Archives

Ambasadorët: Politikanët po e zhgënjejnë popullin

Posted on by Drin Reçica

Ambasadorët e vendeve të huaja të premten kanë marrë pjesë në seancën konstituive të Kuvendit, e cila dështoi të prodhonte rezultat edhe këtë herë, përcjell albinfo.ch.

Shefi i Zyrës së Bashkimit Evropian në Kosovë, Aivo Orav, ka thënë se në Kuvend shkuan me shpresë të madhe se sot do të kishte diçka të re. Ai e ka quajtur të domosdoshme krijimin e institucioneve sa më parë.

“Ne erdhëm me shpresë të madhe këtu dhe, fatkeqësisht, asgjë nuk ndodhi sërish. Kosovës i nevojitet një Kuvend menjëherë, i duhet një qeveri e re që do ta ndërtonte një urë të re të fortë mes Kosovës dhe Brukselit që ta përshpejtojë rrugëtimin e saj drejt BE-së”, ka thënë ai.

Ndërsa ambasadori i Gjermanisë në Kosovë, Jorn Rohde, ka thënë se politikanët po e zhgënjejnë popullin.

“Klasa politike po e zhgënjen popullin e vet dhe është shumë shqetësuese. Vendimi i djeshëm i gjykatës ishte, nëse flasim me gjuhën e futbollit, mund të themi si një karton i kuq sepse po e pezullon Parlamentin që të marrë vendime”, ka thënë ai në Kuvend.

Aeroporti i Mynihut do të ketë terminal dëbimi

Posted on by Drin Reçica

Duket Gjermania po ndryshon politikën e azilit. Në të ardhmen, azilkërkuesit e refuzuar do të dëbohen më shpejt. Një projekt po planifikohet në Aeroportin e Mynihut, përcjell albinfo.ch.

Mynihu, kodi IATA MUC, është aeroporti i dytë më i madh në Gjermani. Aeroporti, i vendosur në landin federal të Bavarisë, është një qendër qarkullimi për shoqërinë gjermane të fluturimit Lufthansas. Me një numër total prej 73 linjash ajrore, fluturimet mund të bëhen në 216 destinacione në 68 vende. Një terminal i tretë do t’i shtohet dy terminaleve të pasagjerëve: Gjermania planifikon të ndërtojë një terminal të posaçëm dëbimi në MUC për migrantët që duhet të largohen nga vendi.

Aeroporti i Mynihut planifikon të ndërtojë një ndërtesë për policinë federale, tha të mërkurën një zëdhënës i kompanisë. Pronari kryesor i aeroportit është Shteti i Lirë i Bavarisë, ndërsa qeveria federale dhe qyteti i Mynihut mbajnë aksione minoritare. Ministri i Brendshëm i Bavarisë Joachim Herrmann dhe Ministri i Brendshëm gjerman Alexander Dobrindt, të dy nga partia CSU, kërkojnë rregullisht dëbimin e rreptë të azilkërkuesve të refuzuar dhe kriminelëve të huaj.

Sipas një dokumenti tenderimi për aeroportin, i ashtuquajturi “terminal riatdhesimi” do të ketë dy kate, informon agjencia e lajmeve Reuters. Ndërtimi është planifikuar të përfundojë në fund të vitit 2028. Do të projektohet në mënyrë që “të mund të mbërrijnë dhe të nisen deri në 50 fluturime çarter individuale dhe kolektive në ditë”.

“Një tavolinë qendrore regjistrimi do të instalohet në ndërtesë për të koordinuar në mënyrë efikase riatdhesimet”, vazhdon dokumenti. Policia federale nuk i ka komentuar planet deri tani.

Projekti është i diskutueshëm politikisht. “Një terminal të posaçëm për dëbime, këtë ne e shohim më tepër së në mënyrë kritike, i tha politikania rajonale Gülseren Demirel (Aleanca90/Të Gjelbrit) gazetës Süddeutsche Zeitung.

Nga ana e tij, kryetari i bashkisë së Mynihut Dieter Reiter (SPD) e konsideroi të arsyeshme riatdhesimin e kriminelëve në vendet e tyre të origjinës. “Kjo është arsyeja pse nuk mendoj se është një ide e keqe, në parim, të kemi një terminal të këtij lloji.”

