U ndanë çmimet “Ambasadori i Kombit” dhe “Shqiponja e Artë”

Tri çmime "Ambasadori i Kombit" dhe 15 të tjera "Shqiponja e Artë" u janë dorëzuar po kaq personaliteteve ose grupimeve a shoqatave për kontributin e tyre të madh kushtuar Shqipërisë dhe shqiptarëve

Orkestri (banda) muzikor i Forcave të Armatosura të Shqipërisë, rojat e nderit me të gjitha ceremonitë shtetërore janë angazhuar në kuadrin e mbrëmjes gala të Samitit të Dytë të Diasporës, të mbajtur në Pallatin e Kongreseve në Tiranë.

Në një atmosferë të tillë spektakli, janë ndarë çmimet për arritje të veçanta në diasporë, që jepen në kuadrin e Samitit të Dytë të diasporës që po mbahet në Tiranë, shkruan albinfo.ch nga Tirana. Tri çmime “Ambasadori i Kombit” dhe 15 të tjera “Shqiponja e Artë” u janë dorëzuar po kaq personaliteteve ose grupimeve a shoqatave për kontributin e tyre të madh kushtuar Shqipërisë dhe shqiptarëve.

Tri çmimet e para u janë ndarë Brikena Muharremit, themeluese e Odës së Avokatëve Shqiptarë në Britani të Madhe, Mark Gjonaj, asambleist i Nju Jorkut dhe Avni Dervishi, konsulent për politika të jashtme.

Me çmimin “Shqiponja e artë” me motivacione të ndryshme, janë vlerësuar 15 pjesëtarë tjerë të shquar të mërgatës shqiptare. Mes tyre edhe Ragip Xhaka,babai i futbollistëve të njohur Gramit e Taulant Xhaka, Ermina Përlaskaj, deputete në Parlamentin e Kroacisë, Ekrem Bardha, afarist i njohur në SHBA etj.

Gjatë spektaklit, një fjalë e ka mbajtur edhe kryeministri i Shqipërisë, Edi Rama ndërsa ministri i diasporës, Pandeli Majko ka ndarë çmimet “AMbasadori  Kombit”.

---