundmi Fondi Monetar Ndërkombëtar (FMN) e ka hequr Kosovën nga lista e Shteteve në Situatë të Brishtësisë dhe Konfliktit, përcjell albinfo.ch.
Këtë e ka bërë të ditur Banka Qendrore e Kosovës përmes një postimi në Facebook.
“Banka Qendrore e Republikës së Kosovës (BQK) shpreh mirënjohjen e thellë ndaj FMN-së për këtë njohje të rëndësishme të progresit institucional dhe qëndrueshmërisë makro-financiare të Kosovës”, thuhet në njoftim.
Të njëjtin veprim e ka bërë edhe Banka Botërore ditë më parë.
Heqjen e Kosovës nga kjo listë Banka Qendrore e Kosovës (BQK) e pati vlerësuar si moment domethënës, që pasqyron progresin e vazhdueshëm të vendit në forcimin e qëndrueshmërisë institucionale, stabilitetit makroekonomik, qeverisjes financiare dhe sundimit të ligjit.
BQK-ja ka listuar disa nga përfitimet kryesore që priten për Kosovën pas këtij vendimi.
“Përmirësim të perceptimit ndërkombëtar për stabilitetin institucional dhe ekonomik të vendit; Rritje të besimit të investitorëve dhe ulje të vlerësimeve për rrezik financiar; Mundësi më të favorshme për financim zhvillimor dhe qasje në kapital privat; dhe Komplementon vlerësimin e parë të sovran kreditor të Kosovës, që konfirmon trendin pozitiv në qeverisje dhe themelet ekonomike të vendit”, thuhet në komunikatë.
Ne e dimë që Zvicra është një vend kompleks nga ana gjuhësore, me katër gjuhë zyrtare.
Por vetë gjermanishtja zvicerane ka shumë dialekte, dhe një në veçanti po shkakton probleme në kantonin Fribourg.
Kantoni është zyrtarisht dygjuhësh, pasi ndodhet në lumin Sarine, vija jozyrtare midis Zvicrës frëngjishtfolëse dhe asaj gjermanishtfolëse.
Brenda kantonit ekziston vetëm një distrikt që flet plotësisht gjermanisht: Distrikti Sense. Ai ka dialektin e vet, gjermanishten Sensler.
Është aq i fortë, sa mjekët në spitalin kantonal, i cili flet kryesisht frëngjisht, kanë probleme të kuptojnë pacientët nga rajoni, edhe pse i gjithë stafi flet gjermanisht të shkëlqyer, transmeton albinfo.ch.
Kjo ka bërë që pacientët nga zona të zgjedhin spitalet në kantonin e Bernës në të kaluarën, pasi komunikimi me stafin bernez është më i lehtë.
Prandaj, spitali i Fribourg tani po zhvillon kurse në gjermanishten Sensler, me shpresën se vendasit do të ndihen më të qetë dhe do të jenë në gjendje të përcjellin më mirë simptomat e tyre.
Një mjek, Hugo Estuelle, i tha RTS-së se 80 për qind e diagnozës bazohet në atë që thotë pacienti. Nëse nuk mund të kuptohet, mund të ketë pasoja.
Nuk është më thjesht qyteti i administratës, i ditës së vrullshme dhe natës së qetë. Këtë verë, Prishtina është transformuar në një laborator të gjallë kulturor, ku diaspora është jo vetëm e ftuar, por në qendër të vëmendjes. Me një program të pasur koncertesh, ekspozitash, festivalesh dhe aktivitetesh komunitare, kryeqyteti po shpalos një faqe të re të mikpritjes për ata që e ndjejnë vendlindjen në zemër, sado larg të jenë fizikisht.
Në një bisedë me drejtoreshën e Kulturës së Prishtinës, Sibel Halimi, albinfo.ch ka mësuar më shumë për këtë transformim:
“Po e shndërrojmë çdo hapësirë publike në një përvojë kulturore, nga ndërtesat ikonike deri te sheshet dhe lagjet. Diaspora nuk është vizitore, është pjesë aktive e këtij qyteti.” Sibel Halimi
Festival pas festivali, Prishtina nuk fle!
