Ambra Marku ngjitet në skenën e Sanremos, 12-vjeçarja përfaqëson Shqipërinë në “Ariston”

Talenti i ri nga Lezha do të konkurrojë më 14 prill në finalen e “Sanremo Junior”, duke interpretuar këngën e njohur “Valsi i Lumturisë” të Vaçe Zelës.

Shqipëria do të ketë përfaqësim në një nga skenat më prestigjioze të muzikës në Itali, pasi 12-vjeçarja Ambra Marku do të marrë pjesë në finalen e “Sanremo Junior”, e cila mbahet më 14 prill në Teatrin legjendar “Ariston”, transmeton albinfo.ch.

E reja nga Lezha do të performojë këngën “Valsi i Lumturisë”, një prej perlave të repertorit shqiptar, të interpretuar ndër vite nga ikona e muzikës shqiptare Vaçe Zela. Përzgjedhja e kësaj kënge pritet të sjellë në Sanremo jo vetëm talentin e një brezi të ri, por edhe një pjesë të rëndësishme të trashëgimisë muzikore shqiptare.

Ambra është nxënëse në shkollën “Besëlidhja” në Lezhë dhe e konsideron këtë pjesëmarrje si një moment të veçantë, të cilin e ka ëndërruar prej kohësh. Ajo tregon se rrugëtimi i saj artistik ka nisur që në moshë të vogël, fillimisht me pianon, më pas me kanton, ndërsa kohët e fundit ka shtuar edhe kitarën, duke e pasuruar më tej repertorin e saj.

Për Lezhën, kjo pjesëmarrje përbën një tjetër arritje të rëndësishme, pasi Ambra bëhet konkurrentja e dytë nga ky qytet në këtë kompeticion, pas Kiara Ibrajt, e cila në vitin 2024 u rendit në vendin e tretë.

Mësuesja e saj, Albana Përvathi, shprehet se Ambra është rezultat i një pune të vazhdueshme dhe disipline të lartë, duke theksuar se ajo ka një talent të spikatur, por mbi të gjitha një vullnet të jashtëzakonshëm për të arritur objektivat e saj.

E angazhuar në muzikë që në moshën 6-vjeçare, Ambra Marku ka fituar deri tani mbi 40 çmime në gara dhe aktivitete të ndryshme kombëtare. Tani, ajo synon të bëjë një tjetër hap të madh në karrierën e saj, duke u ngjitur në skenën e “Sanremo Junior” për të përfaqësuar Shqipërinë mes konkurrentëve të rinj nga vende të ndryshme./Albinfo.ch

---