Qyteti i Freising-ut, i vendosur në veri të Mynihut, ku ndodhet një pjesë e aeroportit, diskutoi projektin këtë javë. Sipas administratës së qytetit, komisioni i planifikimit të qytetit e hodhi poshtë vendndodhjen e zgjedhur të aeroportit për arsye planifikimi. Qyteti do t’i paraqesë një raport mbi këtë çështje te autoriteti përkatës rajonal./DW

BBC jehonë zbulimeve arkeologjike në Liqenin e Ohrit

Posted on by Drin Reçica

BBC i ka kushtuar vëmendje një zbulimi të rëndësishëm arkeologjik në Shqipëri, që besohet të jetë vendbanimi liqenor më i vjetër në Evropë, përcjell albinfo.ch.

Zbulimi është bërë në brigjet e Liqenit të Ohrit, ku të dhënat sugjerojnë se një komunitet i organizuar gjuetarësh dhe bujqish ka jetuar aty rreth 8,000 vite më parë.

Ekipet e kërkimit nga Zvicra dhe Shqipëria po zbulojnë çdo ditë dëshmi që i përkasin epokës së gurit, ku ky komunitet i lashtë kombinonte aktivitetet e gjuetisë me ato të bujqësisë.

“Është rreth 6 hektarë dhe deri tani s’kemi bërë as edhe 600 metra katrorë. Pra, kjo është vetëm një vrimë e vogël për të parë brenda të gjithë zonës. Do të thosha që kemi bërë më pak se 1% të gërmimeve”, tha një nga arkeologet në videon e publikuar nga BBC, përcjell albinfo.ch.

Arkeologët po punojnë rreth tre metra nën sipërfaqen e ujit për të rikuperuar me kujdes shtyllat prej druri që dikur mbështesnin shtëpitë mbi liqen.

Krahas tyre, po mblidhen edhe objekte qeramike të gdhendura, eshtra kafshësh dhe vegla prej bakri, dëshmi të një jete të zhvilluar dhe të organizuar në lashtësi.

S’ka konstituim, seanca vazhdon nesër në ora 14:00

Posted on by Drin Reçica

Ka dështuar edhe përpjekja e 25 korrikut e deputetëve për konstituim të Kuvendit të Kosovës. Kryesuesi i seancës, Avni Dehari, ka njoftuar se, për shkak se afati për konstituim i dhënë nga Gjykata Kushtetuese përfundon më 26 korrik, një përpjekje tjetër do të bëhet edhe të shtunën, përcjell albinfo.ch.

117 deputetë ishin të pranishëm në sallë të premten, 54 votuan për.

PDK-ja, LDK-ja e AAK-ja i kanë kërkuar kryesuesit të seancës që të rikthehej në rendin e ditës dhe të mos vazhdonte me votimin e komisionit për votim të fshehtë.

SHBA dhe Izraeli dënojnë vendimin e Francës për të njohur shtetin palestinez

Posted on by Drin Reçica

Franca do ta njohë zyrtarisht shtetin palestinez në shtator, njoftoi mbrëmë presidenti francez, Emmanuel Macron, përcjell albinfo.ch.

Zyrtarët palestinezë e mirëpritën vendimin, por kryeministri izraelit Benjamin Netanyahu thotë se ai “shpërblen terrorin”, dhe Sekretari i Shtetit i SHBA-së Marco Rubio thotë se ky veprim është “i pamatur”, shkruan BBC.

Macron thotë se ai dhe të tjerët kanë detyrim të tregojnë se paqja është e mundur dhe se “prioriteti urgjent sot” është t’i jepet fund luftës dhe t’u sjellë lehtësim popullit të Gazës.

Por, gjithashtu të enjten, negociatorët izraelitë dhe amerikanë vendosën të tërhiqen nga bisedimet për armëpushim në Gaza në Katar, me Uashingtonin që akuzoi Hamasin se nuk “veproi me mirëbesim”. Hamasi thotë se ishte i befasuar nga pretendimi dhe një burim izraelit këmbënguli se nuk kishte “kolaps” në negociata.

Ndërkohë, kushtet humanitare në Gaza po vazhdojnë të përkeqësohen me shpejtësi. Agjencia palestineze e refugjatëve e OKB-së (UNRWA) paralajmëron se një në pesë fëmijë në Qytetin e Gazës është i kequshqyer, në veri të territorit  dhe se rastet po rriten çdo ditë.

