Anulohen shumë fluturime në aeroportet e Britanisë

Reshjet e dëborës shkaktojnë probleme në Britani

Disa aeroporte britanike njoftuan sot për vonesa të mëdha në realizimin e fluturimeve dhe pritet që stuhia që ka përfshirë pjesën më të madhe të Britanisë së Madhe të prekë edhe rajonet jugore, përcjell albinfo.ch.

Fluturimet nga disa aeroporte kanë pasur vonesa, duke përfshirë Aeroportin e Bristolit, i cili u mbyll përkohësisht për shkak të kushteve të këqija atmosferike.

“Pasagjerët këshillohen të kontaktojnë kompanitë ajrore për informacione të fluturimit përpara se të udhëtojnë në aeroport dhe të kenë kujdes shtesë”, thuhet në njoftimin e aeroportit, duke shtuar se është duke vazhduar heqja e borës.

Disa fluturime në ardhje u devijuan në aeroportin e Birminghamit pas mbylljes së aeroportit të Bristolit. Aeroporti Gatwick tha se kishte vonesa të vogla mëngjesin e sotëm, por se aeroporti po funksiononte.

Zyra Meteorologjike e Britanisë tha se bora dhe shiu mund të vazhdojnë gjatë fundjavës dhe ndoshta edhe më tej, e cila mund të shkaktojë vonesa dhe anulime të autobusëve, trenave dhe linjave ajrore të enjten dhe të premten.

Hekurudha Kombëtare ka paralajmëruar publikun se bora dhe akulli pritet të ndikojnë në udhëtimet me tren në shumë pjesë të Britanisë deri të premten.

---