Alarmohen farmacitë: Inkurajohen t’i denoncojnë klientët e dyshimtë

Bëhet fjalë për produkte kimike që përdoren shpesh dhe që përmbajnë një ose më shumë substanca kimike që mund të përdoren "në prodhimin e paligjshëm të eksplozivëve"

Muajin e kaluar, “pharmaSuisse” ka dërguar një qarkore të Policisë federale (fedpol) në të gjitha farmacitë në Zvicër, njofton albinfo.ch.

Ky dokument i fton ato të marrin pjesë në mënyrë aktive në luftën kundër terrorizmit, me që ato shesin produkte të dobishme për të bërë bomba artizanale. Për të parandaluar terroristët potencialë, autoritetet kanë bërë thirrje pranë punëtorëve të farmacive, duke i lutur që t’i hapin sytë. Punëtorët në fjalë tani mund të raportojnë ndonjë “sjellje të çuditshme” të klientëve të tyre.
Në shënjestër të FEDPOL-it janë të ashtuquajturit “prekursorët eksplozivë”. Bëhet fjalë për produkte kimike që përdoren shpesh dhe që përmbajnë një ose më shumë substanca kimike që mund të përdoren “në prodhimin e paligjshëm të eksplozivëve”, thekson FEDPOL-i. Peroksidi i hidrogjenit gjendet në dezinfektues dhe për ngjyrë të flokëve.

Nitrati gjendet në plehra. Lista radhit pesëmbëdhjetë substanca dhe shumë produkte për t’i monitoruar nga afër, për të cilët duhet pasur një vëmendje të veçantë.