Bëhet oferta më e madhe në historinë e teknologjisë

Prodhuesi i çipave për kompjuterë, “Broadcom” ka njoftuar se ka bërë ofertë rekorde prej 105 miliardë dollarësh për blerjen e rivalit “Qualcomm”, në blerjen më të shtrenjtë që është bërë ndonjëherë në sektorin e teknologjisë.

“Broadcom” që prodhon çipa për produkte si telefona të mençur, po ofron 70 dollarë për aksion për “Qualcomm”.

“Qualcomm” akoma s’është përgjigjur në këtë interesim, ndërsa ajo është duke u marrë me blerjen e “NXP Semiconductors”. “Broadcom” ka thënë se oferta 105 miliardëshe vlen pavarësisht a blihet “NXP Semiconductors” apo jo, transmeton Albinfo.ch.

Një kombinim i tillë do të shtonte presionin në liderët e tregut Intel dhe Samsung duke krijuar prodhuesin e tretë më të madh në botë sa i përket çipave.

“Ky transaksion do të poziciononte kompaninë si lider global me një portfolio impresive të teknologjisë dhe produkteve”, ka thënë Hock Tan, presidenti i “Broadcom”.

Javën e shkuar, “Broadcom” u lavdërua nga presidenti i SHBA-së, Donald Trump, kur prezantoi planet për lëvizjen e plotë të kompanisë drejt Amerikës. Aktualisht, zyrat e saj janë në Singapor dhe Silicon Valley.