Ermonela Jaho debuton në Festivalin Veror të Varnës me një gala operistike

Sopranoja shqiptare ngjitet për herë të parë në skenën e Varnës, duke interpretuar kryevepra të operës botërore së bashku me artistë të njohur ndërkombëtarë

Sopranoja me famë botërore Ermonela Jaho ka debutuar për herë të parë në Festivalin Veror të Operës në Varna të Bullgarisë, duke dhuruar një mbrëmje gala me disa nga veprat më të njohura të repertorit operistik botëror, transmeton albinfo.ch.

Në koncertin e mbajtur në Summer Theatre të Varnës, Jaho u ngjit në skenë së bashku me dirigjentin Jakopo Sipari di Pescasseroli, violinisten Abigeila Voshtina dhe Orkestrën e Operës Shtetërore të Varnës, në një program që përfshinte vepra të kompozitorëve të mëdhenj si Puccini, Verdi, Cilea, Beethoven, John Williams dhe të tjerë.

Përmes një mesazhi publik, artistja shqiptare e cilësoi këtë debutim si një moment të veçantë në karrierën e saj.

“Është një gëzim i jashtëzakonshëm të këndoj sonte për herë të parë në Varna, një qytet me një frymë të pasur kulturore dhe një traditë të mrekullueshme operistike. Nuk mund ta imagjinoja një debutim më kuptimplotë sesa ta ndaja skenën me dy miq të dashur dhe artistë të jashtëzakonshëm,” shkroi Jaho.

Ajo theksoi se muzika ka fuqinë të bashkojë njerëzit përtej gjuhëve dhe kufijve, duke shprehur dëshirën që mbrëmja të jetë një festë e artit, miqësisë dhe ëndrrave të përbashkëta.

Debutimi i Ermonela Jahos në Festivalin Veror të Varnës përbën një tjetër sukses të rëndësishëm në karrierën ndërkombëtare të sopranos shqiptare, e cila vazhdon të përfaqësojë denjësisht artin shqiptar në skenat më prestigjioze të botës./Albinfo.ch

---