Rekorderja turke bën zhytje historike në Antarktidë

Zhytësja nga Turqia e njohur ndërkombëtarisht, Şahika Ercümen, u bë gruaja e parë turke që zhytet pa bombola ajri në Antarktidë.  

Ercümen është pjesë e ekipit të Ekspeditës së 3-të Shkencore Kombëtare në Antarktidë, e cila synon krijimin e bazave shkencore të Turqisë në kontinentin e bardhë. 

Gruaja që tashmë ka 9 rekorde, bëri zhytjen e saj të parë në Antarktidë në Ishullin King George. Zhytja e saj e parë në Antarktidë në temperaturë të ujit 0 gradë Celsius zgjati dy minuta, pa pajisje për mbrojtje nga të ftohtit. 

Ekipi shkencor turk u nis për në Antarktidë për të ngritur një bazë të përkohshme kërkimore shkencore dhe arriti në kontinentin më të ftohtë të hënën, përcjell albinfo.ch.

“Unë do të jem një nga zhytëset e rralla në Antarktidë. Do të jem zhytësja e parë e lirë në Antarktidë që zhytet me një frymëmarrje të vetme”, tha rekorderja botërore Ercümen për AA para zhytjes. 

Udhëtimi i saj është filmuar edhe në një film dokumentar. Ercümen tha se ndihet krenare që përfaqëson vendin e saj. Ajo arriti një rekord botëror në zhytje të lirë në peshë të ndryshueshme, pa disiplinë, në vitin 2016, në afërsi të bregdetit të qytetit turistik mesdhetar Kas. 

Destinacioni i parë i ekipit ishte Sao Paulo, kryeqyteti i Brazilit. Grupi më vonë udhëtoi në kryeqytetin kilian Santiago. Pas një udhëtimi prej 30 orësh në total, ekipi arriti në qytetin jugor, Puerto Williams. Pas një strehimi dyditor në “pikën e fundit banuese” në hemisferën jugore, ata arritën në ishullin King George në Antarktidë përmes një fluturimi dyorësh. 

Antarktika, kontinenti më i ftohtë në tokë, ka shërbyer si një zonë kërkimore shkencore që nga një traktat i vitit 1959. Turqia, e cila aktualisht ka status vëzhgues, synon të ketë status konsultativ në kontinent. Temperatura më e ulët e regjistruar në kontinentin më të ftohtë në vitin 1983 ishte -89 gradë Celsius. 

Temperaturat arrijnë deri në -15 gradë Celsius gjatë verës. Qendra e parë Kërkimore Polare e Universitetit Teknik të Stambollit u themelua në Antarktidë në vitin 2015. Misioni i qendrës është të kryejë kërkime mbi Antarktidën dhe të rrisë profilin e Turqisë në komunitetin shkencor ndërkombëtar.