Sezoni i ngjarjeve verore në Prishtinë ka nisur me BeerFest Kosova, një festival që shënoi kulmin e qershorit me birra artizanale, muzikë live dhe një atmosferë që grumbulloi të rinj dhe familje nga Kosova e mërgata. Organizuar në një hapësirë të gjelbër në periferi të qytetit, festivali krijoi një mikrokozmos komuniteti të lirë, të buzëqeshur dhe të bashkuar përmes gotave të ngritura e tingujve të ritmit.
Menjëherë pas kësaj, më 2 korrik, Prishtina pret MC Kreshën dhe Lyrical Son, dy figura që kanë ndërtuar një urë simbolike mes gjeneratave të reja në vend e jashtë. Koncerti në AMC Hall nuk është vetëm një ngjarje muzikore, por një takim i gjuhës urbane me emocionin e kthimit në shtëpi. Kjo performancë është kurorëzimi i një skene që flet në shqip, por me botën në mendje.
Dashni e vjetër, vallëzim i ri: rikthimi i Armend Rexhepagiqit
Më 19 korrik, në një natë që premton nostalgji dhe ndjenja të forta, Prishtina mirëpret “Dashni e Vjetër x Rave 15y” me Armend Rexhepagiqin, në një koncert që pritet të ngjallë kujtime dhe t’i vërë të gjithë në këmbë. E vendosur në një ambient të hapur nën qiellin e verës, kjo natë do të jetë një reflektim i thellë mbi muzikën që na ka lidhur ndër vite dhe një afirmim se dashnia për vendin dhe njëri-tjetrin nuk vjetrohet kurrë.
Kjo është më shumë se koncert. Është rrëfim kolektiv i një populli që e ruan emocionin përmes tingullit. E veçanta? Kjo ngjarje organizohet edhe si pjesë e programit për diasporën, duke e kthyer skenën në një tokë ku emocionet e largësisë zbuten nga refreni.
Akull n’verë: një qytet që di të freskojë shpirtin
Nga mesi i korrikut deri më 15 gusht, Prishtina “ftohet” në mënyrën më kreative me edicionin veror të Akull n’Verë, një projekt urban që kombinon shfaqje filmi, pije freskuese, instalacione akulli dhe performanca të vogla në sheshin “Zahir Pajaziti”. Është një platformë për bashkim kulturash, gjeneratash dhe për t’u çlodhur në qendër të kryeqytetit.
Në këtë hapësirë, fëmijët e diasporës, të rinjtë e Prishtinës dhe të rriturit që kërkojnë nostalgjinë në hijen e qytetit gjejnë një vend të përbashkët, një oaz bashkimi që mbledh ndjesi të largëta në një gotë lëng frutash me akull. Kjo është Prishtina urbane që frymëzon përbashkimin.
Sunny Hill Festival: kur Prishtina bëhet qendër globale
Kulmi i të gjitha ngjarjeve padyshim mbetet Sunny Hill Festival, i cili këtë vit do të mbahet më 1-3 gusht. I themeluar nga Dua Lipa dhe familja e saj, festivali është më shumë se një ngjarje muzikore; është një fushatë për imazhin dhe kulturën e Kosovës. Prishtina, për tri net, kthehet në një metropol global ku takohen superyje si Peggy Gou, Fatboy Slim, Anyma dhe artistë vendorë me potencial të jashtëzakonshëm.
Festivali nuk ofron vetëm muzikë, por edhe kamping, arte vizuale, kulinari dhe bashkëpunime ndërkombëtare, duke e bërë atë vendin më të rëndësishëm për diasporën që kërkon lidhje me atdheun në mënyrën më moderne e të lirë. Për shumë të rinj nga diaspora, Sunny Hill është pika ku dashuria për origjinën lind për herë të parë përmes artit.
Art dhe ekspozita: e ardhmja e kulturës është këtu
Këtë verë, Galeria 17 strehon ekspozitën “Artist of the Day After Tomorrow”, një projekt ambicioz që përmbledh artistët më premtues të dy dekadave të fundit në Kosovë. Deri më 5 shtator, publiku mund të shohë një arkiv të pasur me piktura, instalacione, video-art dhe materiale të rralla që dokumentojnë tranzicionin e vendit përmes syrit të artistëve.
