Shteti zviceran gjatë vitit 2015 ka shpenzuar 37 miliardë franga për arsim dhe hulumtime, që është për 800 milionë më shumë se një vit më parë. Me përqindje, pasi të “pastrohet” efekti që bën shtrenjtimi, i bie se janë dhënë 3.5 për qind më shumë. Ndërsa po u krahasua me rritjen e bruto produktit të përgjithshëm, del se shpenzimet për arsim dhe hulumtim janë rritur afërsisht tre fish më shumë, shkruan sda.ch.

Në të njëjtën kohë, sipas Zyrës Federale për Statistikë, shpenzimet e përmendura kanë qenë në shkallë të përafërt me ato të përgjithshme që ka pasur shteti në këtë periudhë.

Dhjetë vite më parë, nga paraja publike, arsimi në Zvicër kishte përfituar 28 miliardë franga ose 9 miliardë më pak se aktualisht, transmeton albinfo.ch. Shikuar në mënyrë efektive, rritja e parave të dhëna për arsim ka qenë për më shumë se një të katërtën (27.5) në krahasim me vitin 2005.

Arsyeja kryesore për këtë rritje nuk qëndron në shtimin e numrit të nxënësve por në rritjen e shpenzimeve për kokë nxënësi ose studenti.

Ndërkaq, gjatë periudhës së njëjtë është rritur nga 15.5% në 17.2 % pjesëmarrja e shpenzimeve për arsim në shpenzimet e tërësishme publike, përcjell albinfo.ch. Pas shpenzimeve për siguri sociale (40 për qind), në vendin e dytë për nga pesha vijnë ato për arsuim dhe shkencë.

Me 23 miliardë franga, kantonet kanë siguruar dy të tretat e këtyre shpenzimeve. Një e katërta ka ardhur nga komunat dhe 10 për qind nga federata.

Gjysma e shpenzimeve të dedikuara arsimit, shkon për shkollimin fillor dhe shkollat speciale. Një e pesta i dedikohet shkollave të larta dhe universiteteve ndërsa nga një të dhjetat, shkencës dhe arsimit bazik profesional. Në të gjitha këto kategori, rreth dy të tretat e mjeteve janë shpenzuar për pagesën e personelit mësimor.