Delegacioni nga Gjakova zhvillon takime në Basel

Gjatë datave 19-21 nëntor 2018, një delegacion nga Komuna e Gjakovës ka zhvilluar një vizitë dhe disa takime në  Basel të Zvicrës.

Ky delegacion ishte i përbërë nga Ramadan Hoti, nën-Kryetar i Komunës së Gjakovës, nga Valdrin Shehu, Drejtor Regjional i Arkivit të Gjakovës, Rahovecit dhe Malisheves, Arber Gola, Udhëheqës i Zyrës së Integrimeve Evropiane, Skender Nikoliqi, Drejtor i Bordit të ABSM (Qendra për Arsimim dhe Këshillim) në Basel si dhe nga Vjosa Meqa, administratore në ABSM.

Nën Kryetari Komunës së Gjakovës, Ramadan Hoti gjatë takimeve ka vlerësuar ndihmesën e madhe e të vazhdueshme të shtetit të Zvicrës për përkrahjen në formimin e shtetit të Kosovës, shkruan Albinfo.ch

Në ditën e parë, në një nga sallat e Arkivit Qendror të Baselit, delegacioni nga  Kosova u prit nga Drejtoresha e Arkivës në Liestal, Baselland, Regula Nebiker,  vlenë të theksohet se Arkivi i Basellandit, ka rreth 21 km dokumente arkivore.

Drejtori i Arkivit Regjional Valdrin Shehu ka informuar, Drejtoreshën Regula Nebiker për organizimin e strukturave, të veprimtarive dhe të kushteve të punës në arkivin shtetëror të Kosovës dhe të Gjakovës.

Nebiker i ka vlerësuar arkivat si identitet i një vendi dhe ka folur me delegacionin për nevojën e realizimit sa më të shpejt të digjitalizimit gjë e cila sjell edhe ruajtjen afatëgjatë të dokumenteve.

Delegacioni nga Gjakova gjithashtu janë takuar edhe me ish-Kryetarin  e Baselit, Dr. Hans Martin Tschudi i cili këshilloj delegacionin që të kenë sa më shumë bashkëpunime ndërkufitare për të mirën e qytetit Gjakovës.

Ata gjithashtu janë takuar edhe me një tjetër Drejtoreshë të arkivave të Kantonit Baselit, Esther Bauer, në këtë takim , Shehu foli për synimet e arkivës së Komunës Gjakovës, Rahovecit dhe Malishevës për vitet e ardhshme, duke vlerësuar si më të rëndësishme mbledhjen e sa më shumë materialeve me vlera kulturore dhe historike.

Delegacioni zhvilloi një takim edhe me Josias Planta, Drejtor i Sektorit për Punë të Jashtme në Basel. Ai i informoi mysafirët nga Kosova për binjakëzimet që qyteti i Baselit ka me qytete nga vende të tjera, me fokus kryesor kulturën, artin, arsimin, mjeksinë, etj.

Gjithashtu dëshira e të dy palëve ishte që takimet dhe vizitat e kësaj natyre të vazhdojnë edhe në të ardhmen, me qëllim që arkivi i regjionit të Gjakovës, ose projekte të tjera të natyrave të ndryshme, të jetë i një standarti modern, bashkëkohorë e lehtësisht funksional për qytetarët dhe studiuesit.