Izraeli dhe Hamasi fajësojnë njëri-tjetrin për situatën, ndërsa agjencitë e ndihmës i kanë bërë thirrje Izraelit të lejojë më shumë ndihma të arrijnë njerëzit në territor, duke paralajmëruar për uri masive.

Ambasadorët sot përcjellin seancën nga Kuvendi

Posted on by Drin Reçica

Në përpjekjen e 52-të dhe të fundit për konstituimin e Kuvendit të Kosovës para skadimit të afatit kushtetues, pritet që ambasadorë të vendeve të huaja në Kosovë, sot të jenë të pranishëm, përcjell albinfo.ch.

Ambasada Gjermane ka njoftuar se ambasadori Jorn Rohde, bashkë me përfaqësues të tjerë ndërkombëtarë, do të marrin pjesë në seancën e Kuvendit që do të mbahet sot.

“Duke qenë se nesër është mundësia e fundit për të konstituuar Kuvendin para afatit të Gjykatës Kushtetuese, ambasadori Rohde, së bashku me kolegë të tjerë ndërkombëtarë, planifikon të marrë pjesë në seancën në parlament,” thuhej në njoftimin e ambasadës.

Më 26 korrik skadon afati 30-ditor i përcaktuar nga Gjykata Kushtetuese për konstituimin e Kuvendit. Presidentja Vjosa Osmani ka dorëzuar një kërkesë për të sqaruar pasojat juridike në rast se Kuvendi nuk konstituohet deri në këtë afat, duke theksuar se “kompromisi nuk po shihet askund”.

Seanca pritet të nis sot në ora 11:00.

Pse po boshatiset Mali i Zi nga pushuesit këtë verë?

Posted on by Drin Reçica

Plazhet thuajse të zbrazëta, terasat e kafeneve dhe restoranteve, dhe më shumë se 50 përqind e apartamenteve dhe dhomave të zbrazëta në akomodime private kujtojnë ditët e pandemisë, ndërsa banorët e bregdetit malazez ende presin që sezoni të fillojë më në fund, edhe pse fundi i korrikut po afrohet.

Pavarësisht numrit të ulët të mysafirëve këtë vit, çmimet nuk po bien, kohët e fundit, publiku u trondit nga lajmet për shezlongjet në Przhno, jo shumë larg Sveti Stefan, të cilat kushtojnë deri në 200 euro, ndërsa në plazhet e qytetit çmimet variojnë midis 15 dhe 120 euro.

Akomodimi privat kushton nga 40 deri në 90 euro e më shumë, varësisht nga vendndodhja dhe kapaciteti, shkruan Nova.rs.

“Në plazhet e qytetit, çmimet janë më të ulëta, duke filluar nga 15 deri në 40 euro, por sapo largohesh pak më shumë nga qendra, ku ka më shumë rehati, çmimet rriten  deri në 120, 150, madje edhe 200 euro. Pak njerëz mund ta përballojnë këtë sot. Ata që drejtojnë biznese mbeten pa klientë dhe po zhyten në borxhe, dhe ata që do të vinin në det nuk po vijnë sepse nuk mund të paguajnë”, shpjegon një nga kamarierët.

“Në plazhet e qytetit, çmimet janë më të ulëta, duke filluar nga 15 deri në 40 euro, por sapo largohesh pak më shumë nga qyteti, diku ku ke më shumë rehati, çmimi është më i lartë, duke shkuar deri në 120, 150 apo edhe 200 euro. Pak njerëz mund ta përballojnë këtë sot, kështu që ata që drejtojnë biznese mbeten pa klientelë dhe në borxhe, dhe ata që do të donin të shkonin në det nuk vijnë, sepse nuk mund të paguajnë”, shpjegon ai tutje.

Gjëja më e shtrenjtë është në plazh. Për një familje me katër anëtarë, për një ditë  ose më saktë, disa orë në plazh,  ju nevojiten të paktën 50 euro. Plazhet janë plot me shezlongje dhe turistët detyrohen të paguajnë për të bërë plazh, megjithëse shumë do të shtronin peshqirin e tyre, gjë që nuk do t’u kushtonte asgjë.

Në vendet ku ka shezlongje, peshqirët janë të ndaluar dhe çmimet e kafesë, lëngjeve, alkoolit dhe vakteve janë deri në tre herë më të larta se në vendet më larg plazhit ose qendrës së qytetit. Edhe akullorja është dy ose tre herë më e shtrenjtë se në dyqan.