Ekspozita vjen si një thirrje për reflektim mbi të shkuarën dhe një hap i guximshëm drejt së ardhmes kulturore. Kjo është një dhuratë e veçantë për diasporën intelektuale, për artistët e rinj që kërkojnë frymëzim dhe për këdo që e sheh artin si mjet komunikimi mes brezash dhe botësh të ndara.
Fuqia e bashkëpunimit dhe rikthimit emocional
Sipas Sibel Halimit, Prishtina ka krijuar ura bashkëpunimi me shoqatat e diasporës, me qëllim që të përmirësohet përvoja e çdo bashkatdhetari në kryeqytet. Nga pjesëmarrja në tryeza artistike e deri te përfshirja në punëtori dhe festivale, diaspora është më shumë se spektatore, është bashkëkrijuese. Ky vizion përfshin edhe nisma të reja që synojnë rritjen e rolit të diasporës në jetën kulturore: programe rezidenciale për artistë nga mërgata, bursa për të rinj dhe mbështetje për projekte mediatike e kreative që lidhen me Kosovën. Është një lidhje me rrënjë të thella që po gjelbëron nëpër galeri, sheshe dhe net verore.
Në verën e vitit 2025, Prishtina është më shumë se një kryeqytet. Është një përqafim i madh për ata që rikthehen, një skenë për ëndrrat e reja dhe një vend ku ritmi i qytetit përputhet me ritmin e zemrës. Me muzikë, art, sport, panaire dhe frymëzim, qyteti bën atë që duhet të bëjë një kryeqytet modern: të mirëpresë, të frymëzojë dhe të lidhë njerëzit me njëri-tjetrin.
Nëse keni kohë vetëm për një destinacion këtë verë, bëjeni atë Prishtinën. Sepse këtu, verës i shtohet kuptimi dhe kthimit i shtohet ndjenja.
Kulmi mbetet Sunny Hill Festival
Foto: Albinfo.ch
Kulmi i të gjitha ngjarjeve padyshim mbetet Sunny Hill Festival, i cili këtë vit do të mbahet më 1 deri më 3 gusht. I themeluar nga Dua Lipa dhe familja e saj, festivali është më shumë se një ngjarje muzikore; është një fushatë për imazhin dhe kulturën e Kosovës. Prishtina, për tri net, kthehet në një metropol global ku takohen superyje si Peggy Gou, Fatboy Slim, Anyma dhe artistë vendorë me potencial të jashtëzakonshëm.
Gazeta gjermane “Sport Bild” raporton se Bayer Leverkusen ka refuzuar një ofertë prej 8 milionë eurosh nga Neom SC për Granit Xhakën.
Në negociatat në vazhdim mes klubit saudit dhe klubit gjerman të Bundesligës, gjithsesi mund të jetë vetëm çështje kohe para se transferimi të konkretizohet.
Neom i ka ofruar Xhakës një pagë shumë të majme dhe Leverkuseni është bërë më i hapur ndaj mundësisë që 32-vjeçari të largohet, transmeton albinfo.ch.
“Kicker” raportoi kohët e fundit se drejtuesit e Leverkusenit besojnë se Aleiks Garsia dhe Robert Andriq mund të kompensojnë në mënyrë efektive mungesën e Xhakës në këtë repart.
Klubi gjerman tani kërkon 20 milionë euro për Xhakën, çka bie ndesh me raportimet e mëparshme që sugjeronin një vlerësim prej 8 deri në 15 milionë euro për veteranin zviceran.
Gjithsesi, Neom përsëri mund ta përballojë financiarisht marrëveshjen.
Për Xhakën janë të interesuar edhe klubet angleze, ndër to edhe Sunderland.
Për Granitin flitej se do t’i bashkohej Milanit, por kjo nuk ndodhi, derisa edhe Interi nuk është në garë më për kapitenin e Zvicrës.
Raportohet se një 23-vjeçar me origjinë shqiptare ka ndërruar jetë tragjikisht ditën e djeshme në Treviso të Italisë, pasi automjeti që drejtonte doli nga rruga gjatë një ndjekjeje policore, përcjell albinfo.ch.
Mediat italiane raportojnë se viktima është identifikuar si Kevin Anghele. I riu po udhëtonte me një automjet tip Alfa Romeo Brera, kur në përpjekje për t’iu shmangur një kontrolli të policisë, ka humbur kontrollin mbi makinën dhe është përplasur me një pemë anës rrugës.
