ASK: Rritet papunësia në 9 muajt e fundit në Kosovë

Mesatarja për këta nëntë muaj është 30.4 për qind, ose 2.9 për qind më e lartë se në vitin 2016, kur shkalla e paunësisë ka qenë 27.5 për qind.

Rezultatet e Anketës së Fuqisë Punëtore të publikuara së fundi nga Agjencia e Statistikave e Kosovës, tregojnë se në nëntë muajt e parë të këtij viti papunësia është rritur për 2.9 për qind, krahasuar me shkallën e papunësisë që është regjistruar nga kjo agjenci vitin e kaluar.

Shkalla e papunësisë për tremujorin e tretë të këtij viti është 30.2 për qind. Për tremujorin e dytë të këtij viti papunësia ka qenë në një shkallë prej 30.6 për qind, ndërkohë që në tremujorin e parë 30.5 për qind.

Mesatarja për këta nëntë muaj është 30.4 për qind, ose 2.9 për qind më e lartë se në vitin 2016, kur shkalla e papunësisë ka qenë 27.5 për qind. Papunësia më e theksuar në tremujorin e tretë të këtij viti është te femrat me 38 për qind, krahasuar me meshkujt, ku kjo shifër shënon vlerën 27.8 për qind. Ndërkohë që shkalla më e theksuar e papunësisë është te grupmoshat 15-24-vjeçare, me 53.3 për qind.