Milani me ofertë të re për Ardon Jasharin

Posted on by Drin Reçica

Milani po përgatit një ofertë të re dhe të përmirësuar për Club Brugge për Ardon Jasharin, duke rritur tarifën fikse në 35 milionë euro dhe duke ulur bonuset që lidhen me performancën, përcjell albinfo.ch.

“La Gazzetta dello Sport” thekson se kjo është afërsisht e njëjta shifër e përgjithshme për investimin, por struktura e tij do të ndryshojë.

Kjo do të thotë që kur drejtori ekzekutiv Giorgio Furlani u tha drejtorëve belgë se oferta përfundimtare do të ishte 32.5 milionë euro plus bonuse, kjo nuk ishte krejtësisht e pasaktë.

Prandaj, do të zhvendoset në 35 milionë euro të garantuara, plus një shifër më të vogël për shtesat e lidhura me performancën e lojtarit dhe të ekipit gjatë kohës së tij në San Siro.

Duke ndryshuar strukturën e ofertës, nëse jo shifrën totale, kjo mund të sjellë një rezultat të ndryshëm për Milanin.

Club Brugge e kishte bërë të qartë se ishte i gatshëm ta linte Jasharin të shkonte vetëm nëse merrte 35 milionë euro paraprakisht.

Me këtë ndryshim, Milani është i bindur se mund ta arrijë marrëveshjen dhe t’i japë Max Allegrit mesfushën e tij të ripërtërirë plotësisht me Samuele Ricci, Jashari dhe Luka Modric.

Shqipëria e Kosova përfshihen nga vala e nxehtë, deri 43 gradë Celsius

Posted on by Drin Reçica

Kjo e premte pritet të shënojë temperatura të cilat kanë qenë në një trend rritës gjatë javës.

Temperaturat këtë mëngjes kanë qenë 16 gradë Celsius, ndërsa gjatë ditës pritet të arrijnë deri në 43 gradë Celsius në territorin e Shqipërisë.

Era do të fryjë me shpejtësi deri në 28 km/h, duke krijuar në brigjet detare dallgëzim të ulët.

Nga ana tjetër edhe Kosova është përfshirë nga vala e nxehtë.

Temperaturat minimale priten 15 -20°C, e temperaturat maksimale 35-39°C. /Albinfo.ch

Kaan Arapi, talenti i ri shqiptar përzgjidhet nga Barça Camp 2025

Posted on by Drin Reçica

Një tjetër talent shqiptar po shkel në gjurmët e më të mëdhenjve të futbollit. Kaan Arapi është përzgjedhur nga Barça Camp 2025 si një ndër futbollistët me potencial të lartë, një njohje kjo që i hap dyert drejt një të ardhmeje premtuese në sportin më të dashur në botë, transmeton Albinfo.ch.

Kaani do të ketë mundësinë të marrë pjesë në Barça Clinic, një eksperiencë unike që zhvillohet në ambientet zyrtare të klubit FC Barcelona në Spanjë- aty ku ëndrrat bëhen realitet.

Nën mbikëqyrjen dhe udhëheqjen e trajnerëve elitarë të La Masia-s, akademisë së famshme të Barcelonës, ai do të përjetojë nga afër filozofinë, metodologjinë dhe vlerat e njërit prej klubeve më të mëdhenj në historinë e futbollit.

Ky është një hap i madh për Kaanin dhe një frymëzim për të gjithë të rinjtë shqiptarë që ëndërrojnë një karrierë ndërkombëtare në sport./Albinfo.ch

 

Pika kufitare “Dheu i Bardhë”, 25 minuta pritje për hyrje

Posted on by Drin Reçica

Ministria e Punëve të Brendshme vazhimisht përditëson të dhënat sesa po pritet nëpër pikat kufitare të Kosovës me shtetet për rreth, shkruan albinfo.ch. 

Fluksi i mërgimtarëve tashmë ka filluar, mirëpo deri më tani pritje të gjata në hyrje të pikave kufitare të Kosovës nuk ka patur.

Pritja më e madhe është në pikën “Dheu i Bardhë”, 30 minuta.

Ndërkaq në pikën Merdarë pritjet jane deri në 15 minuta.

