Burri dhuron organet e gruas, duke i befasuar italianët

Gjesti i familjes shqiptare u kthye në një mesazh sensibilizimi për të dhuruar organet, për të shpëtuar jetë njerëzish

Veprimi i një familje shqiptare në Itali, që dhuruan organet e familjares së tyre, ka bërë shumë bujë në Itali.

‘La Martesana’ shkruan se pas vdekjes së 37-vjeçares Jurilda Mara, pas një sulmi nga astma, bashkëshorti i saj vendosi të dhurojë organet e saj.

E ndjera dhe bashkëshorti i saj, Astrit Mara jetonin në Tornaghi Cassano bashkë me tre fëmijët e tyre Alessia, Simon dhe Omari, shkruajnë mediat shqiptare.

Burri ka vendosur që organet t’i dhurojë, sipas dëshirës së saj, përcjell albinfo.ch.

“Ajo gjithmonë shqetësohej për të ardhmen dhe dëshira ishte që t’i jepte jetë dikujt tjetër dhe ne ramë dakord që t’i dhurojmë organet e saj. Ajo vuante nga astma, por jo në gjendje të rëndë. Të martën kishte një sulm kur ishte në shtëpi dhe zemra e saj u ndal menjëherë. Mjekët nuk e kanë kuptuar ende se çfarë ka ndodhur, ndërkohë po presim rezultatet e autopsisë”, ka theksuar shqiptari.

Mediat italiane raportojnë se në ceremoninë e lamtumirës së Jurilda Mara morën pjesë familjarë, miq, por edhe shumë qytetarë italianë.

“Është mbajtur riti islamik gjatë ceremonisë dhe ne jemi habitur për respektin dhe se si të pranishmit kanë ndarë bashkë me ne dhimbjen për këtë humbje”, theksoi tutje Astriti.

Gjesti i familjes shqiptare u kthye në një mesazh sensibilizimi për të dhuruar organet, për të shpëtuar jetë njerëzish.