Zelensky kritikon vendet që ende po blejnë naftë ruse

facebook

Presidenti ukrainas, Volodymyr Zelensky, ka akuzuar vendet evropiane që po vazhdojnë të blejnë naftë ruse.

Në një intervistë me BBC, i pari i shtetit ukrainas veçoi Gjermaninë dhe Hungarinë, duke i akuzuar ata për bllokimin e përpjekjeve rreth vendosjes së një embargoje ndaj shitjes së energjisë, ku Rusia fiton mbi 300 miliardë euro në vit.

Ka pasur një zhgënjim në rritje në mesin e udhëheqjes së Ukrainës me Berlinin, i cili ka mbështetur disa sanksione kundër Rusisë, por deri më tani u ka rezistuar thirrjeve për të mbështetur veprime më të ashpra për shitjet e naftës.

“Disa nga miqtë dhe partnerët tanë e kuptojnë se tani është një kohë tjetër, se nuk është më një çështje biznesi dhe parash”, tha Zelensky, duke shtuar “se është çështje mbijetese”.

Presidenti gjithashtu përsëriti thirrjet për furnizimin me më shumë armë, duke thënë se ato nuk po i merrnin aq shpejt sa për të shmangur sulmin e Rusisë.

Ukraina tani po përballet me një sulm në lindje dhe jug, teksa Rusia përpiqet të aneksojë më shumë territor se sa Krimeja në vitin 2014./BBC