22 vjet burgim për Darko Tasiq, për krime lufte në Krushë të Vogël

I akuzuari për krime lufte, Darko Tasiq, është shpallur fajtor dhe është dënuar me 22 vjet burgim nga Gjykata Themelore në Prizren.

Sipas aktgjykimit të shpallur të hënën nga kryetari i trupit gjykues, gjykatësi Artan Sejrani, për pikën e parë të aktakuzës Tasiq u dënua me 7 vjet burgim, kurse për atë të dytën me 16 vjet burgim. Ndaj tij më pas u shqiptua dënimi unik në kohëzgjatje prej 22 vjet burgim.

Lidhur me këtë rast, edhe sot qytetarë të Krushës së Vogël kanë protestuar para Gjykatës Themelore në Prizren, ku kanë kërkuar dënim të lartë për të akuzuarin. E pas shpalljes së aktgjykimit ka pasur edhe përleshje në mes të protestuesve dhe zyrtarëve policorë, pasi këta të parët kërkon dënim më të lartë për të akuzuarin Tasiq.

Ndryshe, ky rast zhvillohet në bazë të aktakuzës së PSRK-së, me të cilën i akuzuari Darko Tasiq akuzohet se gjatë muajit mars 1999 ka kryer krime lufte ndaj popullsisë civile të fshatit Krushë e Vogël, të komunës së Prizrenit.

Sipas aktakuzës, Tasiq akuzohet se fillimisht gjatë periudhës 15 – 26 mars 1999 ka marrë pjesë së bashku me forcat policore dhe para ushtarake serbe për të plaçkitur dhe shkatërruar pasuritë e popullsisë civile, duke djegur shtëpi, duke marrë automjetet bujqësore dhe sendet e tjera me vlerë të të fshatarëve në përgjithësi dhe familjes Hajdari në veçanti.

Aktakuza e PSRK-së e ngarkon të akuzuarin Tasiq edhe me përdhosjen e trupave të pajetë, duke i djegur kufomat së bashku me forcat e tjera policore dhe paramilitare dhe duke i hedhur kufomat në lumin Drin, në një vend jashtë fshatit Krushë e Vogël.

Sipas aktakuzës, i akuzuari me veprimet e tij ka kryer sulm mizor kundër dinjitetit njerëzor dhe kërkohet që i njëjti të dënohet sipas ligjit aktual me jo më pak se 5 vjet burgim ose me burgim afatgjatë ose sipas ligjit të mëhershëm, me jo më pak se 5 vjet ose deri në 20 vjet burgim efektiv, shkruajnë mediat kosovare, përcjell albinfo.ch.