Anija gjermane shpëtoi 100 emigrantë në Mesdhe

Ilustrim

Mësohet se organizata private e shpëtimit detar Sea-Watch tha të dielën në mbrëmje se kishte shpëtuar pothuajse 100 njerëz në Mesdhe në misionin e saj të pestë në tri ditë, përcjell albinfo.ch.

Referuar mediave të huaja, një grua shtatzënë ishte në mesin e grupit të fundit të shpëtuar, tha organizata me bazë në Berlin në Twitter.

Ndërkohë, ekuipazhi tani ka pothuajse 450 njerëz të shpëtuar nga varkat e emigrantëve në bordin e anijes Sea-Watch 3. Fëmija më i vogël në bord është dy javësh.

Roja bregdetare italiane raportoi të dielën pas një kërkimi dyditor se kishte gjetur një varkë që transportonte emigrantë në brigjet e Crotone në Italinë jugore.

Ata sollën në një vend të sigurt 27 persona, tha roja bregdetare në një deklaratë.

Italia është destinacioni i shumë emigrantëve që udhëtojnë me varkë, të cilët shpesh nisen nga Afrika e Veriut në udhëtimin e tyre drejt Bashkimit Evropian.

Ata shpresojnë për një jetë më të mirë atje, por varkat e tejmbushura hasin shpesh telashe në det dhe ka pasur aksidente në Mesdhe.

Sipas OKB-së, më shumë se 1,500 njerëz kanë vdekur në Mesdheun qendror deri më tani këtë vit.