Armatimi i konfiskuar nga Policia e Kosovës në Veri u gjet në pronat e dy serbëve të kërkuar për rastin e Banjskës

Policia e Kosovës të premten ka zhvilluar operacion në veri, ku ka bastisur dy vende dhe ka gjetur armë.

Zëvendësdrejtori i Policisë në veri, Veton Elshani, ka thënë se nuk mund të japë detaje të tjera pasi “bastisja ende s’ka përfunduar”.

Në këtë aksion Policia ka kontrolluar dy lokacione, njëri në pronësi të Marjan Radojeviqit e tjetri të Zarko Cvetkoviqit.

Radojeviq e Cvetkoviq janë në listën e të kërkuarve për sulmin në Banjskë më 24 shtator, në të cilin mbeti i vrarë rreshteri Afrim Bunjaku.

Sipas njoftimit të Policisë, njëri lokacion nga ku u konfiskuan armët ishte afër vendit të njohur si “Tre Rokaqiejt” i lidhur me Radojeviqin, ndërsa tjetri në rrugën “Qeta e Minatorëve” i lidhur me Cvetkoviqin. 

Operacioni u zhvillua “në bashkëpunim me Agjencinë Kosovare për Inteligjencë (AKI) dhe qytetarët”.

Policia pati aksion edhe të enjten në veri. Në fshatin Uglarë të Zubin-Potokut kapi granata dore e armë të gjata. Një person u arrestua.