Pikat tjera të hyrjes nuk ka pritje. /Albinfo.ch

 

Zvicër: Propozohen masa të reja për mbrojtjen e përfaqësuesve të punonjësve nga shkarkimet e pabaza

Posted on by Alb

Këshilli Federal i Zvicrës ka propozuar një paketë të re ligjore që synon të forcojë mbrojtjen e përfaqësuesve të punonjësve kundër shkarkimeve të padrejta. Kjo nismë ka shkaktuar reagime të ndryshme nga partnerët socialë.

Çfarë përfshin propozimi?

Sipas propozimit, punëdhënësit do të kenë detyrimin të njoftojnë me shkrim përfaqësuesit e punonjësve nëse kanë ndërmend t’i shkarkojnë. Këta përfaqësues do të kenë mundësinë të kërkojnë një bisedë për të diskutuar arsyet e mundshme të shkarkimit. Për më tepër, në rast të një shkarkimi të padrejtë, përfaqësuesit e punonjësve mund të kërkojnë një dëmshpërblim deri në 10 muaj paga, nga 6 muaj që është aktualisht.

Reagimet e partnerëve socialë

Sindikatat, përmes organizatës Unia, e kanë mbështetur këtë propozim, duke theksuar se aktualisht nuk ka mbrojtje ligjore të mjaftueshme për përfaqësuesit e punonjësve. Ata argumentojnë se kjo masë do të sigurojë një mjedis më të sigurt për ata që përfaqësojnë interesat e punonjësve.

Nga ana tjetër, organizatat e punëdhënësve, si Swissmem, kanë shprehur shqetësim se ky propozim mund të ndikojë negativisht në fleksibilitetin e tregut të punës. Ata argumentojnë se rregullat aktuale, të bazuara në marrëveshjet kolektive të industrisë, janë të mjaftueshme dhe se zbatimi i një mbrojtjeje më të gjerë mund të krijojë vështirësi për bizneset, transmeton albinfo.ch.

Propozimi i Këshillit Federal përforcon angazhimin e Zvicrës për të siguruar mbrojtjen e të drejtave të punonjësve dhe për të përmbushur angazhimet ndërkombëtare. Megjithatë, diskutimet midis palëve të interesuara do të vazhdojnë për të arritur një balancë të drejtë që mbron të drejtat e punonjësve pa cenuar fleksibilitetin e tregut të punës.

Festohet dita kombëtare e Zvicrës në Tiranë, theksohet partneriteti i palëkundur

Posted on by Alb

Më shumë se 250 të ftuar, përfaqësues diplomatikë, zyrtarë qeveritarë, bashkiakë, si dhe figura nga shoqëria civile dhe media, u mblodhën në Rezidencën Zvicerane në Tiranë për të festuar Ditën Kombëtare të Zvicrës, pak ditë para datës zyrtare të 1 gushtit.

Ambasadorja zvicerane në Shqipëri, Ruth Huber, mirëpriti të ftuarit, duke theksuar marrëdhëniet e forta dypalëshe, të cilat këtë vit shënojnë 55 vjet. Festimet përfshinë një performancë me alphorn – instrument tradicional zviceran, degustim të raclette-s dhe ëmbëlsirave tradicionale të përgatitura nga nxënësit e Shkollës së Hotelerisë dhe Turizmit në Tiranë, me mbështetjen e Shkollës së Hotelerisë EHL të Lozanës, transmeton albinfo.ch.

“Zvicra ka qenë dhe do të mbetet një partnere e palëkundur në udhëtimin e Shqipërisë drejt zhvillimit,” deklaroi ambasadorja Huber. Ajo sqaroi se, megjithëse financimi i Agjencisë Zvicerane për Zhvillim dhe Bashkëpunim (SDC) do të përfundojë gradualisht në vitet në vijim, bashkëpunimi ekonomik me Shqipërinë do të vijojë përmes Sekretariatit Shtetëror për Çështjet Ekonomike (SECO).

“Synimi ynë është të mbështesim rritjen ekonomike të qëndrueshme dhe gjithëpërfshirëse, të kontribuojmë në krijimin e vendeve të reja të punës dhe në ndërtimin e një shoqërie të begatë. Për këtë arsye, mbështesim përmirësimin e financave publike dhe forcimin e tregjeve financiare, duke rritur qëndrueshmërinë dhe besimin ekonomik,” tha më tej ambasadorja Huber.

