Vihet në pikëpyetje testi i aftësisë për vozitje për të moshuarit në Zvicër

Studimi i ZHAW thotë se procedurat aktuale nuk janë të standardizuara dhe ndryshojnë nga një kanton në tjetrin.

Në Zvicra, personat mbi 75 vjeç që dëshirojnë të vazhdojnë të drejtojnë automjetin duhet t’i nënshtrohen çdo dy vjet një kontrolli mjekësor për të vlerësuar aftësinë e tyre për vozitje, përcjell albinfo.ch.

Megjithatë, një studim i realizuar nga Zurich University of Applied Sciences (ZHAW) ka vënë në pikëpyetje mënyrën se si kryhen këto teste. Sipas hulumtimit, praktikat aktuale janë të fragmentuara dhe ndryshojnë në varësi të kantonit, rajonit gjuhësor dhe grupit profesional që është përgjegjës për kryerjen e testimit.

Drejtuesja e studimit, Brigitte Gantschnig, theksoi se mungesa e standardizimit në procedurat e vlerësimit nënkupton se aktualisht nuk ekziston një sistem plotësisht i drejtë dhe i besueshëm për të përcaktuar aftësinë për drejtim në gjithë vendin.

Sipas saj, kjo situatë tregon nevojën për një proces të harmonizuar dhe rregulla të qarta në nivel kombëtar, në mënyrë që testimi i aftësisë për vozitje të jetë më i drejtë, më i besueshëm dhe i bazuar në kritere shkencore për të gjithë drejtuesit e moshuar në Zvicër./Albinfo.ch

---