Abdixhiku: LDK do të marrë pjesë në votimin për presidentin e vendit

Abdixhiku pas takimit me deputetët e partisë të tij tha se ky është vendimi i Kryesisë së partisë dhe këtë vendim ua ka komunikuar deputetëve

Kryetari i Lidhjes Demokratike të Kosovës, Lumir Abdixhiku, tha sot se pas një diskutimi të hapur se kanë marrë vendim që LDK nuk do të bëjë obstruksione në zgjedhjen e presidentit të vendit dhe LDK si gjithherë do të ushtrojë detyrimin kushtetues e të marrë pjesë në votim për presidentin e vendit, pa paragjykuar votimin e deputetëve.

Abdixhiku pas takimit me deputetët e partisë të tij tha se ky është vendimi i Kryesisë së partisë dhe këtë vendim ua ka komunikuar deputetëve.

“Pres që secili deputet të respektojë vullnetin kolektiv të shumicës dhe të mos pengojë kursin e ri të LDK-së drejt rikthimit tonë origjinal. Pres të sillen si institucionalistë dhe të kapërcejnë veten dhe çfarëdo hidhërimi që mund ta kenë”, tha kryetari i LDK-së.

Ai më tej tha se vendimi i Kryesisë së LDK dhe i tij është që fillimisht vendit t’i jepet një proces normal parlamentar.

“Vota përfaqëson vullnetin qytetar dhe çdo hap për të penguar këtë vullnet është veçse kundërshti ndaj njerëzve tanë, ndaj qytetarëve të këtij vendi. Vendimi i Kryesisë së LDK-së determinon edhe fatin tonë politik të vendit për një periudhë pesëvjeçare”, tha Abdixhiku.

 

---