Ajo kujtoi gjithashtu vizitat e fundit të presidentes zvicerane Karin Keller-Sutter dhe ish-presidentit Alain Berset në Shqipëri, në kuadër të Samitit të Komunitetit Politik Evropian dhe ngjarjeve të tjera dypalëshe, duke shtuar se Zvicra synon të forcojë më tej këto lidhje në të ardhmen.

Dita Kombëtare e Zvicrës shënohet më 1 gusht, në përkujtim të paktit të Rütlit të vitit 1291, që solli krijimin e Konfederatës Zvicerane.

 

Një medalje e re për Kosovën nga Laura Fazliu

Posted on by Alb

Xhudistja kosovare Laura Fazliu ka shkëlqyer në Lojërat Universitare Botërore në Rhine-Ruhr, të organizuara nga FISU, duke fituar medaljen e argjendtë.

Në raundin e parë Laura ishte e lirë, ndërsa në të dytin mposhti Sofiia Bordinskykh nga Ukraina. Në çerekfinale triumfoi ndaj Viktoria Folgen nga Gjermania dhe në gjysmëfinale fitoi kundër Flavia Favorini nga Italia.

Në finalen për medaljen e artë, Laura u përball me Narumi Tanioka nga Japonia, por për shkak të një lëndimi nuk mundi të vazhdojë dhe përfundoi me medaljen e argjendtë.

 

Franca do të njohë Palestinën si shtet të pavarur

Posted on by Alb

Presidenti i Francës, Emmanuel Macron, ka njoftuar se vendi i tij ka marrë vendimin  për njohjen e shtetit të Palestinës.

“Franca, duke qëndruar besnike ndaj angazhimit të saj historik për një paqe të drejtë dhe të qëndrueshme në Lindjen e Afërt, ka vendosur ta njohë shtetin e Palestinës”, deklaroi Macron në një postim në Facebook.

Ai tha se shpallja formale do të bëhet gjatë Asamblesë së Përgjithshme të Kombeve të Bashkuara në shtator.

Lidhur me konfliktin në Gaza, Macron theksoi urgjencën për ndaljen e luftimeve dhe mbrojtjen e civilëve. “Paqja është e mundur”, u shpreh ai, duke shtuar se është e domosdoshme të arrihet menjëherë një armëpushim, të lirohen të gjitha pengjet dhe të garantohet ndihmë humanitare për popullin palestinez.

Tragjedi në Mal të Zi: Babai vret vajzën 2-vjeçare dhe më pas veten

Posted on by Alb

Një ngjarje e rëndë ka tronditur mbrëmë Malin e Zi, në afërsi të Nikshiqit. Sipas mediave lokale, burri me inicialet Z.D. u konfliktua me bashkëshorten e tij dhe më pas mori vajzën e vogël, vetëm 2 vjeç, duke u larguar në drejtim të panjohur.

Trupat e pajetë të babait dhe vajzës u gjetën në zonën e Golijës, rreth 50 kilometra larg Nikshiqit. Lajmin për policinë e dha babai i Z.D., i cili i gjeti të vdekur në shtëpi.

Ekipet e policisë dhe ato mjekësore mbërritën menjëherë në vendngjarje, ku konfirmuan vdekjen e të dyve. Sipas hetimeve paraprake, dyshohet se Z.D. vrau vajzën e tij me armë zjarri dhe më pas kreu vetëvrasje.

Ngjarja po hetohet nga Prokuroria e Lartë Shtetërore në Podgoricë, ndërsa ende nuk dihen arsyet e sakta që çuan në këtë akt tragjik.

 

Gjykata Kushtetuese ndalon veprimet e deputetëve pas afatit për konstituimin e Kuvendit

Posted on by Alb

Gjykata Kushtetuese ka marrë vendim mbi kërkesën e dorëzuar nga deputetët e PDK-së dhe LDK-së lidhur me votimin e fshehtë për konstituimin e Kuvendit të Kosovës.

Sipas këtij vendimi të publikuar sot, deputetëve të zgjedhur u ndalohet të kryejnë çfarëdo veprimi pas përfundimit të afatit 30-ditor të përcaktuar për konstituimin e Kuvendit.

Në tekstin e vendimit thuhet:

“Gjykata cakton masë të përkohshme ex officio, e cila ndalon çdo vendim apo veprim të deputetëve të Kuvendit të Kosovës lidhur me Seancën Konstituive pas skadimit të afatit 30-ditor, sipas paragrafit 2 të pikës II të dispozitivit të Aktgjykimit KO124/25.

