Bllokohet Beogradi, ngriten tenda në të cilat do të qëndrojnë protestuesit kundër Vuçiqit

Një grup të rinjsh dhe studentësh, mes të cilëve edhe Lëvizja joformale “Borba”, kanë paralajmëruar për ditën e sotme bllokadë 24 orëshe të kryqëzimit të rrugëve Kneza Millosha dhe Birçaninova. Tubimi nis në Ministrinë e Administratës Shtetërore dhe Vetëqeverisjes Lokale, në Birçaninovë, prej nga do të shkohet në udhëkryqin ku do të bëhet bllokada. Kërkesa e protestës është hapja e listave të zgjedhësve.

Protesta e studentëve nisi pikërisht në mesditë dhe siç thuhet, do të jetë një lloj kampi i ndarë në disa zona.

Njëri nga organizatorët e bllokadës, Nikolla Ristiq, tha për mediat serbe se për sot është planifikuar bllokadë 24 orëshe dhe se do të mblidhet në cep të rrugëve “Birçaninova” dhe “Kneza Millosh”.

“Ne po bëjmë një kamp në kryqëzimin me çadra dhe gjithçka që shkon me të. Do të kemi shumë përmbajtje kulturore, artistike dhe edukative. Presim në radhë të parë që Ministria t’i përgjigjet pozitivisht kërkesës sonë. Vala e rebelimit mes të rinjve do të përhapet”, thotë ai.

Ai shton se gjatë ditës atyre do t’u bashkohen edhe organizatat mjedisore, si dhe studentët nga Novi Sadi të cilët sonte do ta kalojnë natën me ta.