Skip to content

Volkswagen regjistron humbje prej 5.82 miliardë eurosh në tremujorin e tretë

Prodhuesi gjerman i automjeteve është përballur me humbje të mëdha financiare nga korriku deri në shtator. Një nga faktorët kryesorë është zhvlerësimi i aseteve të Porsche-s, ndërsa në Kinë shitjet kanë pësuar rënie të ndjeshme.

Gjiganti gjerman i automobilave, Volkswagen, ka regjistruar humbje neto prej 5.82 miliardë eurosh në tremujorin e tretë të vitit, nga korriku deri në shtator. Shifra është bërë e ditur nga vetë kompania në njoftimin e publikuar të enjten, duke pasqyruar vështirësitë financiare me të cilat po përballet grupi, përcjell albinfo.ch.

Sipas kompanisë, një nga arsyet kryesore për këtë rezultat negativ janë efektet e jashtëzakonshme financiare, të cilat arrijnë në 7.8 miliardë euro. Brenda kësaj shume përfshihet edhe zhvlerësimi i aseteve të Porsche-s, që vlerësohet në rreth 6.4 miliardë euro.

Rënie e fortë e shitjeve në Kinë

Përveç ngarkesave financiare, Volkswagen po përballet edhe me rënie të shitjeve në tregun kinez, një nga tregjet më të rëndësishme për industrinë globale të automobilave.

Gjatë periudhës së raportuar, shitjet e automjeteve të grupit në Kinë ranë me 38.5 për qind, duke zbritur në afro 406.000 automjete.

Rezultatet e tremujorit të tretë tregojnë sfidat me të cilat po përballet prodhuesi gjerman, si pasojë e kostove të larta dhe dobësimit të shitjeve në një treg kyç për aktivitetin e tij ndërkombëtar./Albinfo.ch