Kjo masë hyn në fuqi më 27 korrik 2025 dhe do të zgjasë deri më 8 gusht 2025.”

Gjykata ka urdhëruar gjithashtu publikimin e vendimit në Gazetën Zyrtare dhe njoftimin e palëve të përfshira.

 

Thaçi nga Haga: Në emër të diçkaje që s’ekziston, më privuan nga familja dhe më morën vitet më të mira

Posted on by Alb

Ish-presidenti i Kosovës, Hashim Thaçi, ka folur nga Haga lidhur me ndalimin e tij nga Gjykata Speciale dhe marrëdhëniet që ka pasur me presidentët amerikanë.

“Unë nuk ndihem as i tradhtuar, as i mashtruar, por i keqpërdorur nga ata që më larguan padrejtësisht nga familja ime, më hoqën nga puna dhe më privuan nga vitet më të bukura të jetës, në emër të një akuze fiktive”, deklaroi Thaçi.

Ai shtoi se Perëndimi dhe SHBA-të nuk kanë treguar të gjithë të vërtetën rreth rastit të tij, duke theksuar se përgjatë karrierës ka pasur “marrëdhënie shumë të mira” me administrata të ndryshme amerikane.

“Kam bashkëpunuar me disa presidentë të SHBA-së, duke nisur nga mandati i dytë i Klintonit (1996-2000), pastaj me Bushin e Ri (2000-2008), Obamën dhe Bidenin (2008-2016) si dhe me Trumpin (2016-2020). Kam pasur mundësi të bisedoj për Kosovën edhe me Bushin e Vjetër dhe Presidentin Karter në periudha të ndryshme,” tha Thaçi në emisionin Rubikon.

Italia një hap para: Parfumet, uji dhe lëngjet lejohen në bagazhin e dorës

Posted on by BR

Në aeroportet kryesore italiane, parfumet dhe shishet e mëdha me ujë, verë dhe vaj ulliri do të lejohen në bagazhet e dorës – pa i hequr fare.

Pas pezullimit të papritur dhe paraprak të skanerëve të gjeneratës së fundit pothuajse një vit më parë, të njëjtat mjete do të jenë në gjendje të kthehen në funksion të plotë në ditët në vijim, sipas “Corriere della Sera”, shkruan ATSH, transmeton albinfo.ch.

Kjo do të thotë që, përveç pajisjeve portative si tableta, laptopë, telefona inteligjentë, gjatë udhëtimit gjithashtu do të lejohen lëngje – pa iu përmbajtur më limitit prej 100 mililitrash.

Vendimi pritet të zbatohet në fund të korrikut ose në fillim të gushtit, megjithëse burimet paralajmërojnë se data është ende duke u finalizuar.

Pasi të përfundojnë kontrollet teknike, dhe ndoshta që të premten, më 25 korrik, Konferenca Evropiane e Aviacionit Civil (ECAC) do të miratojë algoritmin e përditësuar për pajisjet Hi-Scan 6040 CTiX.

Në Itali, këto pajisje janë instaluar në Milano, Romë, Bergamo, Katania, Bolonja dhe Torino.

Në këto aeroporte, 68-70 milionë pasagjerë që udhëtojnë çdo vit do të përfitojnë nga miratimi i BE-së.

Kthimi në kontrolle më të shpejta me më pak kufizime do të ndodhë vetëm në aeroportet e pajisura me pajisjet e gjeneratës së fundit.

Falë softuerit që njeh menjëherë eksplozivët dhe shfaq imazhe tredimensionale me rezolucion të lartë të bagazheve, nuk është më e nevojshme të hiqen pajisjet elektronike, dhe madje mund të mbahen edhe shishe vaji, vere dhe birre, si dhe kremra dhe xhel me mbi 100 mililitra.

Kosovë: Pishina e Gërmisë mbyllet përkohësisht për shkak të cilësisë së ujit

Posted on by Alb

Inspektorati Sanitar i Ministrisë së Shëndetësisë ka marrë vendim për mbylljen e përkohshme të pishinës publike në Gërmi, pas rezultateve të fundit të analizave të ujit të kryera nga Instituti Kombëtar i Shëndetësisë Publike.

