Behrami sfidon Shqipërinë

Valon Behrami numëron 63 ndeshje me fanellën e skuadrës helvete dhe dy gola të shënuar

(KEYSTONE/Jean-Christophe Bott)

Valon Behrami është shprehur se është i gatshëm për Kampionatin Evropian dhe ndeshjen e parë ndaj Shqipërisë, shkruan albinfo.ch.

“Ndeshjet miqësore shërbejnë për të përgatitur sa më mirë sfidën e parë kundër Shqipërisë. Duhet të jemi gati psikologjikisht për sfidën ndaj Shqipërisë. Kemi shumë nevojë për të menaxhuar presionin dhe tashmë jemi në fundin e përgatitjeve pasi nuk ka më kohë për të ndryshuar rrënjësisht”, deklaroi Behrami në konferencën për media.

Behrami është një nga lojtarët më të vjetër të gardës së shqiptarëve me Kombëtaren e Zvicrës. Ai numëron 63 ndeshje me fanellën e skuadrës helvete dhe dy gola të shënuar. Ndërkohë, në konferencën e shtypit, trajneri Petkoviq nuk bëri asnjë koment për sfidën e parë të “Euro 2016”, duke preferuar të flasë për fazën përgatitore të Zvicrës.