Zbulohen shkaqet e zjarrit që shkaktoi tragjedinë në spitalin e Tetovës

Prokuroria Themelore Publike e Tetovës ka dalë me raportin preliminar të zjarrit që shpërtheu më 8 shtator në spitalin e Tetovës, e ku humbën jetën 14 persona.

Në raport thuhet se zjarri shpërtheu nga një kabllo vazhduese, ku ishte vendosur defibrilatori – pajisje për trajtimin e pacientëve në rast të ndonjë sulmi kardiak.

“Mbinxehja e kabllos shkaktoi zjarrin në kutinë ku ishin të lidhur defibrilatori, karikuesi i telefonit celular dhe një pajisje tjetër”, thuhet në raportin e Prokurorisë, përcjell Albinfo.ch.

Prokuroria njoftoi po ashtu se po vazhdon të hetojë edhe shkaktarët e tjerë të mundshëm dhe shtoi se pas mbledhjes së të gjitha provave verbale dhe materiale, pas shqyrtimit dhe analizimit të tyre, do të merret vendimi për rrjedhën e mëtejshme të procedurës.