Sipas njoftimit të Institutit, mostrat e marra më 19 korrik 2025 nga ekspertët e Ekologjisë Humane u analizuan dhe rezultatet e publikuara më 22 korrik treguan se parametrat mikrobiologjikë të ujit nuk i përmbushnin standardet e nevojshme për sigurinë e pishinës.

Inspektorati Sanitar ka kryer një inspektim në terren më 22 korrik, ndërsa më 23 korrik janë marrë mostra të reja për analiza të përsëritura. Rezultatet e këtyre analizave pritet të publikohen më 25 korrik.

IKSHPK bëri të ditur se qytetarët do të informohen për çdo zhvillim sapo të dalin rezultatet përfundimtare, përmes kanaleve zyrtare të komunikimit.

 

Pakënaqësi në Zvicrën frankofone për mungesën e trenave të natës drejt Evropës jugore

Posted on by Alb

Në Zvicër, tërheqja ndaj trenave të natës lidhet kryesisht me Zvicrën gjermanofone. Ndërkohë që transporti hekurudhor po bëhet gjithnjë e më popullor, zhgënjimi po rritet në Zvicrën frankofone për shkak të mungesës së zhvillimit të linjave ndërkombëtare të trenave të natës.

Në mesin e korrikut, Zyra Federale e Transportit (FOT) dhe SBB njoftuan një linjë të re nate mes Baselit dhe Suedisë që do të nisë në prill 2026, transmeton albinfo.ch.

Por ndërsa interesi për trenat e natës po rritet, Zvicra frankofone, e cila ka shpresuar prej kohësh për lidhje të reja drejt jugut, po shpreh pakënaqësinë e saj. Dhe me arsye: duke parë hartën aktuale të ofertës, të gjithë trenat e natës nisen nga Baseli ose Zyrihu dhe të gjithë shkojnë drejt veriut ose lindjes.

Njoftimi për linjën e re drejt Suedisë, që pritet t’i kushtojë Konfederatës 47 milionë franga deri në vitin 2030, ka ngjallur reagime. “Ajo që shohim në thelb është se fokusi mbetet te Zvicra gjermanofone, ndërsa Zvicra frankofone mbetet ende ‘fëmija i harruar’ sa i përket lidhjeve ndërkombëtare,” kritikon Delphine Klopfenstein Broggini, deputete e Gjelbër nga Gjeneva.

“Është e vërtetë që destinacioni (Malmö në Suedi) mund të duket surprizues,” pajtohet edhe kolegia e saj në Komisionin e Transportit të Këshillit Kombëtar, Marie-France Roth Pasquier. “Nuk kemi diskutuar kurrë për të, veçanërisht gjatë punës në komision. Ne kishim kërkuar linja të tjera ndërkombëtare.” Për deputeten qendrore nga Fribourgu, mungesa e kapacitetit drejt Evropës jugore mbetet problemi kryesor.

Shumë banorë frankofonë kanë pritur gjatë për linja drejt Romës apo Barcelonës. Megjithatë, SBB e konsideron jo të arsyeshme momentalisht. “Për destinacione që shërbehen mirë nga trenat me shpejtësi të lartë, si Italia, Spanja apo Franca, do të mbështetemi më shumë te trenat ditorë, pasi mund të arrini destinacionin brenda gjysmës së ditës,” shpjegon zëdhënësi i tyre.

Kompania zvicerane e teknologjisë ndalon investimet në Zvicër

Posted on by Alb

Proton, kompania zvicerane e njohur për mesazhet e enkriptuara dhe mbrojtjen e privatësisë me 70 milionë përdorues në mbarë botën, ka vendosur të ndalojë investimet në Zvicër.

Arsyeja është një ligj i ri që kërkon nga platformat si Proton dhe WhatsApp të identifikojnë dhe ruajnë të dhënat e përdoruesve për t’ia dhënë autoriteteve kur kërkohet. CEO i Proton tha se kjo e cenon rëndë privatësinë dhe se kompania do të zhvendosë qendrat e saj të të dhënave dhe projektet e inteligjencës artificiale në vende si Gjermania dhe Norvegjia.

Vetëm investimi i tyre në AI kap vlerën e 100 milionë frangave, ndërsa deri në fund të dekadës planifikojnë mbi 1 miliard franga investime. Nga ana tjetër, politikanët thonë se ky ligj rrit sigurinë, por kritikët paralajmërojnë se po cenohet liria dhe privatësia e qytetarëve.