Ekonomia e Gjermanisë shënon shifrat më të mira në vite

Shifrat pozitive vijnë në një kohë kur titujt negativë për ekonominë gjermane vazhdojnë të shtohen

Ekonomia gjermane po tregon shenjat e para  të një rimëkëmbjeje pas një periudhe të gjatë stanjacioni. Ekonomia më e madhe e Evropës po shkon drejt rritjes më të fortë të PBB-së që nga viti 2022, ndërsa besimi i bizneseve, pas një periudhe të gjatë të dobët, po rikthehet më në fund.

Zyra Federale e Statistikave njoftoi javën e kaluar se ekonomia u rrit me 0,3% në tremujorin e dytë të vitit 2026, duke tejkaluar pritshmëritë dhe duke vazhduar në të njëjtën linjë me shifrat solide të dy tremujorëve të mëparshëm, shkruan Scan, transmeton albinfo.ch.

Shifrat pozitive vijnë në një kohë kur titujt negativë për ekonominë gjermane vazhdojnë të shtohen. Volkswagen, një nga kompanitë më të njohura të vendit,  po kalon nëpër shkurtime të dhimbshme të vendeve të punës — pasqyrë e një ristrukturimi mbarëkombëtar përballë konkurrencës kineze dhe sfidave të tjera globale.

Këtë verë, nivelet rekord të ulëta të ujit në lumenj kryesorë si Rini dhe Danubi kanë penguar ndjeshëm tregtinë dhe aktivitetin ekonomik, ndërsa lufta në Iran po nxit më tej rritjen e çmimeve të energjisë. Një nga arsyet e kësaj rimëkëmbjeje, megjithatë, qëndron pikërisht te mënyra si ekonomia gjermane i ka përballuar disa nga këto sfida, sidomos mbylljen e Ngushticës së Hormuzit si pasojë e luftës në Iran.

Eksportet dhe baza industriale e Gjermanisë kanë nxitur rritjen e PBB: porositë e reja u rritën për të tretin muaj radhazi, duke sjellë rritjen më të fortë të prodhimit që nga fillimi i vitit 2022.

Analistët mendojnë gjithashtu se qeveria e kryesuar nga Friedrich Merz meriton një pjesë të meritës për këtë kthesë, edhe pse popullariteti i saj ra në një nivel historikisht të ulët në vitin 2026.

Planet ekonomike të qeverisë mbështeten te një program investimesh infrastrukturore prej 500 miliardë eurosh, një rritje masive e shpenzimeve për mbrojtjen dhe një paketë e gjerë reformash për të nxitur konkurrueshmërinë.

---