Cilat janë kërkesat e investitorëve gjermanë në Shqipëri?

Me ftesë të Shoqatës Gjermane të Industrisë dhe Tregtisë në Shqipëri (DIHA), u bashkuan në pritjen e përvitshme të DIHA-s në Tiranë përfaqësues të qeverisë shqiptare, parlamentit dhe ekonomisë si dhe të ftuar të tjerë.

Pas përshëndetjes nga Presidentja e DIHA-s, Stephanie Sieg fjalën e mori ambasadorja gjermane Susanne Schütz dhe ministrja shqiptare e Financave dhe Ekonomisë, Anila Denaj, të cilat paraqitën bilancin e marrëdhënieve ekonomike gjermano-shqiptare, përcjell albinfo.ch.

Ambasadorja Schütz u shpreh në këtë kontekst: “Shqipëria ka një potencial ende të pashfrytëzuar në shumë fusha, para së gjithash në fushën e turizmit, energjisë së rinovueshme, bujqësisë moderne dhe shërbimeve. Ne shohim tashmë një interes të shtuar të sipërmarrjeve gjermane për Shqipërinë. Investitorët dëshirojnë të dëgjojnë histori suksesi nga sipërmarrje, të cilat janë tashmë prezente në tregun shqiptar”, është shprehur Schutz.

“Ajo çka kërkojnë investitorët në Shqipëri është: siguri ligjore, transparencë dhe një administratë mirëfunksionale, efektive dhe jo të korruptuar. Për fat të keq, shpesh investitorët gjermanë dhe të huaj, të cilët kanë tashmë përvojë në tregun shqiptar, kanë shprehur kohët e fundit dyshime serioze dhe shqetësime të shtuara, për sa i përket një mjedisi “fair” në sektorin e ekonomisë në Shqipëri.

Dëshiroj të inkurajoj të gjithë pjesëmarrësit, të rigjallërojnë entuziazmin e tyre, i cili u zgjua këtu në Tiranë në maj të vitit 2015 nga Kancelarja Federale, Angela Merkel gjatë hapjes së Konferencës Ekonomike Gjermano-Shqiptare”, është shprehur ambasadorja gjermane në Tiranë.