11 nëntori, afati i fundit për regjistrimin e votuesve në diasporë

Deri më tani, sipas mediave të Shkupit, përmes aplikacionit online në internet janë paraqitur rreth 3.300 votues nga diaspora

Komisioni Shtetëror i Zgjedhjeve në Maqedoni u ka bërë thirrje qytetarëve të vendit të cilët nuk ndodhen në regjistrin zgjedhor, e që kryesisht banojnë jashtë vendit, të paraqiten qoftë në mënyrë elektronike ose fizikisht në zyrat e Komisionit, për ta rregulluar statusin e votuesit, transmeton albinfo.ch.

Komisioni Shtetëror i Zgjedhjeve është duke punuar në regjistrimin e votuesve që jetojnë jashtë vendit, duke verifikuar regjistrat dhe regjistrimin e votuesve të diskutueshëm.

Deri më tani, sipas mediave të Shkupit, përmes aplikacionit online në internet janë paraqitur rreth 3.300 votues nga diaspora.

Janë rreth 30 mijë shtetas të Maqedonisë, të cilët janë lënë jashtë regjistrit zgjedhor.

11 nëntori është afati i fundit për regjistrimin e votuesve, të cilët jetojnë në diasporë dhe dëshirojnë të votojnë për zgjedhjen e tre deputetëve në njësinë e shtatë që mbulon diasporën.