Përkundër kërcënimeve, Vjena pret Vitin e Ri nën qiell të hapur

Manifestimi do të sigurohet nga 1500 policë, 250 prej të cilëve do të vijnë nga qytetet tjera të Austrisë për të ndihmuar kolegët e tyre në ruajtjen e sigurisë

Përkundër kërcënimeve nga sulme të mundshme terroriste, në Vjenë të Austrisë do të organizohet edhe sivjet pritja e ndërrimit të motmoteve në qiell të hapur. Kështu ka deklaruar Michael Daxler, njëri nga organizatorët kryesorë të Vjenës, shkruan krone.at, përcjell albinfo.ch.

Pas një bisede që Michael Daxler kishte me policinë, Hekurudhat e Austrisë dhe përfaqësues të qytetit të Vjenës, u arrit marrëveshja që edhe këtë vit shtegu i Vitit të Ri të zhvillohet si zakonisht. “Nuk do të ketë ndryshime të mëdha”, ka thënë ai, duke shtuar se për çdo detaj tjetër do të informohen me kohë. Megjithatë, ai ka thënë se varësisht nga gjendja aktuale, manifestimi edhe mund të anulohet, përcjell albinfo.ch.

Pas këtij takimi u bë e ditur që manifestimi do të sigurohet nga 1500 policë, 250 prej të cilëve do të vijnë nga qytetet tjera të Austrisë për të ndihmuar kolegët e tyre në ruajtjen e sigurisë.

Si zakonisht, edhe këtë vit pritet të tubohen me qindra-mijë njerëz në qendër të Vjenës për të bërë pritjen e ndërrimit të motmoteve.