Bunjaki publikon listën

Përzgjedhësi i Kosovës, Albert Bunjaki ka shpallur listën për miqësoren ndaj Ishujve Faroe, ku nuk kishte shumë ndryshime

Nuk ka shumë ndryshime në listën e Kosovës për ndeshjen e parë të Përfaqësueses pas pranimit në UEFA dhe FIFA. Kosova të premten në Frankfurt të Gjermanisë do të përballet me Ishujt Faroe, shkruan albinfo.ch.

Sidoqoftë, përzgjedhësi Albert Bunjaki ka vlerësuar lart skuadrën kundërshtare. “Mendoj se është një moment jashtëzakonisht i mirë për neve para fillimit të kualifikimeve të Kampionatit Botëror, duke pasur parasysh se nuk kemi pas mundësi të luajmë më herët, në mars. Ishujt Faroe kam pasur rastin t’i shoh pesë lojërat e tyre kohëve të fundit dhe nuk jam farë i befasuar me performancat që kanë pasur kundër Greqisë, brenda dhe jashtë, si dhe ndaj Hungarisë, Rumanisë, e kjo nënkupton se krejt janë mësuar të luajnë futboll, dhe është një kombëtare e vogël, por më zemër të madhe”, deklaroi Bunjaki në konferencën për media.

Ai thotë se synimet e Kosovës janë që në kualifikime për Kampionat Botëror të tregojë lojëra të mira. “Kampionati Botëror është edhe tre muaj, pastaj vjen Kampionati Evropian, objektivi ynë real në kualifikimet e Kampionatit Botëror është që të kemi paraqitje sa më të mirë, dhe nëse ne do të kemi performancë të mirë në kualifikimet për Kampionatin Botëror, unë jam shumë i bindur se në Kampionatin Evropian, do të jemi konkurrent shumë interesantë për ta kaluar grupin”, theksoi përzgjedhësi i Kosovës.

Kjo është lista e Bunjakit:

Portier: Sami Ujkani, Flamur Neziri.

Mbrojtës: Loret Sadiku, Avni Pepa, Bajram Jashanica, Lum Rexhepi, Fanol Përdedaj, Leart Paçarada.

Mesfushorë dhe sulmues: Enis Alushi, Hekuran Kryeziu, Mërgim Brahimi, Besar Halimi, Valmir Sylejmani, Bernard Berisha, Elbasan Rashani, Bersant Celina, Flamur Kastrati dhe Arbert Bunjaku