Përplasja ka qenë fatale, duke i shkaktuar vdekjen e menjëhershme në vendngjarje.
Gjatë kontrollit të zonës ku ndodhi aksidenti, policia italiane gjeti pranë automjetit disa doza kanabisi, të cilat dyshohet se i riu i kishte me vete në momentin e ngjarjes. Ende nuk dihet nëse droga ishte arsyeja e përpjekjes për t’u larguar nga patrulla.
Sipas Corriere della Sera, Kevin Anghele kishte jetuar deri vonë me familjen në Motta di Livenza, por së fundmi ishte zhvendosur në rajonin e Friuli Venezia Giulia, në zonën e Pordenones.
Autoritetet italiane kanë nisur hetimet për të zbardhur plotësisht rrethanat e aksidentit dhe për të kuptuar arsyet që çuan në ndjekjen policore.
Sot zhvillohet seanca e 48-të me radhë në përpjekje për të konstituar Kuvendin e Kosovës, i cili vazhdon të mbetet në ngërç institucional që prej mbledhjes së parë më 15 prill, përcjell albinfo.ch.
Deputetët do të takohen sërish në një tjetër tentativë për të tejkaluar bllokadën që ka shënuar procesin, i cili që nga fillimi ka vijuar me ndryshime të shpeshta çdo 48 orë, por pa asnjë rezultat konkret.
Seanca do të nisë nga ora 11.
Tashmë janë bërë plot tre muaj qëkur seanca konstituive është hapur, e as të martën e kësaj jave deputetët nuk i dhanë zgjidhje ngërçit të krijuar në Kuvend. As në tentimin e 47-të, legjislatura e nëntë nuk u konstitua. E, sikurse herët e tjera, përfaqësues të dy taborëve politikë akuzuan prapë njëri-tjetrin për dështime.
Një operacion me dyshimet për spiunazh ka filluar në Kosovë, përcjell albinfo.ch.
Nën udhëheqjen e Prokurorisë Speciale, operacioni po kryhet në bashkëpunim me Inspektoratin Policor dhe Agjencinë për Inteligjencë.
Operacioni është ende në zhvillim dhe, për shkak të ndjeshmërisë, detajet, thotë Prokuroria, do të bëhen publike më vonë.
Komunikatë e përbashkët Prokuroria Speciale e Republikës së Kosovës Inspektorati Policor i Kosovës
Prishtinë, 17 korrik 2025 Prokuroria Speciale e Republikës së Kosovës njofton opinionin publik se, nën udhëheqjen e saj, është duke u zhvilluar një operacion në bashkëpunim me Inspektoratin Policor të Kosovës dhe Agjencinë e Kosovës për Inteligjencë, në lidhje me dyshimet për kryerjen e veprës penale të spiunazhit.
Operacioni është ende në zhvillim dhe, për shkak të ndjeshmërisë së hetimeve, më shumë detaje do të bëhen publike pas përfundimit të operacionit.
Prokurori i Shtetit do të ndërmarrë të gjitha veprimet e nevojshme hetimore në përputhje me ligjet në fuqi.
Alesia Toska ka përmbyllur me sukses një kapitull të rëndësishëm dhe të ndritur të jetës së saj akademike, duke u diplomuar në Universitetin prestigjioz të Sapiences në Romë, shkruan albinfo.ch.
Universitetin Sapiences në Romë vlerësohet si një ndër institucionet më prestigjioze të arsimit të lartë në Itali dhe Evropë.
Ajo ka arritur të shkëlqejë gjatë gjithë rrugëtimit të saj universitar, duke e përfunduar studimin me maksimumin e notave.
Ky arritje e lartë është dëshmi e përkushtimit, punës së palodhur dhe talentit të saj, dhe një shembull frymëzues për të gjithë të rinjtë që synojnë ekselencën në fushën e arsimit.
Diploma nga një prej universiteteve më të njohura në Evropë i hap rrugë mundësive të shumta për Alesian në të ardhmen akademike dhe profesionale. /Albinfo.ch
Sipas shkencëtarëve, deri në vitin 2030 ngrohja globale mund të kalojë 1.5°C, duke shkaktuar ekstreme klimatike dhe “stuhinë e shekullit”. Vetëm në qershor dhe korrik, Evropa përjetoi valë të fuqishme të të nxehtit me temperatura mbi 40°C, që sollën rritje të numrit të vdekjeve. Më shumë se 1.500 vdekje shtesë u shënuan në 12 qytete në fund të qershorit.
