Andi Lila, luan edhe kur ka dridhje të tokës

“Kam luajtur në shi, dëborë, diell, por në një situatë lëkundjesh sizmike nuk kam luajtur ndonjëherë”, rrëfehet Lila

Futbollisti i Kombëtares shqiptare, Andi Lila, ka rrëfyer një ngjarje mjaft interesante që i ka ndodhur të dielën. Lila aktivizohet në skuadrën greke, PAS Janina, ku së fundi kishte shumë dridhje të tokës, por që kishte vetëm dëme materiale, shkruan albinfo.ch.

“Ishte ora 11:30 në Greqi, kur u ndie lëkundja e parë dhe nga më të fortat. Unë ndodhesha në atë moment në hotel, bashkë me nusen dhe djalin, dhe isha bërë gati për gjumë. Mora djalin në krahë dhe dola menjëherë në hollin e hotelit. Me t’u qetësuar disi situata, u ngjita sërish në dhomë. Por lëkundjet nisën të ndiheshin çdo 10 minuta, e nga ai moment vendosa ta kaloja natën në makinë, së bashku me familjen”, tregon Lila, raporton ‘TCH’.

Njoftimet e mediave greke flisnin për një situatë të paqëndrueshme, ndërsa sizmologët nuk kanë dhënë ende fjalën e tyre për qetësimin e situatës. Për këtë arsye, Andi Lila vendosi që të paktën të siguronte familjen, duke e sjellë në Shqipëri.

“Faktikisht u nisa me makinë për në Shqipëri, por për të sjellë familjen, nisur edhe nga fakti që nga klubi më kishin njoftuar se ndeshja e kësaj të diele nuk do të luhej. Por rrugës deri në Kakavijë, drejtues të klubit më morën sërish në telefon për të më thënë se ndeshja nuk do të anulohej dhe duhet të luhet po sot pasdite. Kam luajtur në shi, dëborë, diell, por në një situatë lëkundjesh sizmike nuk kam luajtur ndonjëherë”, thotë më tej Andi Lila.