Arrestohet një grua e dyshuar për terrorizëm

Nuk ka indikacione për përgatitjen e sulmeve terroriste në Zvicër. Por, hetuesit janë alarmuar pasi që në rrjetet sociale kanë parë “dëshmi shqetësuese” në bisedat e koduara

Prokuroria Federale e Zvicrës ka realizuar një numër bastisjesh nën dyshimin për aktivitete terroriste në kantonet Neuchatel (Neuenburg) dhe Vaud, me ç`rast ka arrestuar një person.

Hetimet në nivelin federal janë iniciuar mbi bazë të një kallëzimi penal të Prokurorisë Publike të Kantonit Vaud. Aty bëhet fjalë për shkelje të mundshme të ligjit për ndalimin e organizatave si “Al-Kaida”, “ISIS” dhe të tjerave, të ngjashme, shkruan srf.ch. Hetimet po zhvillohen që nga qershori i vitit 2016.

Sipas njoftimit që prokuroria ka shpërndarë, hetimet kanë qenë të orientuara ndaj dy të dyshuarve, në kuadrin e një procedure hetimesh penale, transmeton albinfo.ch. Njëri prej tyre, një grua 23 vjeçare me nënshtetësi kolumbiane, edhe është arrestuar.

Burime tjera raportojnë për arrestimin e dhjetë personave. Sipas tyre, gruaja e arrestuar në Zvicër mund të jetë në lidhje me sulmin terrorist të planifikuar në Nizza të Francës.

Në të njëjtën kohë, në kuadrin e hetimeve të realizuara në Francë, janë kryer gjithashtu një numër bastisjesh dhe atje është arrestuar edhe personi i dytë që kërkohej në Zvicër.

Hetimet në dy vendet janë zhvilluar me praninë e personelit nga prokuroritë e vendeve përkatëse.

Sipas Prokurorisë Federale të Zvicrës, nuk ka indikacione për përgatitjen e sulmeve terroriste në Zvicër. Por, hetuesit janë alarmuar pasi që në rrjetet sociale kanë parë “dëshmi shqetësuese” në bisedat e koduara, përcjell albinfo.ch. E arrestuara në Zvicër ka mbajtur kontakte në Francë, kontakte këto të cilat dyshohet se mund të kenë pasur lidhje me akte të mundshme dhune.