Mbetjet elektronike në BE fshehin metale me vlerë 65 miliardë euro

Pajisjet e vjetra elektroshtëpiake dhe elektronike që nuk përdoren më përmbajnë lëndë të para me vlerë rreth 65 miliardë euro vetëm në Bashkimin Evropian, sipas një studimi të ri gjerman.

Studimi, i realizuar nga Boston Consulting Group (BCG) në bashkëpunim me organizatën joqeveritare Cradle to Cradle (C2C), tregon se pajisjet e braktisura në bodrume, sirtarë apo ambiente të tjera të shtëpive përmbajnë sasi të konsiderueshme materialesh që mund të rikthehen në ciklin e prodhimit.

Pajisjet e vjetra mbeten në shtëpi

Nando Erne, zëdhënës i fondacionit zviceran SENS eRecycling, i cili promovon riciklimin e pajisjeve elektrike dhe elektronike, thotë se ka disa arsye pse njerëzit nuk i dorëzojnë pajisjet e vjetra për riciklim.

Sipas tij, riciklimi i pajisjeve elektroshtëpiake nuk është një proces me të cilin njerëzit përballen shpesh. Për këtë arsye, shumë prej tyre e shtyjnë dorëzimin dhe thjesht i ruajnë pajisjet në bodrume ose në sirtarë.

Një tjetër pengesë është siguria e të dhënave personale.

Shumë njerëz hezitojnë të dorëzojnë telefonat inteligjentë, laptopët dhe pajisje të tjera elektronike, sepse nuk janë të sigurt nëse të dhënat e tyre janë fshirë plotësisht.

Mesatarisht nëntë pajisje të papërdorura për familje

Sipas WEEE Forum, një organizatë ndërkombëtare jofitimprurëse që merret me menaxhimin e mbetjeve të pajisjeve elektrike dhe elektronike, çdo familje në BE ka mesatarisht nëntë pajisje të papërdorura dhe rreth katër pajisje të tjera të dëmtuara.

Nuk ka të dhëna të ngjashme për Zvicrën. Megjithatë, duke pasur parasysh të ardhurat mesatare më të larta, vlerësohet se numri i pajisjeve elektronike për banor mund të jetë edhe më i madh.

Erne thotë se edhe industria duhet të luajë një rol më të madh në nxitjen e konsumatorëve për të dorëzuar pajisjet që nuk i përdorin më.

Sipas tij, fushatat e ndërgjegjësimit, përfshirë ato gjatë periudhave të pastrimit të shtëpive, mund t’i kujtojnë njerëzit se pajisjet e vjetra mund të dorëzohen për riciklim.

Ai kërkon gjithashtu që procesi i kthimit të pajisjeve të jetë sa më i thjeshtë dhe pikat e grumbullimit të jenë më të dukshme dhe më të lehta për t’u identifikuar.

Metalet rikthehen në ciklin e prodhimit

Nga pajisjet elektronike të vjetra mund të nxirren dhe të riciklohen materiale të vlefshme, si bakri dhe alumini.

Situata është më e ndërlikuar për elementet e tokave të rralla. Edhe pse këto materiale kanë vlerë dhe mund të përdoren për prodhimin e pajisjeve të reja, ato gjenden shpesh në sasi shumë të vogla brenda pajisjeve elektronike.

Për këtë arsye, nxjerrja e tyre në shkallë industriale mund të jetë teknikisht e vështirë, shumë e kushtueshme ose, në disa raste, mund të shkaktojë më shumë dëm mjedisor sesa përfitim.

Megjithatë, sipas Erne, një pjesë e konsiderueshme e pajisjeve elektronike tashmë riciklohet në Zvicër.

Ai u bën thirrje qytetarëve të kontrollojnë shtëpitë e tyre dhe të mos i mbajnë pa nevojë pajisjet e vjetra.

Një telefon i harruar në sirtar apo një fshesë me korrent e prishur në bodrum mund të ketë ende vlerë dhe, në vend që të mbetet e papërdorur, mund të rikthehet në ciklin e riciklimit.

---