Vitin e kaluar, Evropa u godit nga përmbytjet më të rënda që nga viti 2013, me 335 viktima dhe dëme prej 18 miliardë eurosh. Ndërkohë, thatësirat dhe stuhitë e forta po bëhen më të zakonshme, duke rritur edhe rrezikun e zjarreve.
Valët e të nxehtit jo vetëm që po bëhen më të gjata dhe më të shpeshta, por edhe kufijtë e stinëve po ndryshojnë. Këtë verë, stuhi të forta me breshër mbi 5 centimetra u regjistruan në fund të qershorit dhe korrikut.
Nëse emetimet e CO₂ vazhdojnë në nivelet aktuale, planeti mund të tejkalojë limitin 1.5°C brenda tre viteve të ardhshme. Kjo për shkak se buxheti global i karbonit është zvogëluar nga 500 miliardë ton në vitin 2020, në vetëm 130 miliardë ton në fillim të vitit 2025. Aktualisht, bota emeton rreth 40 miliardë ton CO₂ në vit.
Piers Forster, drejtor i Qendrës Priestley në Universitetin e Leeds, paralajmëroi se gjërat po shkojnë në drejtimin e gabuar dhe se po përjetojmë ndryshime ekstreme, nga ngrohja globale deri te ngritja e nivelit të detit.
Çdo rritje shtesë e temperaturave përkeqëson fenomenet ekstreme të motit, përfshirë shkrirjen e akullnajave dhe përmbytjet. Ekspertët theksojnë se ulja e emetimeve në dekadën e ardhshme është vendimtare për të ngadalësuar këtë trend.
Në SHBA, stuhitë e fuqishme që godasin Bregun Lindor po bëhen më të forta dhe më të rrezikshme, sipas një studimi të ri. Këto stuhi ndodhin nga shtatori deri në prill, kur masat e ftohta të ajrit arktik përplasen me rrymat më të ngrohta nga Atlantiku. E ashtuquajtura “stuhi e shekullit” në mars të vitit 1993 mbetet ndër më shkatërrueset, por ekspertët paralajmërojnë se stuhitë e ardhshme mund të jenë edhe më të forta.
Në gjashtëmujorin e parë të vitit 2025, Shqipëria ka regjistruar një rritje të ndjeshme të numrit të automjeteve elektrike. Sipas të dhënave të Drejtorisë së Përgjithshme të Shërbimeve të Transportit Rrugor (DPSHTRR), deri në qershor janë regjistruar gjithsej 2.323 automjete elektrike, që përfaqëson një rritje prej 82 për qind krahasuar me të njëjtën periudhë të vitit 2024.
Gjatë muajve janar deri në qershor 2025, 25.2 për qind e automjeteve të regjistruara për herë të parë ishin elektrike, duke reflektuar një prirje në rritje të përdoruesve drejt teknologjive të pastra dhe të qëndrueshme.
Flota totale e mjeteve elektrike në vend arriti në 8.701 automjete në qershor 2025, një rritje prej 36 për qind krahasuar me vitin e kaluar. Edhe automjetet hibride kanë shënuar rritje, ku 51 për qind e mjeteve të regjistruara rishtazi gjatë këtij viti janë elektrike ose hibride plug-in.
Kjo tendencë ka ndikuar drejtpërdrejt në reduktimin e ndotjes, me 11 milionë kilogramë më pak CO₂ të emetuar në atmosferë çdo vit, duke kontribuar ndjeshëm në përmirësimin e cilësisë së ajrit. Sipas DPSHTRR-së, ulja e ndotësve atmosferikë ka arritur gati 383 metra kub, një hap i rëndësishëm për mbrojtjen e mjedisit.
Gjithashtu, 74 për qind e autoveturave të regjistruara në këtë periudhë i përkasin kategorisë Euro 5 ose standardeve më të larta, duke treguar progres të vazhdueshëm drejt një parku automjetesh më ekologjik dhe më të pastër.
