Austri: Shqetësime për planet emergjente për gazin

(KEYSTONE/AP Photo/Sergei Chuzavkov)

Bizneset austriake po ngrenë shqetësime se nuk ka plane emergjente në rast se Rusia ndalon dërgimin e gazit në Austri, përcjell albinfo.at.

Austria është një nga vendet më të varura nga gazi rus në BE.

Der Standard raporton se Voestalpine, një kompani e madhe çeliku me bazë në Linz, ka pasur vetëm bisedime “sporadike” me qeverinë për krizën e mundshme. Katharina Koßdorff, Drejtoresha Menaxhuese e Shoqatës së Industrisë Ushqimore, thotë se nuk ka “plane konkrete emergjente” për këtë skenar, duke shtuar se industria ushqimore austriake është pothuajse 100 për qind e varur nga gazi rus.

Austria ka filluar të blejë gaz për rezervën e saj strategjike. Të hënën qeveria shpenzoi gati një miliard euro për 7.7 teravat orë (TWh) gaz. Ministria e klimës e Leonore Gewessler, e cila është përgjegjëse për energjinë, tha se ishte e paqartë nga vjen gazi, pasi nuk ka prova të origjinës në tregun e gazit. Mund të supozohet se gazi rus përbën një pjesë të asaj që është blerë, sipas një zëdhënësi të Gewessler (Greens).